ކުރިއަށް އޮތް ފިތުރު ޢީދުގެ އުފަލުގައި މާލޭގައި "ޢީދު ހަވީރު 1446" ގެ ނަމުގައި ޢާއިލާތަކަށް ޚާއްސަ ހަވީރެއް ބޭއްވުމަށް ނިންމައިފި އެވެ.

މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް)، ފުލުހުންނާއި ސަރުކާރު ހިއްސާވާ ކުންފުނިތަކުން އިންތިޒާމްކުރާ މި ޢީދު ހަވީރު އޮންނާނީ، ސަލްޓަލް ޕާކުން ފެށިގެން އިސްލާމީ މަރުކަޒު މައިދާނާއި ޖުމްހޫރީ މައިދާނާއި، ރަސްމީ ބޮޑު ފާލަމުގެ ސަރަހައްދު ހިމެނޭހެން އެކަމަށް ތައްޔާރުކުރެވިފައިވާ ބޮޑު ސަރަހައްދެއްގަ އެވެ. މި ހަވީރު ބޭއްވުމަށް ހަމަޖެހިފަައިވަނީ ޢީދު ދުވަހުގެ ހަވީރު 4 އިން 6 އަށެވެ.

މި ހަވީރާ ގުޅިގެން އެމްއެންޑީއެފުން ނެރުނު ބަޔާނެއްގައި ބުނެފައިވަނީ ޢީދު ހަވީރަށް ޒިޔާރާތްކުރާ ހުރިހާ ޢާއިލާތަކަށް މަޑުކޮށްލައިގެން ތިބެވޭނެ އިންތިޒަމާއި ޢީދު އުފަލުގައި ބާއްވާ އެކި ކުޅިވަރުތަކުގައި ބައިވެރިވުމުގެ އިންތިޒާމް އެ ސަރަހައްދުގައި ހަމަޖައްސާނެ ކަމަށެވެ. އަދި އެތަނުގައި މުނިފޫހިފިލުވުމުގެ ތަފާތު އައިޓަމްތަކާއި ޢީދު ހަދިޔާ ދިނުން ކުރިއަށްދާނެ ކަމަށް އެމްއެންޑީއެފުން ބުންޏެވެ.

މާލޭގައި މިފަދަ ހަވީރެއް ސަރުކާރުގެ އިދާރާތަކާއި ގުޅިގެން ބޭއްވުމުގެ ބޭނުމަކީ އެމްއެންޑީއެފުން ބުނިގޮތުގައި، ޢީދު އުފަލުގައު ވީހާވެސް ގިނަ ދިވެހި އާއިލާތަކަށް އެއްތަނަކުން ބައްދަލުވުމުގެ ފުރުސަތު ދީ، އިޖުތިމާޢީ ރޫހު އާލާ ކުރުމެވެ. އަދި ޒަމާނުއްސުރެ ކޮންމެ ޢީދެއްގައި ދިވެހިންގެ މެދުގައި އޮތް، އެއް ބަޔަކު އަނެއް ބަޔަކާ ބައްދަލުވެ، ސަލާން ގަލާންކޮށް މުނިފޫހިފިލުވައި ހަދިޔާ ބަދަލުކުރުން ފަދަ ރީތި އާދަތަކަށް ދިރުން ގެނެސްދިނުމެވެ.