ދިވެހިރާއްޖޭގެ އެންމެ އުތުރުގައިވާ އަތޮޅުތައް ކަމަށްވާ ހއ. ހދ. އަދި ށ. ގައި އިތުރު ރިސޯޓުތައް ތަރައްގީކުރަން ނިންމާފައިވާކަމަށް ފަތުރުވެރިކަމާއި ތިމާވެށްޓާއި ބެހޭ ވަޒީރު ޠާރިޤް އިބްރާހީމް ވިދާޅުވެއްޖެއެވެ.

ވަޒީރު މިހެން ވިދާޅުވީ އިއްޔެ ހއ. އަތޮޅުގެ 7 ރަށެއްގައި އޭޓީއެމްގެ ހިދުމަތް ތައާރަފް ކުރުމަށް ކުރެއްވި ދަތުރުފުޅުގައި ބޭއްވުނު ރަސްމިއްޔާތެއްގައެވެ.

މާލެ އަތޮޅުގެ ވިހަމަނާފުށީގައި  1972 ވަނަ އަހަރުގެ އޮކްޓޫބަރު ތިން ވަނަ ދުވަހު ހުޅުވި ރާއްޖޭގެ ފުރަތަމަަ ރިސޯޓު، ކުރުނބާ ވިލެޖް ހުޅުވުނު ފަހުން މިހާރު 52 އަހަރު ވެފައިވާއިރު، ފަތުރުވެރިކަން އަދިވެސް ރާއްޖޭގެ ހުރިހާ އަތޮޅުތަކަށް އެންމެ އެދެވޭ މިންވަރަށް ފުޅާވެފައެއްނުވެއެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދިވެހިރާއްޖޭގެ ވެރިކަމާ ހަވާލުވެވަޑައިގެންނެވި ފަހުން، އެމަނިކުފާނުގެ އިސްނެންގެވުމަށް ފަތުރުވެރިކަން އިތުރަށް ތަރައްގީކޮށް ފުޅާކުރުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ.

މިއަހަރުގެ ރިޔާސީ ބަޔާނުގައި އެމަނިކުފާނުވަނީ ރާއްޖޭގެ އެކި ސަރަހައްދު ތަކުގައި ޓޫރިޒަމް ތަރައްގީކުރުމަށް ރާވާފައިވާ ބައެއްކަންކަން ހާމަކުރައްވާފައެވެ. މިގޮތުން ރިސޯޓްތައް އެންމެ މަދުން ހުރި އަތޮޅުތަކަށް އަމާޒުކޮށް އެ އަތޮޅުތަކުގައި އިތުރު ރިސޯޓްތައް ތަރައްޤީކުރުމުގެ މަސައްކަތް ކުރައްވާނެކަމުގައި ރައީސް ވިދާޅުވިއެވެ. 

ރާއްޖޭގެ އެންމެ އުތުރުގެ 3 އަތޮޅަކީ ގުދުރަތީ މުއްސަނދިކަން ލިބިފައިވާ އެތައް ރަށްތަކެއްގެ މައްޗަށް އެކުލެވިފައިވާ ސަރަހައްދެކެވެ. ނަމަވެސް މި 3 އަތޮޅުގައި މިހާރު ހިންގަމުންދަނީ އެންމެ 5 ރިސޯޓެވެ. އެއީ ހއ. އަތޮޅުގައި 1 ރިސޯޓު، ހދ. އަދި ށ. އަތޮޅުންކުރެ ކޮންމެ އަތޮޅަކު 2 ރިސޯޓެވެ.

ޓޫރިޒަމް މިނިސްޓަރ އިއްޔެ ހއ. އަތޮޅުގެ ބައެއް ރަށްރަށަށް ވަޑައިގެން ވަނީ އެސަރަހައްދުގައި ޓޫރިޒަމް އިތުރަށް ފުޅާކުރުމަށްޓަކައި އައު ރިސޯޓުތައް ތަރައްގީކުރުމަށް ނިންމާފައިވާކަން ހާމަކުރައްވާފައެވެ. އަދި ހއ. އަތޮޅުގެ ހުރިހާ ރަށެއްްގައި އޭޓީއެމްގެ ހިދުމަތް މިހާރު ގާއިމުވެފައި ވުމުގެ ސަބަބުން، ޓޫރިޒަމް ފުޅާވެގެންދާއިރު ގިނަ ފަސޭހަތަކެއް ލިބިގެންދާނެކަންވެސް ވަޒީރު ފާހަގަކުރެއްވިއެވެ،. 

މިވަގުތު އެންމެ ރިސޯޓެއް ހިންގަމުންދާ ހދ. އަތޮޅާއި ތ. އަތޮޅުގައި އިތުރު ރިސޯޓްތައް ތަރައްޤީކުރުމަށް އަންނަ މަހު ހުޅުވާލާނެކަމަށް ވެސް ޓޫރިޒަމް މިނިސްޓްރީން މައުލޫމާތުދެއެވެ. ކޮންމެ އަތޮޅަކަށް ވަކިން މާސްޓަރ ޕްލޭނެއް ހަދައި އެ އަތޮޅެއްގައި ފަތުރުވެރިކަން ތަރައްޤީކުރުމަށް މާރކެޓިންގެ ޕްލޭނެއްވެސް އެކުލަވާލުމުގެ މަސައްކަތް ޓޫރިޒަމް މިނިސްޓްރީން އަންނަނީ ކުރަމުންނެވެ.

ހއ. ފިއްލަދޫގައި ބޭއްވުނު ރަސްމިއްޔާތެއްގައި ރަށު ފަތުރުވެރިކަން ފުޅާކުރުމުގެ ގޮތުން ހއ. އަތޮޅުގައި ބީއެމްއެލްގެ ގެސްޓު ހައުސް ފައިނޭންސިން އިއްޔެ ވަނީ ތައާރަފް ކޮށްފައެފަައެވެ. މިކަމުގެ ސަބަބުން ގެސްޓު ހައުސް އަޅަން، އެ އިމާރާތެއް މޯގޭޖުކޮށްގެން އެހެން ސެކިއުރިޓީއަކާ ނުލައި، ގެސްޓު ހައުސްއަށް ފައިނޭންސިން ލިބޭނެއެވެ. މިރަސްމިއްޔާތުގައި ވާހަކަދައްކަވަމުން މިނިސްޓަރ ޠާރިޤް ވިދާޅުވީ ހަނިމާދޫ އިންޓަރނޭޝަނަލް އެއަރޕޯޓުގެ މަސައްކަތް އަވަސް މުސްތަގުބަލެއްގައި ނިމިގެންދާނެކަމަށާއި، އެހެން ކަމުން އުތުރުގެ އަތޮޅުތަކުގައި ރިސޯތުތަކުގެ އިތުރުން ލޯކަލް ޓޫރިޒަމް ތަރައްގީ ކުރުމަކީވެސް ވަރަށް މުހިންމު ކަމެއް ކަމުގައެވެ.

ރާއްޖޭގެ ފަތުރުވެރިކަމުގެ ދާއިރާއަށް ބޭނުންވާ ފަންނީ މީހުން އުފެއްދުމަށްވެސް ގިނަ މަސައްކަތްތަކެއް ސަރުކާރުން އަންނަނީ ކުރަމުންނެވެ. މިގޮތުން ރައީސް ޑރ. މުޢިއްޒު ވެވަޑައިގެންނެވި ވަޢުދުފުޅާ އެއްގޮތައް، ރާއްޖޭގައި 5 ތަރީގެ ރިސޯޓެއް ތަރައްގީކޮށް ހޮޓެލް ސްކޫލެއް ގާއިމްކުރުމަށް ޤައުމީ ޔުނިވަރސިޓީއާއެކު ފަހުމުނާމާގައި ސޮއިކޮށްފައިވެއެވެ. މި މަޝްރޫއަކީ ދިވެހިރާއްޖޭގެ ފަތުރުވެރިކަމުގެ ދާއިރާގެ ތައުލީމީ ފެންވަރު ބައިނަލްއަގުވާމީ މިންގަނޑުތަކާ ހަމަކުރާނެ މަޝްރޫއެކެވެ.

ފަތުރުވެރިކަން ރާއްޖޭގެ ހުރިހާ ހިސާބަކަށް ފުޅާކުރުމުގެ އަމާޒަށް ވާސިލުވުމުގެ ގޮތުން، ނުހެދި ހުރި ރިސޯޓުތަކުގެ މަސައްކަތް ހަލުވި ދުވެއްޔެއްގައި ކުރިއަށް ގެންދިޔުމަށް މިިސަރުކާރުން އަންނަނީ އިންވެސްޓަރުންނަށް ބޭނުންވާ އެހީތެރިކަންވެސް ފޯރުކޮށްދެމުންނެވެ.

އަދި ދާދިފަހުން ޓޫރިޒަމްގެ ޤާނޫނަށް އަލަށް ގެނައި އިސްލާހު ވެގެންދާނީ ޓޫއަރިޒަމް ދާއިރާ ކުރިއަށް އޮތްތަނުގައި ފުޅާވެ އިންވެސްޓަރުންގެ ޝައުގުވެރިކަން ރާއްޖެއަށް އިތުރުވެގެންދާނެ ކަމަކަށެވެ.

ސަރުކާރުން ދިވެހިރާއްޖޭގެ ފަތުރުވެރިކަމުގެ ސިނާއަތު ކުރިއެރުވުމަށް އެކި ދާއިރާތަކުން ކުރަމުންދާ މުހިންމު މަސައްކަތްތަކުގެ ރަނގަޅު ނަތީޖާ ފަތުރުވެރިން ރާއްޖެއަށް އަންނަ މިންވަރުގެ ތަފާސްހިސާބުތަކުން އަންނަނީ ފެންނަމުންނެވެ. އެގޮތުން މިއަހަރުގެ މިހާތަނަށް ރާއްޖެއަށް 580،000 އަށްވުރެ ގިނަ ފަތުރުވެރިން ޒިޔާރަތްކޮށްފައިވެއެވެ. ސަރުކާރުގެ އަމާޒަކީ މިއަހަރު ނިމުމުގެ ކުރިން 2.3 މިލިއަން ފަތުރުވެރިން ރާއްޖެއަށް ގެނައުމެވެ.