ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމްއެންޔޫއެސްޔޫ) އިސްލާމީ ކަންތައްތަކާބެހޭ ވުޒާރާއާ ގުޅިގެން އައްޑޫ ސިޓީގައި "ފަލަސްޠީނު ފޯރަމް" ބާއްވައިފިއެވެ.

މި ފޯރަމް ކުރިއަށް ގެންދެވުނީ އައްޑޫ ހައި ސްކޫލުގައެވެ.

ހޮނިހިރު ދުވަހުގެ ރޭ ބޭއްވުނު މި ފޯރަމްގެ ޕެނަލިސްޓުންގެ ގޮތުގައި ބައިވެރިވެވަޑައިގަތީ އައްޝައިޚް މުޙައްމަދު އަނީލް އާއި އަޙްމަދު ނާޒިލެވެ. ފޯރަމްގައި މައިގަނޑު ތިޑު ތިން ކަމަކަށް އަލިއަޅުވާލެވުނެވެ. އެއީ:

- ފަލަސްޠީނުގެ ތާރީޚު

- ފަލަސްޠީނުގެ މިހާރުގެ ޙާލަތު

- ފަލަސްޠީނުގެ ޙައްޤުގައި ވަކާލާތުކުރުމުގެ އެކަށީގެންވާ ގޮތްތައް

ފޯރަމްގައި ބައިވެރިންގެ ފަރާތުން ހުށަހެޅުނު ސުވާލުތަކަށް ޖަވާބުދިނުމުގެ ގޮތުން ޕެނަލް ޑިސްކަޝަނަކާއި ޕްރެޒެންޓޭޝަނެއް ކުރިއަށް ގެންދެވުނެވެ. ޕްރެޒެންޓޭޝަންތައް ހުށަހެޅުއްވީ އެމްއެންޔޫގެ 10 ވަނަ ދައުރުގެ ނައިބު ރައީސް (އިތުރު ޙަރަކާތް) ސުޢައިދު ޔޫނުސް، އެ ދައުރުގެ ނައިބު ރައީސް (ޢިލްމީ) އަޙްމަދު އިޔާޒު، 12 ވަނަ ދައުރުގެ ނައިބު ރައީސް (ޢިލްމީ) މުޙައްމަދު ނާބިތު އަޙްމަދު އަދި އެމް.އެން.ޔޫ.އެސް.ޔޫ ބޮޑުބެރު ގްރޫޕްގެ ކުރީގެ މެނޭޖަރު މުޙައްމަދު ޔާސިރު މޫސާއެވެ.

މި ފޯރަމްގައި ސްކޫލް ދަރިވަރުންނާއި، ކޮލެޖް/ޔުނިވަރސިޓީތަކުގެ ދަރިވަރުންނާއި އަދި ޢާންމު ރައްޔިތުން ބައިވެރިވިއެވެ.

ފަލަސްޠީނު ފޯރަމަކީ ޢިލްމީ ނަޒަރިއްޔާތަކުން ފަލަސްޠީނުގެ މައްސަލަ އާންމުންނަށް ހާމަކޮށްދިނުމުގެ މަޤްޞަދުގައި މަތީ ތަޢުލީމް ޙާޞިލުކުރާ ދަރިވަރުންގެ ފަރާތުން ކުރިއަށް ގެންދެވުނު މިބާވަތުގެ ފުރަތަމަ ފޯރަމެވެ. އެމްއެންޔޫއެސްޔޫއިން މަޢުލޫމާތު ދެއްވާފައިވާ ގޮތުގައި މި ފޯރަމްގެ އިތުރު އެޑިޝަންތައް ކުރިއަށް އޮތް ދުވަސްތަކުގައި އެމްއެންޔޫގެ ކެމްޕަސްތަކުގައި ބޭއްވުމަށް ވަނީ ރޭވިފައެވެ.