މާލޭގެ ކާނުތައް ސާފުކުރުމުގެ މަސައްކަތުގެ ތެރެއިން މަޖީދީމަގުގެ ދެފަޅީގައިވާ ކާނުތައް، ދަމަނަވެށިން ފެށިގެން ހުޅަނގަށް ރަސްފަންނާ ހަމައަށް ސާފުކޮށް ނިމިފައިވާކަމަށް، މިނިސްޓްރީ އޮފް ސިޓީސް ލޯކަލް ގަވަރމެންޓް އެންޑް ޕަބްލިކް ވޯކްސްއިން ބުނެފިއެވެ.

މާލޭގެ ކާނުތައް ސާފުކުރުމުގެ މަސައްކަތް ފަށާފައިވަނީ މި މަހުގެ 8 ވަނަ ދުވަހުން ފެށިގެންނެވެ. އެންމެ ފުރަތަމަ މަސައްކަތް ފެށީ ލަގްޒަރީ ކުރިމަތިންނެވެ. ކޮންމެ ދުވަހަކު ހެނދުނު 9 އިން މެންދުރު ފަހު 2 އަށް މި މަސައްކަތް ކުރިއަށްދެއެވެ.

މިނިސްޓްރީން ބުނީ މާލޭގެ ހުރިހާ މަގެއްގެ ކާނުތައް ސާފުކުރުމުގެ ބޮޑު ހަރަކާތް ފެށީ، ވާރޭ ވެހިއްޖެނަމަ މާލޭގައި ފެންބޮޑުވާ މައްސަލަ ޙައްލުކުރުމުގެ ގޮތުން ކަމަށެވެ. އަދި ވާރޭވެހޭ ކޮންމެ ފަހަރަކު މާލޭގެ މަގުތަކުގައި ފެންބޮޑުވެ އާންމު ރައްޔިތުންނަށް އެ ކަމުގެ އުނދަގޫތައް ކުރިމަތިވާ ކަމަށާއި، ސިފައިންނާއި، ފުލުހުން އަދި އެ މިނިސްޓްރީން ނުކުމެ މާލޭގެ މަގުތަކުން ފެން ހިންދުމުގެ މަސައްކަތް ދޭތެރެ ދޭތެރެއިން ކުރަންޖެހޭކަމަށެވެ.

މާލޭގެ މަގުތަކުގައި ފެންބޮޑުވުމުގެ މައްސަލަ ހައްލުކުރުން ހިމެނޭހެން މަގުތަކުގެ ހުރިހާ މައްސަލައެއް ހައްލުވާނެގޮތަށް ޒަމާނީ ފެންވަރަށް މަގުތައް ތަރައްޤީކުރުމުގެ މަސައްކަތް މިއަހަރު ކުރިއަށް ގެންދިއުމަށް ސަރުކާރުން ވަނީ ނިންމަވާފައެވެ. މި މަސައްކަތް ކުރަނީ ޗައިނާގެ ކުންފުންޏަކުންނެވެ.