އައިޖީއެމްއެޗްގައި 75 އެނދާއެކު އާ ވޯޑެއް ގާއިމުކުރުމުގެ މަސައްކަތް ވަރަށް ހަލުވިކޮށް ކުރިއަށްދާކަމަށާއި މި އަންނަ މަހު އެތަނުގެ ހިދުމަތް ދޭން ފަށާނެކަމަށް ޞިއްޙީ ވަޒީރު އަބްދުﷲ ނާޒިމް ވިދާޅުވެއްޖެއެވެ.

އެމްއެމްޓީވީއަށް ދެއްވި އިންޓަވިއުއެއްގައި ވަޒީރު ނާޒިމް ވިދާޅުވީ އެ މަސައްކަތުގެ ދަށުން އެނދު އިތުރުކުރެވިގެންދާއިރު އާދައިގެ ވޯޑަކާއި ޕްރައިވެޓް ރޫމުތައް ހިމެނޭނެ ކަމަށެވެ. އެނދުގެ ޖާގަ އިތުރުވުމުން ހޮސްޕިޓަލުން އެނދު ލިބުން ފަސޭހަވެ، ހިދުމަތް ހޯދާ ފަރާތްތަކަށް ލުޔަކަށްވާނެ ކަމަށް މިނިސްޓަރު ވިދާޅުވިއެވެ. 

ދަރުމަވަންތަ ހޮސްޕިޓަލުގައި ބޭނުންނުކުރެވިހުރި އޮޕަރޭޓިންގ ތިއޭޓަރުތަކުގެ ބޭނުން ހިފުމަށް ކުރަންޖެހޭ މަސައްކަތް މިހާރު ވަރަށް ހަލުވިކަމާއެކު ކުރިއަށްދާކަން ފާހަގަކުރައްވަމުން ވަޒީރު ވިދާޅުވީ އެ މަސައްކަތް ވެސް އަންނަ މަހުގެ ތެރޭގައި ނިމޭނެ ކަމަށެވެ.

މީގެ އިތުރުން، ހުޅުމާލެ ހޮސްޕިޓަލުގައި އިތުރު އޮޕަރޭޓިންގ ތިއޭޓާރުތައް ޤާއިމުކޮށްފައިވާ ކަމަށްވެސް ވަޒީރު ވިދާޅުވިއެވެ. ރައީސުލްޖުމްހުރިއްޔާ ޑރ. މުހައްމަދު މުޢިއްޒު ވެރިކަމާ ހަވާލުވެ ވަޑައިގެންނެވި އިރު ހުޅުމާލޭ ހޮސްޕިޓަލުގައި އެމަޖެންސީބައިގެ ޖާގަ ކުޑަކަށް ފާހަގަކުރައްވަމުން ވަޒީރު ވިދާޅުވީ މިހާރު އެނދު އިތުރުކުރުމުގެ މަސައްކަތް ކުރަމުންދާ ކަމަށާއި އެއް މަސް ދުވަސް ތެރޭގައި އެ މަސައްކަތް ނިމޭނެ ކަމަށެވެ.

މުޅިން އަލަށް ރާއްޖޭގައި ފާރޓިލިޓީ ސެންޓަރެއް ގާއިމުކޮށް އެ ހިދުމަތް އާސަންދަ މެދުވެރިކޮށް މިހާރު ދެމުންއަންނަކަން ނާޒިމް ފާހަގަކުރެއްވިއެވެ.

އައިޖީއެމްއެޗަކީ 350 އެނދުގެ ޖާގައިގެ ހޮސްޕިޓަލެކެވެ. އައިޖީއެމްއެޗަކީ ރާއްޖޭގެ މައި ހޮސްޕިޓަލަށްވެފައި އެ ހޮސްޕިޓަލަށް އޮތް ޑިމާންޑާ އެއްވަރަށް ހިދުމަތް ދިނުމަށް އޮތް އެންމެ ބޮޑު އެއް ދައްޗަކީ އެނދުގެ އަދަދު މަދުވުމެވެ. އެނދު އިތުރުކުރުމުގެ މަސައްކަތް ކުރިއަށްގެންދަނީ މި ކަމަށް ހައްލެއް ހޯދައިދިނުމުގެ ގޮތުންނެވެ. ރާއްޖޭގެ ޞިއްޙީ ނިޒާމު ހަރުދަނާކުރުމަށްޓަކައި ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ. އެ ގޮތުން އައިޖީއެމްއެޗްގެ އިތުރުން މާލެ ސިޓީ ގުރޫޕު އޮފް ހޮސްޕިޓަލްސްއިން ދޭ ހިދުމަތްތަކުގެ ފެންވަރު ރަނގަޅުކުރުމަށް އައު ހިދުމަތްތަކާއި ޓެކްނޮލޮޖީތައް ތައާރަފުކުރުމުގެ މަސައްކަތް ސަރުކާރުން ދަނީ ކުރައްވަމުންނެވެ.