އއ. ރަސްދޫގައި ރޭ ހިނގި އަލިފާނުގެ ހާދިސާއާ ގުޅިގެން ބަލަން ޖެހޭ ކަންކަން ބެލުމަށް ތަހުޤީޤު ފަށާފައިވާ ކަމަށް ދިވެހި ފުލުހުންގެ ޚިދުމަތުން ބުނެފި އެވެ.

އަލިފާނުގެ ހާދިސާގެ ރިޕޯޓް ފުލުހަށް ލިބުނީ ރޭ 11:15 ހާއިރު ކަމަށް ބުންޏެވެ. މި ހާދިސާގައި އެ ގޭގައި ދިރިއުޅޭ ދެ މީހަކު ޒަޚަމުވެގެން ފަރުވާ ދިނުމަށްޓަކައި މާލެ ގެނެސްފައިވާ ކަމަށާއި ފުލުހުން ގެންދަނީ މި މައްސަލަ ތަހުޤީޤު ކުރަމުން ކަމަށް ވެސް ބުންޏެވެ.

އެނގިފައިވާ ގޮތުގައި އެ ދެ މީހުންގެ ޙާލު ވެސް ވަރަށް ދެރަ އެވެ. ހަށިގަނޑުގެ ބޮޑުބައެއް ވަނީ ފިހިފަ އެވެ.

އެންމެ ބޮޑަށް ފިހިފައި ވަނީ އަންހެން މީހާ އެވެ. ލިބިފައިވާ އަނިޔާގެ ސަބަބުން ގަދަވާނެ ކަމުގެ އުންމީދު ވެސް ކުޑަ ކަމަށް ޢާއިލާއާ ޙަވާލާދީ ބައެއް ރިޕޯޓްތައް ބުނެ އެވެ.

އަލިފާނުގެ މި ޙާދިސާ ހިނގަން މެދުވެރިވި ސަބަބެއް ސާފެއް ނުވެ އެވެ. އެކަމާ ގުޅޭގޮތުން ފުލުހުންނާއި ސިފައިން ވެސް އަދި ވަކި އެއްޗެއް ނުބުނެ އެވެ.