އޯޓިޒަމް ހުންނަ ކުދިންނާއި ޑައުންސިންޑްރޯމް ކުދިންނަށް ކުޑައިމީސްވާ ގޮތަށް ރާއްޖެ ޓީވީ ޕްރޮގުރާމެއްގައި އެ ޕްރޮގުރާމުގެ ބައިވެރިން ދެއްކި ވާހަކަތަކުން އެކުދިންނަށް ނިކަމެތިކަމެއް ލިބިދާނެކަމަށް ގަބޫލުކުރެވޭނަމަ އެކަމާމެދު މައާފައަށް އެދޭކަމަށް އެ ޓީވީން ބުނެފިއެވެ. . 

މަަޝްހޫރު ޕްރެޒެންޓާރ ހުސައިން ރަމީޒު ހުށަހަޅައިދިން އެ ޕްރޮގްރާމްގައި ވާހަކަ ދެއްކީ ކުރީގެ ކާނަލް އަހުމަދު ފަޔާޒް އަލީ (ޕާޕާ ފަޔާޒް) އާއި ރައްޔިތުންގެ މަޖިލީހުގެ ނޮޅިވަރަމް ދާއިރާގެ ކުރީގެ މެމްބަރު މުހައްމަދު ނަޝީދު އަބްދުﷲ (މޮސްޓާ) އެވެ.

ޕާޕާ ވަނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް ފާޑު ވިދާޅުވުމަށް އޯޓިސްޓިކް ކުދިންގެ ކަރާމަތަށް އުނިކަން ލިބޭގޮތަށް ވާހަަކަ ދައްކާފައެެވެ. އެ ވާހަކައަށް ހިތްވަރު ދެއްވަމުން މޮސްޓާ ވަނީ ޑައުންސިންޑްރޮމް ހުންނަ ކުދިންނަށް ވެސް ފުރައްސާރަކޮށްފައެވެ. 

މަޖާކަމަކަމަށް ހަދައި ތިން ހޯސްޓުން ޕްރޮގްރާމްގައި އެ ކުދިންނަށް މަލާމާތްކޮށް ފުރައްސާރަކުުމުން މީސްމީޑިޔާގައި ގިނަ ބަޔަކު އަންނަނީ އެކަން ކުށްވެރިކޮށް ފާޑުކިޔަމުންނެވެ. 

އަދި މި މައްސަލަ މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓް އިން ބަލަން ފަށާފައިވާއިރު، ހިއުމަން ރައިޓްސް ކޮމިޝަން އޮފް ދަ މޯލްޑިވްސްއިން އެކަން ކުށްވެރިކޮށް ބަޔާނެއް ނެރެފައިވެއެވެ. އަދި ބްރޯޑްކާސްޓިން ކޮމިޝަނުން އަންނަނީ އެ މައްސަލަ ބަލމުންނެވެ. 

އެކަމާ ގުޅިގެން ރާއްޖެ ޓީވީން ނެރުނު ބަޔާނެއްގައި ބުނެފައިވަނީ އެޓީވީގެ "ކާލާބައިސާ" ޕްރޮގުރާމުގައި އެ ޕްރޮގުރާމުގެ ބައިވެރިން ދެއްކި ވާހަކަތަކާ ގުޅިގެން، އެ ވާހަކައަކީ އޯޓިޒަމް ކުދިންނަށް ނިކަމެތިކަމެއް ލިބިދާނެކަން ދޭހަވާ އިބާރާތަކުން ދެކެވިފައިވާ ވާކަަތަކެއްކަމަށް ބުނެ ކަންބޮޑުވުން ފާޅުކުރަމުންދާ ކަމަށެވެ. 

އަދި ރާއްޖެޓީވީން ވަގުތުން ގެނެސްދިން މި ޕްރޮގުރާމުގައި ދައްކާފައިވާ ވާހަކަތަކުން އޯޓިޒަމް ކުދިންނަށް ނިކަމެތިކަމެއް އަންނަކަމަށް އެއްވެސް ބަޔަކަށް ގަބޫލުކުރެވޭނަމަ އެކަމަށްޓަކައި އެ ޓީވީން މައާފަށް އެދޭކަމަށް އެ ބަޔާނުަގއި ބުނެފައިވެއެވެ.