ތެލަސީމިއާ ސެންޓަރުގެ ހިދުމަތްތަކުގެ ފެންވަރު ރަނގަޅު ކުރުމަށް ސަރުކާރުން އަޅުއްވަމުން ގެންދަވާ ފިޔަވަޅުތަކުގެ ދަށުން އެ ސެންޓަރުގެ ހިންގުން ހަރުދަނާ ކުރުމަށް އަވަސް އަދި މުހިންމު ބަދަލުތަކެއް ގެންނަވައިފި އެވެ.

ތެލަސީމިއާ ސެންޓަރުގެ ހިދުމަތްތަކުގެ ފެންވަރު ދަށްވުމުގެ ޝަަކުވާތައް ބޮޑުވެފައިވަނިކޮށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މިދިޔަ އާދިއްތަ ދުވަހު އެ ސެންޓަރަށް ޒިޔާރަތް ކުރައްވާފަ އެވެ. މި ޒިޔާރަތު ގައި އެމަނިކުފާނު ވަނީ ސެންޓަރުގެ ޙާލަތު ގާތުން ބަައްލަވާފަ އެވެ. 

ސެންޓަރުގެ އިސްވެެރީންނާ ރައީސް ބައްދަލު ކުރެއްވި އެވެ. ލިޔެކިޔުންތައް ބައްލަވާ މައްސަލަތައް ހައްލު ކުރުމަށް ކޮށްފައިވާ މަސައްކަތްތައް ޔަގީން ކުރެއްވި އެވެ. އެ ވަގުތު ސެންޓަރު ގައި ޚިދުމަތް ހޯދަން ތިބި މީހުންނާއި އާއިލާތަކާ ބައްދަލު ކުރައްވާ އެ މީހުންގެ ކަންބޮޑުވުންތައް އޮޅުންފިލުއްވެވި އެވެ. އެ މީހުން ބޭނުންވާ ބަދަލުތަކުގެ ތަފްސީލު ވެސް ހޯއްދެވި އެވެ.

ހެލްތް މިނިސްޓްރީން މިއަދު ބުނީ އެ ދުވަހުން ފެށިގެން ސީދާ ރައީސުލްޖުމްހޫރިއްޔާގެ އިރުޝާދަށް މުހިންމު ފިޔަވަޅުތަކެއް އަޅުއްވަން ފައްޓަވާފައިވާ ކަމަށެވެ. މިހާރު ހުރި މައްސަލަތައް ހައްލު ކުރެއްވުމަށް މިވަގުތަށް އަޅުއްވަން ޖެހޭ އަދި އެޅުއްވޭނެ މުހިންމު ފިޔަވަޅުތައް ސީދާ ރައީސުލްޖުމްހޫރިއްޔާ ވިދާޅުވެ ދެއްވާފައިވާ ކަމަށް އެ މިނިސްޓްރީން ބުންޏެވެ.

އެގޮތުން ނަރުހުންނާއި ލެބް ޓެކްނީޝަނުން ފަދަ ވަޒީފާތަަކަށް ބޭނުންވާ މީހުން ހޯދުމާއެކު، އެތަނަށް ބޭނުންވާ ބައެއް ވަސީލަތްތައް ލިބޭނެ މަގުފަހިކުރުމަށްވެސް އިރުޝާދުތަކެއް ދެއްވި އެވެ.

އެގޮތުން މޯލްޑިވިއަން ބްލަޑް ސާވިސަސްގެ ޑިރެކްޓާގެ މަގާމަށް އިއްޔެ ވަނީ ބޭފުޅަކު ހަމަޖައްސަވާފަ އެވެ. އެ މަގާމަށް ހަމަޖައްސަވާފައިވަނީ މެނޭޖުމެންޓު ދާއިރާގެ ތަޖުރިބާކާރެއް ކަމުގައިވާ އަޙްމަދު މަޢުޞޫމެވެ. މައުޞޫމަކީ އިންދިރާގާންދީ މެމޯރިއަލް ހޮސްޕިޓަލުގައި މަސައްކަތްކުރައްވަައި ސިއްހީ ހިދުމަތުގެ ތަޖުރިބާވެސް ހޯއްދަވާފައިވާ ބޭފުޅެކެވެ.

މީގެ އިތުރުން ޑިރެކްޓާ ޖެނެރަލްގެ އިތުރަށް ޑެޕިއުޓީ ޑިރެކްޓާ ޖެނެރަލަކާއި، ޑިރެކްޓާއެއްގެ މަގާމަށް ދެ ބޭފުޅަކު ހަމަޖެއްސުމުގެ މަަސައްކަތް ވެސް ދަނީ ކުރަމުންނެވެ.

މިއަދު ވެސް ވަނީ އެތަނުގެ ހިންގުން ހަރުދަނާ ކުރުމުގެ ގޮތުން ބައެއް ބަދަލުތައް ގެންނަވާފަ އެވެ. ބައެއް ބޭފުޅުންގެ ޒިންމާތަކަށް ވެސް ބަދަލު ގެންނަވާފައިވާ ކަން ހެލްތް މިނިސްޓްރީން ފާހަގަ ކުރެއްވި އެވެ. އެ ހުރިހާ ބަދަލުތަކެއްގެ ތަފްސީލު ވަރަށް އަވަހަށް ހާމަކުރާނެ ކަމަށް އެ މިނިސްޓްރީން ބުންޏެވެ.

އެނގިފައިވާ ގޮތުގަައި ތެލެސީމިއާ ސެންޓަރުގެ ޑިރެކްޓަރު އަހުސަން ހުސައިނާއި ބްލަޑް ބޭންކުގެ ޕަބްލިކް ހެލްތު ކޯޑިނޭޓަރު ފައިސަލް އިބްރާހީމްގެ މަގާމަށް ވަނީ ބަދަލު ގެނެސްފަ އެވެ. މިއީ ހިންގުން އިތުރަށް ހަރުދަނާ ކުރުމަށް ގެނެސްފައިވާ ބަދަލެކެވެ. 

މި ނޫން ވެސް މުހިންމު ގިނަ ބަދަލުތަކެއް ދަނީ ގެންނަމުންނެވެ.

* އެމްބީއެސް އިން ޚިދުމަތްދޭ ގަޑިތައް ހޮސްޕިޓަލެކޭ އެއް ހަމައަކަށް އިތުރު ކުރުން

* އެމްބީއެސް އަދި ޑިރެކްޓަރު ޖެނެރަލް އެއް ހަމަޖެއްސުން

* ޚިދުމަތް ރަނގަޅު ކުރުމަށް އިންޓާނަލް މެނޭޖްމަންޓަށް ގެންނަން ޖެހޭ ބަދަލުތައް ގެނައުން

* މިހާރު ދިމާވެފައިވާ ފިލްޓަރުގެ މައްސަލަތައް ހައްލުކުރުމަށް އަވަސް ފިޔަވަޅުތަކެއް އެޅުން

* ޕޭޝަންޓުންނަށް ޚިދުމަތް ދިނުމަށް ފިޒިޝަނުން (ޑޮކްޓަރުން) ހަމަޖެއްސުން

* އެމްބީއެސްގެ ބިލްޑިން ބާވެ ހަލާކުވެފައިވާތީ އިމާރާތާއި ޚިދުމަތް ބަދަލުކުުރުމުގެ މަަސައްކަތް ކުރުން

ހެލްތް މިނިސްޓްރީން ބުނި ގޮތުގައި އެމަރުކަޒަށް ފިޒީޝަނަކާއި، މިވަގުތަށް ބޭނުންވާ ފަސް ނަރުހުން ހޯދުމުގެ މަސައްކަތްވެސް މިހާރު ދަނީ ހިނގަމުންނެވެ. އަދި އިދާރީ މުވައްޒަފު ހަމަޖެއްސުމުގެ މަސައްކަތްވެސް އަންނަނީ ހިނގަމުންނެވެ.

މައްސަލަތައް ހައްލުނުކުރެވި ދިގުލައިގެން ގޮސްފައިވަނިކޮށް މިއަދު ރައީސް ނިންމެވި ނިންމެވުންތަކާއެކު މި މައްސަލަތަކަށް އެކަށީގެންވާ ހައްލުތަކެއް އަވަހަށް ލިބިގެންދާނެ ކަމުގައި ބެލެވެއެވެ.