އައްޑޫ ސިޓީގެ ކަރަންޓުގެ މައްސަލަ ހައްލުކުރަން އަނެއްކާވެސް 1.8 މެގަވޮޓުގެ ޖަނަރޭޓަރެއް ފޮނުވުމުގެ މަސައްކަތް ފަށައިފިއެވެ. 

އައްޑޫ ސިޓީގެ ގުޅިފައިވާ ރަށްތަކަށް ކަރަންޓު ޚިދުމަތް ފޯރުކޮށްދޭ ޖަނަރޭޓަރުތަކަށް މައްސަލަ ދިމާވީ އައްޑޫގެ ސެންޓްރަލް ޕަވަރ ސްޓޭޝަނުގައި ބޭނުން ކުރަމުންދާ ޖަނަރޭޓަރުތައް ޤަވާއިދުން މަރާމާތު ނުކުރުމުގެ ސަބަބުންނެވެ. 

މި މައްސަލަ ހައްލުކުރުމަށް ފެނަކައިން މީގެ ކުރިން ވެސް އައްޑޫ ސިޓީއަށް ދެ ފަހަރެއްްގެ މަތިން 1.8 މެގަވޮޓުގެ ޖަނަރޭޓަރު ގެންގޮސްފައިވެއެވެ. ފާއިތުވި 3 މަސްދުވަހުގެ ތެރޭގައި އެ ސިޓީއަށް ދެ ޖަނަރޭޓަރު ފޮނުވާފައިވާއިރު ތިންވަނަ ޖަނަރޭޓަރު މިހާރު ވަނީ މާލެއިން ފޮނުވާލާފައެވެ.

ފެެނަކައިން ބުނީ 1.8 މެގަވޮޓްގެ ޖަނަރޭޓަރު މިއަދު ހެނދުނު މާލެއިން އައްޑުއަށް ފޮނުވާފައިވާކަމަށެވެ. އެ ޖަނަރޭޓަރު މާދަމާ އައްޑޫއަށް ލިބޭނެ ކަމަށާއި، މިހާރު އައްޑޫގައި އެ ޖަނަރޭޓަރު ބެހެއްޓުމަށް ވާންޖެހޭ ތައްޔާރީތައް ވަމުން އަންނަ ކަމަށްވެސް ފެނެަކައިން ވަނީ ބުނެފައެވެ.

އައްޑޫ ސިޓީގެ ގުޅިފައިވާ ރަށްތަކަށް ދިމާވާ ކަރަންޓުގެ މައްސަލަ ހައްލުކުރުމަށް ސަރުކާރުން އަންނަނީ ގިނަގުނަ މަސައްކަތްތަކެއް ކުރަމުންނެވެ.