ނ. މިލަދޫގެ ޒުވާނުންނާއި ކައުންސިލުން އެދުނު ގޮތަށް އެރަށުގެ ބޮޑު ފުޓްބޯޅަ ދަނޑުގެ މަސައްކަތް ނިންމައިފިއެވެ.

މީގެ 8 އަހަރުކުރީން، މިލަދޫ ފުޓްބޯޅަ ދަނޑުގެ މަސައްކަތް ފެށި ނަމަވެސް، ތަފާތު އެކިއެކި ސަބަބުތަކާހުރެ ނުނިމި އޮތުމަށްފަހު، އަދުގެ ސަރުކާރުން މިވަނީ ކުޑަ ދުވަސްކޮޅެއްގެ ތެރޭގައި އެ މަސައްކަތްތައް ފުރިހަމަކޮށްފައެވެ.

މިލަދޫގެ ފުޓްބޯޅަ ދަނޑުގެ މަސައްކަތުގެ ތެރެއިން، ދަނޑުގެ ސަބްބޭސް ރަނގަޅުކޮށް، ޓާފް އަޅާފައިވާއިރު، ވަށާ ފާރާއި ފެންސް ވެސް ވަނީ މަރާމާތުކޮށްފައެވެ. އެގޮތުން، ކުރިން ތިން ފޫޓަށް ރާނާފައިވާ ވަށާ ފާރު މިހާރު ވަނީ ހަ ފޫޓަށް އުސްކޮށްފައެވެ. އަދި ނުވަ ފޫޓަށް ހުރި ފެންސް މިހާރު ވަނީ 15 ފޫޓަށް އުސްކޮށްފައެވެ.

މިއީ ރާއްޖޭގެ އެކި ރަށް ރަށުގައި ކުރިއަށް ނުގޮސް ހުއްޓިފައިހުރި މަޝްރޫޢުތައް ފުރިހަމަކުރުމަށް ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވަޢުދުވެފައިވާ ފަދައިން ނިންމާފައިވާ މަޝްރޫޢެކެވެ.

އަދުގެ ސަރުކާރުން މި ދަނޑުގެ މަސައްކަތް އަހަރެއްހާ ދުވަހުގެ ތެރޭގައި ނިންމާފައިވަނީ މިލަދޫގެ ކައުންސިލުންނާއި ޒުވާނުން އެދިފައިވާ ގޮތަށެވެ.

މިލަދޫ ދަނޑުގެ މަސައްކަތް ޒަމާނީ ފެންވަރަށް ތަރައްގީކުރެވިފައިވާއިރު، އެ ދަނޑުގެ ލައިޓް ހަރުކުރުމުގެ މަސައްކަތް ވެސް މި ދައުރުގައި ކުރުމަކީ ސަރުކާރުގެ އަމާޒެކެވެ.