ރާއްޖެ ޓީވީ ޕްރޮގްރާމެއްގައި އޯޓިސްޓިކް ކުދިންނަށް ފުރައްސާރަކޮށް، އެ ކުދިންގެ ކަރާމަތަށް އުނިކަން ލިބޭ ފަދަ ގޮތަކަށް ވާހަކަ ދައްކައިފިއެވެ.

މިފަދަ ގޮތަކަށް އެ ކުދިންނަށް މަލާމާތްކޮށް ވާހަކަ ދައްކާފައި ވަނީ ރާއްޖެ ޓީވީ އިން ގެނެސްދޭ "ކާލާބައިސާ" ނަމަކަށް ކިޔާ ޕްރޮގްރާމެއްގަ އެވެ.

މަަޝްހޫރު ޕްރެޒެންޓާރ ހުސައިން ރަމީޒު ހުށަހަޅައިދިން އެ ޕްރޮގްރާމްގައި ވާހަކަ ދެއްކީ ކުރީގެ ކާނަލް އަހުމަދު ފަޔާޒް އަލީ (ޕާޕާ ފަޔާޒް) އާއި ރައްޔިތުންގެ މަޖިލީހުގެ ނޮޅިވަރަމް ދާއިރާގެ ކުރީގެ މެމްބަރު މުހައްމަދު ނަޝީދު އަބްދުﷲ (މޮސްޓާ) އެވެ.

ޕާޕާ ވަނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް ފާޑު ވިދާޅުވުމަށް އޯޓިސްޓިކް ކުދިންގެ ކަރާމަތަށް އުނިކަން ލިބޭގޮތަށް ވާހަަކަ ދައްކާފައެެވެ. އެ ވާހަކައަށް ހިތްވަރު ދެއްވަމުން މޮސްޓާ ވަނީ ޑައުންސިންޑްރޮމް ހުންނަ ކުދިންނަށް ވެސް ފުރައްސާރަކޮށްފައެވެ. 

މަޖާކަމަކަމަށް ހަދައި ތިން ހޯސްޓުން ޕްރޮގްރާމްގައި އެ ކުދިންނަށް މަލާމާތްކޮށް ފުރައްސާރަކުުމުން މީސްމީޑިޔާގައި ގިނަ ބަޔަކު އަންނަނީ އެކަން ކުށްވެރިކޮށް ފާޑުކިޔަމުންނެވެ. 

އެގޮތުން އިސްލާމީ ކަންތައްތަކާއި ބެހޭ ވުޒާރާގެ ވަޒީރު، ޑރ.މުހައްމަދު ޝަހީމް އަލީ ސައީދު ވެސް ވަނީ ފޭސްބުކްގައި ޕޯސްޓެއް ކުރައްވާ އެކަން ކުށްވެރި ކުރައްވާފައެވެ. ވަޒީރު ކުރެއްވި ޕޯސްޓްގައި ވަނީ އެއީ ވަރަށް ދެރަ ކަމެެއްކަމަށާއި އެފަދަ މޭރަމަކުން ވާހަކަ ދެއްކުމަކީ ބަލައިގަނެވޭނެކަމެއް ނޫންކަމަށާއި ސިޔާސީ ހިޔާލު ފާޅު ކުރުމުގައި އިންސާނީ ކަރާމާތށް އިހުތިރާމް ކުރަންޖެހޭނެކަމަށް ވިދާޅުވެފައެވެ. 

އެމްޑީޕީން މި ރަމަޟާން މަހު މާލޭގެ މަގުތަކުގައި ކުރަމުން އައި އިހުތިޖާޖުތަކުގައި އެ ޕާޓީގެ އެކްޓިވިސްޓުންވަނީ ރައީސުލްޖުމްހޫރިއްޔާގެ ދަރިކަލުންގެ ކަރާމަތަށް އުނިކަން ލިބޭ ގޮތަށް ވާހަކަދައްކާފައެވެ. އަދި އެ ޕާޓީގެ ޗެއާޕާސަން ފައްޔާޒު އިސްމާއީލާއި މުޅި ޕާޓީން އެކަންކަމަށް ހިތްވަރުދީފައިވެއެވެ. 

އެ މައްސަލާގައި ރައީސްގެ އާއިލާއިންވަނީ އެވާހަކަދެއްކި އެމްޑީޕީ އެކްޓިވިސްޓު މަރިޔަމް ޒުބައިރާއި، ފައްޔާޒު އަދި އެމްޑީޕީގެ މައްޗަށް މަދަނީ ދައުވާކުރުމަށް ނިންމަވާފައެވެ. އެ މައްސަލަ އާއިލާގެ ފަރާތުން މިހާރު ސިވިލް ކޯޓަށް ވަނީ ހުށަަހަޅުއްވާފައެވެ.