މިދިޔަ އަހަރެކޭ އެއްގޮތަށް، ވަރަށް ފުރިހަމައަށް ޢީދު ދިއްލުމުގެ ޙަރަކާތް މި އަހަރުވެސް ކުރިއަށް ގެންދެވޭނެ ކަމަށް އުންމީދުކުރައްވާ ކަމަށް މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވޯކްސް، އާދަމް ޝަރީފު ޢުމަރު ވިދާޅުވެއްޖެއެވެ.

މިނިސްޓަރ މިފަދައިން ވިދާޅުވީ ރޭ ދައުލަތުގެ މީޑިއާއަށް ދެއްވި އިންޓަވިޔުއެއްގައެވެ. މި އިންޓަރވިޔުގައި މިނިސްޓަރ ވިދާޅުވީ، ޢީދު ދިއްލުމުގެ ޙަރަކާތަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާލޭގެ މޭޔަރުކަމުގައި ހުންނެވި އިރު ފެއްޓެވި ޙަރަކާތެއް ކަމަށެވެ. އަދި ކުލަބޮކިތަކާއި، ގިޑިގެތަކާއި، ﷲ އަކުބަރުގެ ނަޣުމާގެ އަޑުއިވޭހެން ކުރިއަށް ގެންދިޔަ މި ޙަރަކާތް ވެގެން ދިޔައީ މާލޭ ސިޓީގެ ގިނަ ބަޔަކު ބަލައިގަތް މުހިންމު ޙަރަކާތެއްގެ ގޮތުގައި ކަމަށް މިނިސްޓަރ ފާހަގަކުރެއްވިއެވެ.

ހަމައެހެންމެ އެ މަންޒަރު އޭރު ބަލަންތިބި ރަށްރަށުގެ މީހުން އެ ކަމަށް ރައީސްގެ އަރިހުން އެދިވަޑައިގަތުމުގެ ނަތީޖާއެއްގެ ގޮތުން މިދިޔަ އަހަރު އެކަން އަތޮޅުތަކަށް ފުޅާކުރެވި، މާލޭ ސިޓީގެ އިތުރުން އަތޮޅުތަކުގެ މައިރަށްރަށާއި، ސިޓީތައް ދިއްލުމުގެ ޙަރަކާތް ކުރިއަށް ގެންދެވިފައިވާ ކަމަށް ފާހަގަކުރެއްވިއެވެ. އަދި މި އަހަރުވެސް ކުރިއެކޭ އެއްގޮތަށް ޢީދަށް ދިއްލުމުގެ ޙަރަކާތް، ރަށްތައް އިތުރުކޮށް ޖުމްލަ 65 ރަށެއްގައި މި އަހަރުގެ ޢީދު ދިއްލުން ކުރިއަށް ދާނެ ކަމަށް މިނިސްޓަރ ވިދާޅުވިއެވެ.

މިނިސްޓަރ އިތުރަށް ފާހަގަކުރެއްވީ އަތޮޅުތެރޭގެ އެކިއެކި ރަށްތަކުން މިހާރުވެސް ޢީދު ލައިޓް ހޯދުމަށް ގުޅުއްވަމުންދާ ކަމަށާއި، ދިއްލުމުގެ ޙަރަކާތުގެ އިތުރުން 200 އެއްހާ ޕްރޮޖެކްޓް އެ މިނިސްޓްރީން މި އަހަރުތެރޭ ކުރިއަށް ގެންދަން ނިންމާފައިވާކަމަށެވެ.