މިފަހަރު މުޅިން އައު ފޯމެޓަކަށް ބާއްވާ 32 ޓީމުގެ ކުލަބް ވޯލްޑް ކަޕްގެ ޗެމްޕިއަންކަން ހޯދާ ޓީމަކަށް ގާތްގަނޑަކަށް 125 މިލިއަން އެމެރިކާ ޑޮލަރާ ހަމައަށް ފައިސާގެ އިނާމު ލިބޭނެ ކަމަށް ފީފާ އިން ބުނެފިއެވެ.

ދުނިޔޭގެ ފުޓްބޯޅައިގެ މައި އިދާރާ، ފީފާ އިން މި މަހުގެ ކުރީކޮޅު ބުނީ، އަންނަ ޖޫން މަހުގެ 14 އިން ޖުލައި މަހުގެ 13 އަށް އެމެރިކާގައި ކުރިއަށްދާ މުބާރާތަށް މުޅިއެކު އެއް ބިލިއަން އެމެރިކާ ޑޮލަރުގެ ފައިސާގެ އިނާމު ކަނޑައަޅާފައިވާ ކަމަށެވެ.

މި މުބާރާތަށް ފަންޑުގެ ގޮތުގައި ލިބޭ ހުރިހާ އާމްދަނީއެއް ވެސް ބެހުމަށް ހަމަޖެހިފައިވަނީ ފުޓްބޯޅަ ކުލަބުތަކުގެ މެދުގައި ކަމަށް ވެސް ފީފާގެ ރައީސް، ޖިއާނީ އިންފަންޓީނޯ ނެރުނު ބަޔާނެއްގައިވެއެވެ.

މުބާރާތުގެ އިނާމު ފައިސާ ކަމަށްވާ، އެއް ބިލިއަން އެމެރިކާ ޑޮލަރުގެ ގާތްގަނޑަކަށް ދެބައިކުޅަ އެއްބަޔަށްވާ މިންވަރު ބައިވެރިވާ 32 ކުލަބުގެ މެދުގައި ބަހާލާނެ އެވެ.

އެގޮތުން، ކޮންމެ ކުލަބަކަށް ލިބޭ އަދަދު ބިނާވެގެންވަނީ އެ ކުލަބެއްގެ ފެންވަރާއި ކޮމާޝަލް ކްރައިޓީރިއާގެ މައްޗަށެވެ. އެހެންކަމުން، މެންޗެސްޓަރ ސިޓީ އާއި ރެއާލް މެޑްރިޑް ފަދަ ކުލަބުތަކަށް މުބާރާތުގައި ވާދަކުރާ ކުދި ކުލަބުތަކަށް ވުރެ ނިސްބަތުން ބޮޑު އިންސައްތައެއް ލިބޭނެ އެވެ. މިއީ ފީފާއާއި ޔުއެފާ ގުޅިގެން އެކުލަވާލާފައިވާ މޮޑެލްއެކެވެ.

އިނާމު ފައިސާގެ ތެރެއިން އިތުރު 475 މިލިއަން އެމެރިކާ ޑޮލަރު ބެހުމަށް ހަމަޖެހިފައިވަނީ އެ ކުލަބެއްގެ ޕާފޯމަންސަށް ބަލައިފައެވެ. އެގޮތުން، މުބާރާތުގައި ޓީމަކުން ކުޅުމަށް ހަމަޖެހިފައިވާ ހަތް މެޗުގެ ތެރެއިން ގިނަ މެޗު ކާމިޔާބުކުރާ ޓީމަކަށް ގިނައިން ފައިސާ ލިބޭނެ އެވެ. މިއާއެކު، އެ ޓީމަކަށް މުޅި މުބާރާތުން ޖުމްލަ 125 މިލިއަން އެމެރިކާ ޑޮލަރު ލިބުމުގެ ފުރުޞަތު ފަހިވެގެންދާނެ އެވެ.