ENGLISH

04 އޭޕްރީލު 2025

Advertisement

އޭޓީއެމްތަކާ އެކު ރައްޔިތުން އުފަލުން؛ މާލީ މިނިވަންކަމުގެ އިހުސާސް

25 މާރިޗު 2025

|

އުމްނާ އިސްމާޢީލް

ހއ. އަތޮޅުގެ 7 ރަށެއްގައި އިއްޔެ އޭޓީއެމްގެ ޚިދުމަތް ވަނީ ފަށާފަ (ފޮޓޯ/ މިނިސްޓްރީ އޮފް ޓޫރިޒަމް އެންޑް އެންވަޔަރަމެންޓް)

ބޭންކް އޮފް މޯލްޑިވްސް (ބީއެމްއެލް)ގެ އޭޓީއެމްގެ ޚިދުމަތް ހއ. އަތޮޅުގެ 7 ރަށެއްގައި ދޭން ފެށުން ވެގެންދިޔައީ އެ ސަރަހައްދުގެ ރައްޔިތުން ކުރަމުން އައީ ދިގު އިންތިޒާރުގެ ނިމުމަކަށެވެ. މި ޚިދުމަތާ އެކު އެ ރަށްރަށުގެ ރައްޔިތުންނަށް އޭޓީއެމްތަކުން މެދުނުކެނޑި 24 ގަޑިއިރު ފައިސާ ޖަމާކުރުމާއި، ފައިސާ ނެގުމާއި، ޓްރާންސްފަރ ކުރުމާއި، ލޯނަށް ފައިސާ ދެއްކުމާއި، ކްރެޑިޓް ކާޑަށް ފައިސާ ދެއްކުމުގެ ޚިދުމަތް އެންމެ ފަހުން ލިބިގެންދާނެ އެވެ.

އޭޓީއެމްގެ ޚިދުމަތް އިއްޔެ ފެށީ ހއ. އުލިގަމާއި ތުރާކުނާއި އުތީމާއި މޮޅަދޫގެ އިތުރުން އެ އަތޮޅު ތަކަންދޫ އާއި މާރަންދޫ އަދި މުޅަދޫގަ އެވެ. މި ރަށްރަށުގައި އޭޓީއެމްގެ ޚިދުމަތް ވަރަށް އަވަހަށް ފައްޓަވާނެ ކަމަށް ރައީސުލްޖުމްހޫރިއްޔާ އިޢުލާނު ކުރެއްވީ މިދިޔަ ޖަނަވަރީ މަހުގެ ފަހުކޮޅު އެ ރަށްރަށަށް ވަޑައިގެން ވާހަކަފުޅު ދައްކަވަމުންނެވެ.

އޭޓީއެމް ހުޅުވި ސަރަހައްދަށް އައިސް ތިބި ރައްޔިތުންގެ މޫނުމަތިން ފެންނަނީ ހިތްހަމަޖެހުމާއި އުފާވެރިކަމެވެ. އެތަނަށް އައިސް ތިބި ބައެއް ރައްޔިތުންގެ ޝުއޫރަށް ބަލާލާއިރު ޒުވާނަކު ވަނީ، އޭޓީއެމްގެ ޚިދުމަތާ ނުލައި އެ ރަށުގެ ރައްޔިތުންނަށް ދިމާވި ދަތިތައް ހިއްސާކޮށްފަ އެވެ.  

" ކުރީގަ މި ރަށުގައި ވިޔަފާރިވެރިން ވެސް އަދި އިސްރަށްވެހިން ވެސް ލާރިއެއް އެއްޗެއް ނަގަން ޖެހިއްޖިއްޔާ ހަދަން ޖެހޭ ގޮތަކީ ޖެހިގެން އޮންނަ ދިއްދޫއަށް، ނޫނީ އޭޓީއެމްގެ ޚިދުމަތް ލިބޭ ރަށަކަށް ، ކޮންމެވެސް މީހެއްގެ އަތަށް ކޭޝް ކާޑު ދީގެން ނޫނިއްޔާމުން މީހަކާ ވާހަކަ ދައްކައިގެން އެކަހަލަ ގޮތަކަށް ލާރި ނަގަންޖެހެނީ.. ވަރަށް ދަތިކޮށް އުޅުނީ،" އެ ޒުވާނާ ކިޔާދިނެވެ.

އޭނާ ބުނިގޮތުގައި ވިޔަފާރިވެރިން ވެސް މުދާ ގެންނަނީ ބޯޓުގެ ކައްޕިއަށް ފައިސާ ދީގެންނެވެ. އެހެންނަމަވެސް އަލަށް އެ ރަށުގައި ގާއިމުކުރެވުނު އޭޓީއެމްގެ ޚިދުމަތާ އެކު، ފަސޭހައިން ފައިސާ ޖަމާކޮށް ނެގޭއިރު، ކުރިން ފައިސާ ނެގުމަށް ހޭދަވާ ވަގުތު ވެސް ސަލާމަތް ކުރެވޭނެ ކަމަށް އޭނާ ބުންޏެވެ.  

އެ ޚިދުމަތް ގާއިމުކުރެވުނު ރަށެއްގެ ޒުވާނަކު ހުރީ އޭޓީއެމްގެ ޚިދުމަތް ފެށުމުން އުފަލުން ފޮޅިފަ އެވެ. ހއ. މުރައިދޫގައި ހުރި އެ ޒުވާނާގެ ވާހަަކަ ފެށީ ބާރަށު ދާއިރާގެ ޕީއެންސީ މެމްބަރު އިބްރާހީމް ޝުޖާއު ވިދާޅުވާ ގޮތަށް "އެންމެން ހެޕީތޯ؟" މި ސުވާލަށް ޖަވާބުދެމުން ނެވެ.

"އާދެ މުރައިދޫ ހުރިހާ ރައްޔިތުންވެސް މިތިބީ ވަރަށް ހެޕީކޮށް. ސަބަބަކީ އަޅުގަނޑުމެންގެ ތަރައްގީއަށް އެޅުނު ބޮޅެއް މިއަދު އޭޓީއެމް ހުޅުވިގެން ދިޔުން އެއީ." އެ ޒުވާނާ ބުންޏެވެ.

އެ ރަށުގެ ދޮށީ އުމުރުގެ މީހެއް ބުނި ގޮތުގައި އެ ޚިދުމަތް ފެށުމަކީ ވަރަށް ގިނަ ބައެއްގެ ދިގު އިންތިޒާރެއްގެ ނިމުމެވެ. އޭނާ ބުނިގޮތުގައި ކުރިން 100 ރުފިޔާ ނެގުމަށްޓަކަައި 500 ރުފިޔާގެ ޚަރަދު ކުރަންޖެހެ އެވެ. އެކަން ފާހަގަކުރަމުން އޭނާ ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާއި އެމަނިކުފާނުގެ ސަރުކާރަށް ޝުކުރު ދަންނަވާފަ އެވެ.

މީގެ އިތުރުން ރައީސްގެ އަމާޒަކީ އެއްވެސް ރަށެއް ބާކީ ނުކޮށް ހުރިހާ ދިވެހިންނަށް، ރަށުގައި ތިބެގެން ބޭންކުގެ ޙިދުމަތް ލިބޭނެ އިންތިޒާމު ހަމަޖައްސައިދިނުމެވެ. އެ އަމާޒުގައި ބީއެމްއެލްގެ މަގްސަދަކީ މިއަހަރު ނިމޭއިރު ރާއްޖޭގައި 250 އޭޓީއެމް ގާއިމުކުރުމެވެ.  

ކިޔުންތެރިންގެ ހިޔާލު