ތޯމަސް ޓުޗެލްގެ އިރުޝާދުގެ ދަށުން އިނގިރޭސި ގައުމީ ފުޓްބޯޅަ ޓީމު ކުޅުނު ދެވަނަ މެޗުގައި ލެޓްވިއާ އަތުން 3-0 އިން އެ ޓީމު މޮޅުވެއްޖެއެވެ.

މި މޮޅާއެކު، އިންގްލެންޑް ވަނީ ޔޫރަޕްގެ ކޮލިފިކޭޝަން ގްރޫޕު ކޭގެ އެއްވަނައިގައި ދެ މެޗުން ހޯދި ހަ ޕޮއިންޓާއެކު އެވެ. ދެވަނައިގައި އުޅެނީ ތިން ޕޮއިންޓާއެކު އަލްބޭނިއާ އެވެ. ލެޓްވިއާ އަށް ތިން ޕޮއިންޓާއެކު ތިންވަނަ ލިބެނީ ފައިދާ ގޯލްގެ ތަފާތުންނެވެ.

ވެމްބްލީ ސްޓޭޑިއަމްގައި ކުޅުނު މެޗުގައި އިންގްލެންޑުން ލީޑު ނެގީ ފުރަތަމަ ހާފު ނިމެންދަނިކޮށް، ލިބުނު ހިލޭޖެހުމަކުން ޗެލްސީގެ ކެޕްޓަން، ރީސް ޖޭމްސް ކާމިޔާބުކޮށްދިން ލަނޑުންނެވެ.

މިއީ 2022 ވަނަ އަހަރުގެ ފަހުން އިންގްލެންޑް ޓީމުގެ ފުރަތަމަ އެގާރައިގައި ހިމެނިގެން ޖޭމްސް ކުޅުނު ފުރަތަމަ މެޗެވެ. އަދި، މިއީ ގައުމީ ޓީމަށް އޭނާ ޖަހައިދިން ފުރަތަމަ ގޯލު ވެސް މެއެވެ.

ދެވަނަ ހާފުގައި އިންގްލެންޑްގެ އަނެއް ދެ ލަނޑު ޖަހައިދިނީ ކެޕްޓަން، ހެރީ ކޭން އާއި ބަދަލަކަށް ކުޅެން ނިކުތް އެބެރޭޗީ އެޒޭ އެވެ.

މެޗަށްފަހު ވާހަކަ ދައްކަމުން ޓުޗެލް ބުނީ، ނަތީޖާ ކޮންމެ ގޮތަކަށް ފެނުނު ނަމަވެސް މެޗު ފަސޭހަ ނޫން ކަމަށެވެ.

އޭނާގެ ޓީމުގެ ފަރާތުން ގިނަ ކަންތައްތަކެއް ފެނިގެންދިޔަ ކަމަށާއި، ޚާއްސަކޮށް ލަނޑު ޖަހާނެ ރަނގަޅު ފުރުޞަތުތަކެއް ތަނަވަސްކުރި ކަމަށް ވެސް ޓުޗެލް ބުންޏެވެ.

ވޯލްޑް ކަޕް ކޮލިފައިންގައި ރޭ ކުޅުނު އެހެން މެޗުތަކުގެ ނަތީޖާއަށް ބަލާއިރު، ޕޮލެންޑުން ވަނީ 2-0 އިން މޯލްޓާ ބަލިކޮށްފައެވެ. އަމިއްލަ ދަނޑުގައި ސައިޕްރަސް އަތުން ބޮސްނިއާ އެންޑް ހާޒެގޮވީނާ މޮޅުވީ 2-1 އިންނެވެ.