އިސްލާމީ ކުޠުބުޚާނާ އަލުން ހުޅުވާ ހުރިހާ އިސްލާމިކް ސެންޓަރުތަކެއްގައި ލައިބްރަރީ ޤާއިމު ކުރަން ނިންމައިފި އެވެ.

އެކަން އިސްލާމީ ކަންތައްތަކާ ބެހޭ ވުޒާރާގެ ވަޒީރު, ޑރ. މުޙައްމަދު ޝަހީމް ޢަލީ ސަޢީދު މިއަދު ވަނީ ހާމަ ކުރައްވާފަ އެވެ.

އިސްލާމީ މަރުކަޒުގައި ކުރިން ހުރި އިސްލާމީ ކުޠުބުޚާނާ އަކީ ރާއްޖޭގައި ހުރި އެންމެ ބޮޑު އިސްލާމީ ލައިބްރަރީ އެވެ. ނަމަވެސް ވަޒީރު, ޝަހީމް ވިދާޅުވި ގޮތުގައި އެ ލައިބްރަރީ މިހާރު ހުރީ ނެތިވެ ގޮސްފަ އެވެ.

އަދި ހަޤީޤީ ލައިބްރަރީ ނެތި 10 ވަރަކަށް އަހަރު ފާއިތުވެއްޖެ ކަމަށް ވިދާޅުވި އެވެ.

ވަޒީރު ވިދާޅުވީ ރާއްޖޭގެ އިސްލާމީ ކުތުބުޚާނާ ހުޅުވުމުގެ މަަސައްކަތް ދަނީ ކުރައްވަމުންނެވެ. މި ފަހަރު ލައިބްރަރީ ޤާއިމު ކުރައްވަން ނިންމަވާފައި ވަނީ ސަލްމާން ސެންޓަރު ގަ އެވެ. އަދި ވިދާޅުވީ އަންނަ މޭ މަހު ސަލްމާން ސެންޓަރުގައި އެ ކުތުބުޚާނާ ހުޅުވިގެންދާނެ ކަމަށެވެ. މިކަމަށް ވާންޖެހޭ އެންމެހައި ތައްޔާރީތައް ދަނީ ނިމެމުން ކަމަށް ވިދާޅުވި އެވެ.

އަދި ވިދާޅުވީ ހުރިހާ އިސްލާމިކް ސެންޓަރެއްގައި ކުތުބުހާނާ ހުޅުވިގެންދާނެ ކަމަށެވެ. އެ މަަސައްކަތް މި އަހަރު ނިންމަވާނެ ކަމަށް ވެސް ވިދާޅުވި އެވެ.