ފީފާ ވޯލްޑް ކަޕް ކޮލިފައިންގައި ވާދަވެރި އާޖެންޓީނާއާ ދެކޮޅަށް މިރޭ ފަތިހު އެ ގައުމުގައި ކުޅެން ހަމަޖެހިފައިވާ މެޗުގެ ކުރިން، ހޫނު ބަހުސްތަކެއް ފެށޭނެ ގޮތަށް ބްރެޒިލްގެ ތަރި، ރަފީނިއާ ދެއްކި ވާހަކައިގައި އެ ޓީމު ބަލިކުރާނެ ކަމަށް ބުނެފިއެވެ.

ރަފީނިއާ މިހެން ބުނީ، ރޮމާރިއޯ ޓީވީ އަށް ދިން އިންޓަވިއުއެއްގައި ބްރެޒިލްގެ ކުރީގެ ލެޖެންޑަރީ ފޯވާޑް، ރޮމާރިއޯ ކުރި ސުވާލަކަށް ޖަވާބުދެމުންނެވެ.

ސްޕެއިނުގެ ބާސެލޯނާގައި މޮޅު ކުޅުމެއް ދައްކަމުން އަންނަ ރަފީނިއާ ބުނީ، އާޖެންޓީނާއާ ދެކޮޅަށް ކުޅުމަށް ހަމަޖެހިފައިވާ މެޗު ވެގެންދާނީ އާއްމުކޮށް ފެންނަ ވަރަށް ގިނަ، ފިޒިކަލީ ވަރަށް ވަރުގަދަ ކުރިމަތިލުންތަކެއް ފެނިގެންދާނެ މެޗެއް ކަމަށާއި، އެ މެޗުގައި އޭނާ ލަނޑުޖަހާނެ ކަމަށެވެ.

"އަހަރެމެން، އެމީހުން ބަލިކުރާނަން... ދަނޑުމަތީގައި ވިޔަސް، ދަނޑުބޭރުގައިވިޔަސް އެކަން ކުރާނަން،" ރަފީނިއާ ބުންޏެވެ.

ރަފީނިއާ ބުނީ، އާޖެންޓީނާ ކޮޅަށް އޭނާ ލަނޑުޖަހާނެ ކަމަށާއި، އެންމެ ރަނގަޅު ފޯމުގައި އެ ޓީމާ ދެކޮޅަށް ނިކުތުމަށް ކެތްމަދުވެފައިވާ ކަމަށެވެ.

ރަފީނިއާ ދެއްކި ވާހަކަތަކުގެ ސަބަބުން އާޖެންޓީނާގައި ހަލަބޮލިކަން އުފެދިފައިވާއިރު، އެ ގައުމުގެ މީޑިއާތަކުން ވެސް އެ ވާހަކަތައް ސިފަކޮށްފައިވަނީ 'އެކަށީގެންނުވާ ބަސްތަކެއް' ގެ ގޮތުގައެވެ.

ނަމަވެސް، ރަފީނިއާގެ ވާހަކަތަކަށް ރައްދުގައި ޖަވާބެއް ދިނުމުގެ ބަދަލުގައި އާޖެންޓީނާގެ ކޯޗު، ލިއޮނަލް ސްކަލޯނީ ހިޔާރުކުރީ، ދެ ގައުމުގެ މެދުގައި އޮތް ވާދަވެރިކަމުގެ ސަބަބުން މަސްރަހު އިތުރަށް ގޯސްވިޔަނުދިނުމަށެވެ.

އެގޮތުން، ސްކަލޯނީ ބުނީ، އެ ދެ ޓީމަކީ ދަނޑުމަތީގައި ހަނގުރާމަވެރިންގެ ގޮތުގައި ފެނުނުނަމަވެސް، ދަނޑުބޭރުގައި އެއީ ރަހުމަތްތެރީން ކަމަށެވެ.

ސްކަލޯނީ އިތުރަށް ބުނީ، ކުޅުންތެރިން ދައްކާ ވާހަކަތަކަށް އޭނާ މާބޮޑު ސަމާލުކަމެއް ދޭން ބޭނުންނުވާ ކަމަށާއި، އާޖެންޓީނާއާ ބްރެޒިލް ބައްދަލުކުރުމަށް ހަމަޖެހިފައިވާ މެޗަކީ މުހިއްމު މެޗެއް ކަމަށެވެ.

އަދި، އެ މެޗަކީ ހަމައެކަނި ފުޓްބޯޅަ މެޗެއްގެ ގޮތުގައި ބެލުމަށާއި، އެ ނޫން ގޮތަކަށް އެ މެޗާ މެދު ދެކެން ނުޖެހޭ ކަމަށް ވެސް ސްކަލޯނީ ބުންޏެވެ.

ސްކަލޯނީގެ އިތުރަށް ބުނީ، ކުރިއަށް އޮތް މެޗަކީ އާޖެންޓީނާއާ ބްރެޒިލުން ވެސް ކާމިޔާބުކުރަން ބޭނުންވާނެ މެޗެއް ކަމަށެވެ. އަދި، ދެ ގައުމުގައި ވެސް އެއް ބަޔަކު އަނެއް ބަޔަކާ ގާތް ގުޅުމެއް އުފެދިފައިވާ ރައްޓެހީން ތިބިއިރު އެއަށްވުރެ ގުޅުން ގޯސްވާނެ ފަދަ އަމަލުތަކާ ދުރުހެލިވާން ޖެހޭ ކަމަށް ވެސް ސްކަލޯނީ ވަނީ ބުނެފައެވެ.

މި ދެ ޓީމުގެ މެދުގައި ކުޅުނު މެޗަކުން ބްރެޒިލް އެންމެ ފަހުން މޮޅުވެފައިވަނީ މީގެ ހައެއްކަ އަހަރު ކުރީންނެވެ. އަދި، އާޖެންޓީނާގައި ކުޅެގެން އެ ޓީމުގެ މައްޗަށް ބްރެޒިލަށް ކުރިނުހޯދޭތާ ވެސް މިހާރު 16 ވަރަކަށް އަހަރުވެއްޖެއެވެ.

އާޖެންޓީނާއިން މިރޭ ބްރެޒިލް ބަލިކޮށްފި ނަމަ އަންނަ އަހަރު އުތުރު އެމެރިކާގައި އޮންނަ ފީފާ ވޯލްޑް ކަޕްގެ ޖާގައެއް ޔަގީންވާނެއެވެ.

އާޖެންޓީނާއާ ބްރެޒިލް ބައްދަލުކުރާ މެޗު ކުޅޭނީ ރާއްޖޭގަޑިން މިރޭ ފަތިހު 5 ޖަހާއިރު އެވެ.