ENGLISH

04 އޭޕްރީލު 2025

Advertisement

މިފެށޭ ދިރާސީ އަހަރު ގްރޭޑް 1 އަށް 5،700 ކުދިން

25 މާރިޗު 2025

|

މަރިޔަމް މިލްޒަމް މަސްޢޫދު

ކުރިއަށް އޮތް ދިރާސީ އަހަރު، ގްރޭޑް 1 އަށް ވަނުމަށް 5،700 އަށްވުރެ ގިނަ ދަރިވަރުން ފޯމު ހުށަހަޅާފައިވާކަމަށް އެޑިއުކޭޝަން މިނިސްޓްރީން ހާމަކޮށްފިއެވެ.

އަންނަ މަހުގެ 6 ވަނަ ދުވަހު ފެށޭ ދިރާސީ އާ އަހަރަށް ގްރޭޑް 1 ގެ ޖާގައަށް އެދި ފޯމު ހުށަހެޅުމުގެ ފުރުޞަތު ހުޅުވާލީ މިދިޔަ އަހަރުގެ އޮގަސްޓު 15 ގައެވެ.

ކުރީގެ އަހަރުތަކެކޭ އެއްފަދައިން، މި އަހަރުވެސް އެންމެ ގިނަ ފޯމު ހުށަހެޅިފައިވަނީ މާލެ ސަރަހައްދުގެ ސްކޫލްތަކަށެވެ.

އެޑިއުކޭޝަން މިނިސްޓްރީން މައުލޫމާތުދިން ގޮތުގައި، ގްރޭޑް އެކަކަށް ވަނުމަށް އަލަށް ފޯމު ހުށަހެޅި 5،700 އަށްވުރެ ގިނަ ދަރިވަރުންނަށް ޖާގަ ހަމަޖައްސައިދެވިފައިވާ ކަމަށެވެ.

އޭގެ ތެރެއިން މާލެ ސަރަހައްދުގެ ސްކޫލްތަކަށް އެކަނި ވެސް ދެ ހާހަކަށް ދަރިވަރުން ޖާގައަށް އެދިފައިވާކަމަށް އޭނާ ފާހަގަކުރެއްވިއެވެ.

ކުރީގައި ގްރޭޑް 1 އަށް ޖާގަ ދެވެމުން އައީ އެ އަހަރެއްގެ ޖެނުއަރީ މަހުގެ އެއްވަނަ ދުވަހަށް ހަ އަހަރު ފުރި ހަތް އަހަރު ނުފުރޭ ދަރިވަރުންނަށެވެ. ނަމަވެސް ދިރާސީ އަހަރު އޯގަސްޓުގައި ފެށުމަށް ބަދަލުކުރެވުމާ ގުޅިގެން، މިދިޔަ ދެ އަހަރު ގްރޭޑް 1 އަށް ވައްދާފައިވަނީ ޑިސެމްބަރުގެ ނިޔަލަށް ހަތް އަހަރު ފުރިފައިވާ ދަރިވަރުންނެވެ.

މި ސަރުކާރުން ދިރާސީ އާ އަހަރަށް ގެންނަން ނިންމާފައިވާ ބަދަލާ އެކު، 2024 ގެ ދިރާސީ އަހަރު ނިމުނީ ފެބްރުއަރީ މަހުގައެވެ.

އަދި ދިރާސީ އަހަރު ސްކޫލަށް ކުދިން ވެއްދުމާއި އެއް ސްކޫލުން އަނެއް ސްކޫލަށް ދަރިވަރުން ބަދަލުކުރުމުގައި އަމަލުކުރާނެ ގޮތާ ގުޅޭގޮތުން ޖެނުއަރީގައި މިނިސްޓްރީން ނެރުނު ސާކިއުލާގައިވާ ގޮތުން، ގްރޭޑް 1 އަށް ވެއްދުމުގައި ބަލާފައިވަނީ މިދިޔަ އަހަރުގެ ޑިސެމްބަރު 31 ގެ ނިޔަލަށް ހަ އަހަރު ފުރި ހަތް އަހަރު ނުފުރޭ ކުދިންނަށެވެ.

މި ބަދަލާ ގުޅިގެން، 2024-2025 ދިރާސީ އަހަރުގައި އެލްކޭޖީ ފުރިހަމަކުރާ ދަރިވަރުންނަށް އަންނަ އަހަރު ގްރޭޑް 1 އަށް ވަނުމުގެ ފުރުޞަތު ލިބިގެންދާނެއެވެ.

ކިޔުންތެރިންގެ ހިޔާލު