ކީރިތި ގުރުއާން ހިތުދަސްކުރާ ހާފިޒުންނަށް، ހާފިޒުކަމުގެ ސަނަދު އެރުވުމަށް މުޅިން އަލަށް ބާއްވާ ހާފިޒުންގެ ދަސްވެނިވުމުގެ ޝަރަފްވެރި ޖަލްސާ މިރޭ އޮންނާނެކަމަށް އިސްލާމިކް މިނިސްޓްރީން ހާމަކޮށްފިއެވެ.

މިނިސްޓްރީން ބުނީ މިރޭ 10:00 ގައި އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވުމަށް ހަމަޖެހިފައިވާ މި ޖަލްސާ ޝަރަފްވެރިކޮށްދެއްވާނީ ދިވެހިރާއްޖޭގެ އިއްޒަތްތެރި ރައީސުލްޖުމުހޫރިއްޔާ ޑރ. މުހައްމަދު މުއިއްޒު ކަމަށެވެ. 

ހާފިޒުން ދަސްވެނިވުމުގެ ހަފުލާ ކުރިއަށް އޮތް ތަނުގައި ދެން ބާއްވާނީ ވަކިން ކުލަގަދަކޮށް ބާއްވާ ގައުމީ ފެންވަރުގެ ހަފުލާއެއް ގޮތަށް ކަމަށް، އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ މިދިޔަ އަހަރުގެ ޖުލައި މަހުގައެވެ. 

ޒަމާނުއްސުރެން ފެށިގެން ހާފިޒުންގެ ގްރެޖުއޭޝަން އަދި ގައުމީ ޤުރްއާން މުބާރާތް ނިމުމުގެ ހަފުލާ ބާއްވަނީ އެކީގައެވެ. 

ކީރިތި ގުރުއާން ހިތު ދަސްކޮށްގެން ހާފިޒު ކަމުގެ ސަނަދު ހާސިލުކުރާ މީހުންގެ އަދަދު އަހަރުން އަހަރަށް އިތުރުވަމުންދާކަން ފާހަގަކުރައްވާ މިނިސްޓަރު ވިދާޅުވީ މި ދެ ހަފުލާ އެއްކޮށްގެން ގެންދިއުމަކީ އެއްވެސް ހަރަކާތަކަށް ދޭން ޖެހޭ ހައްގު ގަދަރު ނުދެވި ދާ ކަމެއް ކަމަށެވެ. 

އެހެންކަމުން ގުރުއާން ހިތުދަސްކުރާ ފަރާތްތައް ދަސްވެނިވުމަށް ކޮންމެ އަހަރަކު ހާއްސަ ހަފްލާއެއް ބާއްވަން ނިންމާފައިވާ ކަން މިނިސްޓަރު ހާމަކުރެއްވިއިރު މި ހަފްލާ ބޭއްވުމަށް ހަމަޖެހިފައިވަނީ ކޮންމެ އަހަރެެއްގެ ރަމަޟާން މަހުގެ 27 ވިލޭރޭ ކަމަށާއި، ދަސްވެނިންނަށް ހާއްސަ ގައުނެއް ވެސް ތައްޔާރުކުރެވޭނެ ކަމަށް ވެސް މިނިސްޓަރު ވިދާޅުވިއެވެ.

މުޅިން އަލަށް ބާއްވާ ހާފިޒުންގެ ދަސްވެނިވުމުގެ ޖަލްސާއަކީ ކީރިތި ގުރުއާން ހިތުދަސްކުރާ ފަރާތްތަކުގެ އަގުވަޒަންކޮށް، ޝަރަފްވެރިކަމާއެކު ސަނަދު އެރުވުމަށް ސަރުކާރުން ބާއްވާ ޖަލްސާއެކެވެ. މިރޭގެ ހާއްސަ ޖަލްސާގައި 24 ހާފިޒަކަށް ހާފިޒުކަމުގެ ސަނަދު އަރުވާ ގޮތަށް ވަނީ ހަމަޖެހިފައެވެ.