އަންނަ އަހަރު ބާއްވާ ވޯލްޑް ކަޕުން ޖާގަ ކަށަވަރުކުރި އެންމެ ފަހުގެ ދުނިޔޭގެ ޗެމްޕިއަން، އާޖެންޓީނާ އިން ވާދަވެރި ބްރެޒިލް 4-1 ގެ ނަތީޖާއަކުން ބަލިކޮށްފިއެވެ.

ދެކުނު އެމެރިކާގެ ވޯލްޑް ކަޕް ކޮލިފައިންގައި ބޮލީވިއާއާ އުރުގުއޭ ބައްދަލުކުރި މެޗު ލަނޑެއް ނުޖެހި އެއްވަރުވުމާއެކު، އާޖެންޓީނާ ވަނީ އެ ސަރަހައްދުން ވޯލްޑް ކަޕްގެ ޖާގަ ކަށަވަރުކުރި ފުރަތަމަ ޓީމަށް ވެފައެވެ.

މި ނަތީޖާއާއެކު، އާޖެންޓީނާ އެއްވަނައިގައި އުޅެނީ 14 މެޗުން 31 ޕޮއިންޓް ހަމަކޮށްގެންނެވެ. އެކުއޭޑޯ ދެވަނައިގައި އޮތީ 23 ޕޮއިންޓާއެކު އެވެ. ދެ ޕޮއިންޓް ފަހަތުން ތިންވަނައިގައި އުރުގުއޭ އޮތްއިރު، ހަމަ އެ އަދަދަށް ޕޮއިންޓް ލިބިގެން ހަތަރު ވަނައިގައި ބްރެޒިލް އޮތީ ފައިދާ ގޯލްގެ ތަފާތުންނެވެ.

ބިއުނަސް އޭރީޒްގައި ހުންނަ މޮނުމެންޓަލް ޑެ ނޫނޭޒް ސްޓޭޑިއަމްގައި ކުޅިބަލަން ވަދެ ތިބި 85 ހާހެއްހާ ސަޕޯޓަރުންގެ ކުރިމަތީގައި ކުޅުނު މެޗުގައި އާޖެންޓީނާގެ ލަނޑުތައް ޖަހައިދިނީ، ހޫލިއަން އަލްވަރޭޒް، އެންޒޯ ފެނާންޑޭޒް، އަލެކްސިސް މެކްއެލިސްޓާ އާއި ޖިއުލިއާނޯ ސިމިއޯނީ އެވެ.

މެޗުގައި ބްރެޒިލްގެ ހަމައެކަނި ލަނޑުޖެހީ މަތެއުސް ކޫންޔާ އެވެ.

ކޮލިފައިންގައި ކުޅުނު އެހެން މެޗުތަކުގެ ނަތީޖާއަށް ބަލާއިރު، ކޮލަމްބިއާގެ ދަނޑުގައި އެ ޓީމު ވަނީ 2-2 އިން ޕެރަގުއޭއާ އެއްވަރުވެފައެވެ. އެކުއޭޑޯ އިން ރަށުން ބޭރުގައި ލަނޑެއް ނުޖެހި ޗިލީއާ އެއްވަރުވިއިރު، އަމިއްލަ ދަނޑުގައި ޕެރޫ އަތުން ވެނެޒުއެލާ މޮޅުވީ 1-0 އިންނެވެ.