ENGLISH

04 އޭޕްރީލު 2025

Advertisement

ހއ. ގެ ހުރިހާ ރަށެއްގައި އޭޓީއެމްގެ ޚިދުމަތް ފެށުން، ވަކި ރަށެއް ތަފާތުނުކޮށް ރައްޔިތުންނާ ގާތުން ބޭންކުގެ ޚިދުމަތް ލިބުމަކީ ބޮޑު ލުޔެެއް: ސައީދު

24 މާރިޗު 2025

|

އަޙުމަދު ޙަމީދު

ހއ. ގެ ހުރިހާ ރަށެއްގައި އޭޓީއެމްގެ ޚިދުމަތް ފެށުމުގެ ތެރެއިން -- ފޮޓޯ/ ބީއެމްއެލް

ރާއްޖޭގެ ހުރިހާ ރަށެއްގައި އޭޓީއެމް ބަހައްޓާ ބެންކުގެ ޚިދުމަތް ފެށުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނިންމެވި ނިންމެވުމަށް ތަޢުރީފު ކުރައްވާ ރައްޔިތުންނާއި ގާތުން ބޭންކުގެ ޚިދުމަތް ލިބުމަކީ ބޮޑު ލުޔެެއް ކަމަށް އިކޮނޮމިކް މިނިސްޓަރު މުޙައްމަދު ސަޢީދު މިއަދު ވިދާޅުވެއްޖެ އެވެ.

މިނިސްޓަރު ސަޢީދު މިހެން ވިދާޅުވީ ހއ. އަތޮޅުގެ  ހަތް ރަށެއްގައި އޭޓީއެމްގެ ޚިދުމަތް މިއަދު ފެށުމާއި ގުޅިގެން އެކްސް ގައި ކުރެއްވި ޕޯސްޓެއްގަ އެވެ. 

އޭޓީއެމްގެ ޚިދުމަތް މިއަދު ފެށީ ހއ. އުލިގަމާއި ތުރާކުނާއި އުތީމާއި މޮޅަދޫގެ އިތުރުން އެ އަތޮޅު ތަކަންދޫ އާއި މާރަންދޫ ގަ އެވެ. މި ރަށްރަށު ގައި އޭޓީއެމްގެ ޚިދުމަތް ވަރަށް އަވަހަށް ފައްޓަވާނެ ކަމަށް ރައީސުލްޖުމްހޫރިއްޔާ އިޢުލާނު ކުރެއްވީ މިދިޔަ ޖަނަވަރީ މަހުގެ ފަހުކޮޅު އެ ރަށްރަށަށް ވަޑައިގެން ވާހަކަފުޅު ދައްކަވަމުންނެވެ.

ސަޢީދު ވިދާޅުވީ ރައީސް ޑރ މުޢިއްޒު ހއ. އަތޮޅުގެ މި ފަސް ރަށުގެ ރައްޔިތުންނަށް ވެވަޑައިގެންނެވި އޭޓީއެމް ވަޢުދު މިއަދު މިވަނީ ފުއްދަވާފައި ކަމަށެވެ. އަދި ވިދާޅުވީ ކުޑަރަށެއް ބޮޑުރަށެއް ބާކީނުވެ، ރައްޔިތުންނާއި ގާތުން ބޭންކުގެ ޚިދުމަތް ލިބުމަކީ ބޮޑު ލުޔެެއް ކަމަށެވެ.

"މިކަމަށް ރައީސް ދެއްވި އިސްކަމާއި، ބޭންކުގެ މިންނެތް މަސައްކަތަށް ވަރަށް ޝުކުރު،" ސަޢީދު ވިދާޅުވި އެވެ.

މިނިސްޓަރު ވިދާޅުވި ގޮތުގައި އޭޓީއެމްގެ ޚިދުމަތް ފެށުމާއެެކު މި ރަށްރަށުގެ ރައްޔިތުންނާއި މުޅި ހއ. ގެ ހުރިހާ ރައްޔިތުންވެސް މިއަދު އުފާކުރެ އެވެ. މިއަދު ޚިދުމަތް ފެށުނު ރަށްރަށާއެކު މުޅި އަތޮޅަށް ބެންކުގެ އޭޓީއެމް ޚިދުމަތް ލިބިގެން ދިޔަކަން ފާހަގަ ކުރައްވާ ވިދާޅުވީ ރައީސް ޑރ. މުޙައްމަދު މުޢިއްޒުގެ އަވަސް ފިޔަވަޅުތަކަށް ޝުކުރު ޙައްޤު ކަމަށެވެ.

"ވަޢުދު ފުއްދަވައިފި. ބީއެމްއެލްގެ މެނޭޖްމަންޓާއި ސްޓާފުންގެ ބުރަމަސައްކަތް ފާހަގަކޮށް ޝުކުރު އަދާކުރަން،" މިއަދު ހޯދުނު ކާމިޔާބީ ފާހަގަ ކުރައްވާ މިނިސްޓަރު ސައީދު ވިދާޅުވި އެވެ.

ކިޔުންތެރިންގެ ހިޔާލު