ރާއްޖެ ޓީވީގެ ޕްރޮގްރާމެއްގައި އޯޓިސްޓިކް ކުދިންނަށް ފުރައްސާރަކޮށް، އެކުދިންގެ ކަރާމާތަށް ގެއްލުން ލިބޭނެހެން ޖޯކު ޖެހި މައްސަލަ ބްރޯޑްކޮމް އިން ބަލަން ފަށައިފިއެވެ. 

ރާއްޖެ ޓީވީން ގެނެސްދޭ "ކާލާބައިސާ" ޕްރޮގްރާމްގައި އޯޓިސްޓިކް ކުދިންނަށް ޖޯކު ޖަހައި، ތަކުރާރުކޮށް ފުރައްސާރަކުރީ ކުރީގެ ކާނަލް އަހުމަދު ފަޔާޒް އަލީ (ޕާޕާ ފަޔާޒް) އާއި ރައްޔިތުންގެ މަޖިލީހުގެ ނޮޅިވަރަން ދާއިރާގެ ކުރީގެ މެމްބަރު މުހައްމަދު ނަޝީދު (މޮސްޓާ) އެވެ. އެ ޕްރޮގްރާމް ހުށަހެޅީ ތަޖުރިބާކާރު ޕްރެޒެންޓަރ ހުސައިން ރަމީޒެވެ. 

މުޖުތަމަޢުގައި ހާއްސަ އެހީތެރިކަން ބޭނުންވާ ކުދިންނަށް އެ ޕްރޮގްރާމްގައި ޖޯކު ޖެހީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާ ގުޅިވައިގެންނެވެ. 

މައްސަލައާ ގުޅިގެން މޯލްޑިވްސް ބްރޯޑްކާސްޓިން ކޮމިޝަނުން މިރޭ ނެރުނު ސަރކިއުލާގައި ބުނެފައިވަނީ، ދިވެހި ޖުމްހޫރިއްޔާގެ ޤާނޫނު އަސާސީގެ 35 ވަނަ މާއްދާގައި ބުނާ ”ކުޑަކުދިންނާއި ޅަފުރައިގެ ކުދިންނާއި އުމުރުން ދުވަސްވީ މީހުންނާއި ހާއްސާ އެހީއަށް ބޭނުންވާ މީހުންނަށް ލިބޭ ހާއްސާ ރައްކާތެރިކަން“ އަދި ބްރޯޑްކާސްޓްކުރުމުގެ ޤާނޫނުގެ 37 ވަނަ މާއްދާގެ ދަށުން އެކުލަވާލާފައިވާ ކޯޑް އޮފް ޕްރެކްޓިސްއާ ގައިޑްލައިންތަކާ ތަޢާރަޒުވާ ކޮންޓެންޓް ބްރޯޑްކާސްޓްކުރި މަޢުލޫމާތު އެ ކޮމިޝަނުގެ ސަމާލުކަމަށް އައިސްފައިވާކަމަށެވެ. 

އެފަދަ ކޮންޓެންޓް ތަޙްޤީގުކޮށް އެކަންކަން ރަނގަޅު ކުރުމަށް ކުރަންޖެހޭ އެންމެހާ ކަންކަން ކުރުމުގެ ބާރު އެ ކޮމިޝަނަށް ލިބިގެންވާތީ، ކޮމިޝަނުގެ ސަމާލުކަމަށް އަންނަ ކޮންޓެންޓް ބަލައި ޤާނޫނުން ޖާގަދޭ އެންމެ ހަރުކަށި ފިޔަވަޅު އަޅާނެ ކަމަށް ކޮމިޝަންގެ ސަރކިއުލާގައި ބުނެފައިވެއެވެ. 

ޤާނޫނު އަސާސީ އާއި ރާއްޖޭގެ އަމަލުކުރަމުންދާ އެންމެހާ ޤާނޫނުތަކަށް އިހްތިރާމްކޮށް އެއްވެސް ފަރާތެއްގެ އަބުރާއި ކަރާމާތް ނުގެެއްލޭ ގޮތަށް ކޮންޓެންޓް އުފެއްދުމަށްވެސް ބްރޯޑްކާސްޓަރުންނަށް އިލްތިމާސް ކޮށްފައިވެއެވެ. 

ޓީވީ ޕްރޮގްރާމެއްގައި ކުދިންގެ ޙައްޤަށް އުނިކަން ލިބޭގޮތަށް ވާހަކަދެއްކުމުން ވަރަށް ބޮޑަށް ވަނީ ފާޑުކިޔުން އަމާޒުވެފައެވެ. އެގޮތުން އިސްލާމީ ކަންތައްތަކާއި ބެހޭ ވުޒާރާގެ ވަޒީރު ޑރ. މުޙައްމަދު ޝަހީމް ޢަލީ ސައީދު މީސްމީޑިއާގައި ކުރެއްވި ޕޯސްޓެއްގައި ވިދާޅުވީ އެއީ ވަރަށް ދެރަ ކަމެެއްކަމަށާއި، އެފަދަ މޭރަމަކުން ވާހަކަ ދެއްކުމަކީ ބަލައިގަނެވޭނެކަމެއް ނޫންކަމަށެވެ. އަދި، ސިޔާސީ ހިޔާލު ފާޅުކުރުމުގައި އިންސާނީ ކަރާމާތަށް އިހުތިރާމް ކުރަންޖެހޭނެކަމަށް ވަޒީރު ވިދާޅުވިއެވެ. 

ވަޒީރު ޑރ. ޝަހީމްގެ އިތުރުން ސަރުކާރުގައި ކުރިން މަސައްކަތް ކުރެއްވި އިސް ބޭފުޅުންވެސް އަންނަނީ އެ އަމަލު ހަރުކަށި އިބާރާތުން ކުށްވެރިކޮށް ހައްގު އަދަބު ދިނުމަށް ގޮވާލަމުންނެވެ.