ފަލަސްޠީނުގެ ރައްޔިތުން ޣައްޒާއިން ބޭރުކުރުމަށާއި ހުޅަނގު އައްސޭރީގައި އިސްރާއީލުގެ އާބާދީތައް އިތުރުކުރުމަށް އިސްރާއީލުން އަޅާ ފިޔަވަޅުތައް ކުށްވެރިކޮށް ދިވެހި ސަރުކާރުން ނޫސް ބަޔާނެއް ނެރެފިއެވެ.

މި ބަޔާނުގައި، ފަލަސްޠީނުގެ ރައްޔިތުން މަޖުބޫރުން ޣައްޒާއިން ބޭރުކުރުމުގެ މަޤްޞަދުގައި އެޖެންސީއެއް ޤާއިމުކުރުމަށް އިސްރާއީލު ސަރުކާރުން ކޮށްފައިވާ އިޢުލާނާއި، ހުޅަނގު އައްސޭރީގައި އިސްރާއީލުން ގާއިމުކޮށްފައިވާ 13 ޣައިރުޤާނޫނީ އާބާދީ ހިމެނޭ ސަރަޙައްދު ހުޅަނގު އައްސޭރިން ވަކިކޮށް، އެ އާބާދީތަކަށް ޤާނޫނީ ހައިސިއްޔަތު ދިނުމަށް ތައްޔާރުވަމުންދާ ދިއުން އެންމެ ހަރުކަށި އިބާރާތުން ދިވެހި ސަރުކާރުން ކުށްވެރިކޮށްފައިވެއެވެ. 

ދިވެހި ސަރުކާރުން ބުނެފައިވަނީ މިފަދަ ޢަމަލުތަކަކީ ބައިނަލްއަޤުވާމީ ޤާނޫނާއި އދ.ގެ ޤަރާރުތަކާއި، ޚާއްޞަކޮށް އދ.ގެ ސަލާމަތީ މަޖިލީހުގެ ޤަރާރު 2334 އާ މުޅިން ޚިލާފު އަމަލުތަކެއް ކަމަށެވެ. އަދި މިފަދަ އަމަލުތަކަކީ ޞުލްޙައަށް ކުރެވޭ މަސައްކަތްތަކަށް ހުރަސްއެޅޭ އަދި ފަލަސްޠީނުގެ ރައްޔިތުންގެ ޙައްޤުތަކާއި ކަރާމާތަށް ނުރައްކާވާފަދަ ކަންތައްތަކެއް ކަމަށްވެސް ފާހަގަކޮށްފައިވެއެވެ.

މީގެއިތުރުން، މި ހަމަނުޖެހުމަށް ދެމެހެއްޓެނިވި، ޞުލްޙަވެރި ޙައްލެއް ހޯދޭނީ 1967 ވަނަ އަހަރުގެ ކުރިން ކަނޑައެޅިފައިއޮތް އިންތަކުގެ މައްޗަށް ބިނާކޮށް، އިރުމަތީ ޤުދުސްއަކީ ފަލަސްޠީނުގެ ވެރިކަންކުރާ ރަށްކަމުގައި ކަނޑައަޅައި، ފަލަސްޠީނަކީ މިނިވަން، މުސްތަޤިއްލު އަދި އަމިއްލަ ސިޔާދަތީ ބާރު ހިނގާ ދައުލަތެއްގެ ގޮތުގައި ޤާއިމުކުރެވުމުން ކަމުގައި ދިވެހި ސަރުކާރުން ދެކޭކަމަށްވެސް މި ބަޔާނުގައި ބުނެފައިވެއެވެ. 

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ދިވެހިރާއްޖޭގެ ވެރިކަމާ ހަވާލުވެވަޑައިގެންނެވި ފަހުން ބައިނަލްއަގުވާމީ މަސްރަހުގައި ފަލަސްޠީނުގެ ހައްގުގައި އަޑުއުފުލުމާއި ވަކާލާތުކުރުމުގައި ރާއްޖެއިން މުހިއްމު ދައުރެއް އަންނަނީ އަދާކުރަމުންނެވެ. 

އެގޮތުން ޣައްޒާގައި އިސްރާއީލުން ހިންގަމުންދާ އިންސާނިއްޔަތާ ހިލާފު ނަސްލު ނައްތައިލުމުގެ ޖަރީމާތަކާ ދެކޮޅަށް ދެކުނު އެފުރިކާއިން ބައިނަލްއަަގުވާމީ އަދުލުގެ ކޯޓަށް ހުށަހަޅާފައިވާ މައްސަލައަށް ރާއްޖެއިން ތަދައްހުލުވެފައިވެއެވެ. އަދި އިސްރާއީލުގެ ޖަރީމާތައް ކުށްވެރިކޮށް ހުށަހެޅޭ ގަރާރުތަކާއި ބަޔާންތަކުގައި ރާއްޖެއިން އަންނަނީ އަބަދުވެސް ބައިވެރިވަމުންނެވެ. 

އޭގެ އިތުރަށް ރައީސް ބޭރުގެ އެކި މަންސަތަކުގައި ދައްކަވާ ކޮންމެ ވާހަކަފުޅެއްގައިމެ، މިނިވަން މުސްތަގިއްލު ފަލަސްތީނުގެ ދައުލަތެއް ގާއިމުކޮށް، ފަލަސްތީނު މައްސަލައަށް ދެމެހެއްޓެނެވި ހައްލެއް ހޯދުމަށް ބައިނަލްއަގުވާމީ މުޖުތަމައަށް ގޮވައިލައްވައެވެ.