ރާއްޖެ ޓީވީގެ ޕްރޮގްރާމެއްގައި ނުކުޅަދުންތެރިކަން ހުންނަ ކުދިންނަށް ފުރައްސާރަކުރި މައްސަލަ މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓް އިން ބަލަން ފަށައިފިއެވެ. 

ރާއްޖެ ޓީވީން ގެނެސްދޭ "ކާލާބައިސާ" ޕްރޮގްރާމްގައި އޯޓިސްޓިކް ކުދިންނަށް ޖޯކު ޖަހައި، ތަކުރާރުކޮށް ފުރައްސާރަކުރީ ކުރީގެ ކާނަލް އަހުމަދު ފަޔާޒް އަލީ (ޕާޕާ ފަޔާޒް) އާއި ރައްޔިތުންގެ މަޖިލީހުގެ ނޮޅިވަރަން ދާއިރާގެ ކުރީގެ މެމްބަރު މުހައްމަދު ނަޝީދު (މޮސްޓާ) އެވެ. އެ ޕްރޮގްރާމް ހުށަހެޅީ މަޝްހޫރު ޕްރެޒެންޓަރ ހުސައިން ރަމީޒެވެ. 
މިކަމާއި ގުޅިގެން މިނިސްޓްރީގެ މީޑިޔާ ގްރޫޕުގައި ނޫސްވެރިޔަކު ވަނީ މި މައްސަލަ ނުބަލާތޯ ސުވާލުކޮށްފައެވެ.  އެ ސުވާލަށް ޖަވާބު ދެއްވަމުން ޑެޕިޔުޓީ މިނިސްޓަރ މަރިޔަމް ލަހުފާ ހަލީލް ވިދާޅުވީ ނުކުޅަދުންތެރިކަން ހުންނަ ކުދިންނަށް ފުރައްސާރަ ކުރުމާއި އެކުދިންގެ އާއިލާތަކަށް ނިކަމެތިވާގޮތަށް މައުލޫމާތު ކުރުމާއި އެފަދަ ކޮންޓެންޓް ބްރޯޑްކާސްޓު ކުރުމަކީ މިނިސްޓްރީން ހިތްވަރުދޭކަމެއް ނޫންކަމަށެވެ.

އެ މައްސަލަ މީސްމީޑިޔާގައި ފެންމަތިވުމާއެކު، މިނިސްޓްރީގެ މެންޑޭޓުގެ ތެރެއިން އެކަމަށް ފިޔަވަޅު އެޅުމަށް މިހާރުވެސް ގެންދަނީ މަސައްކަތް ކުރަމުންކަމަށް އޭނާ ވިދާޅުވެފައިވެއެވެ. 

މުޖުތަމަޢުގައި ހާއްސަ އެހީތެރިކަން ބޭނުންވާ ކުދިންނަށް އެ ޕްރޮގްރާމްގައި ޖޯކު ޖެހީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާ ގުޅިވައިގެންނެވެ.

މި މައްސަލަ ބްރޯޑްކާސްޓިންގ ކޮމިޝަނުން ވެސް ބަލަން ފަށާފައެވެ.