މި އަހަރުގެ ރަމަޟާން މަހުގެ 20 ދުވަހުގެ ތެރޭގައި ޒަކާތު ހައުސްއަށް ފިތުރު ޒަކާތުގެ ގޮތުގައި 7.6 މިލިޔަނަށް ވުރެ ގިނަ ރުފިޔާ ލިބިއްޖެއެވެ.

މޯލްޑިވްސް ޒަކާތު ހައުސްއިން ބުނީ ރަމަޟާން މަހުގެ ފުރަތަމަ 20 ދުވަހު ޒަކާތު ހައުސްގެ ކައުންޓަރުތަކުންނާއި އޮންލައިން ޕްލެޓްފޯމްތަކުން 7,632,214.03 ރުފިޔާ ބަލައިގެންފައިވާ ކަމަށެވެ. މިއީ ފާއިތުވެދިޔަ އަހަރުތަކާ އަޅާބަލާއިރު ރެކޯޑު އިތުރުވުމެކެވެ.

މިދިޔަ އަހަރު މި މުއްދަތުގައި ޒަކާތުގެ ގޮތުގައި ލިބިފައި ވަނީ 4,674,062.00 ރުފިޔާ އެވެ. އޭގެ ކުރީ 2023 ވަނަ އަހަރު 4,687,391.00 ރުފިޔާ އަދި 2022 ވަނަ އަހަރު 3,778,261.00 ރުފިޔާ ލިބިފައިވެ އެވެ.

މޯލްޑިވްސް ޒަކާތު ހައުސްއިން ބުނީ ރަމަޟާން މަހުގެ ފުރަތަމަ 10 ދުވަހު ޒަކާތު ހައުސްގެ ކައުންޓަރުތަކުންނާއި އޮންލައިން ޕްލެޓްފޯމްތަކުން 4,718,374.42 ރުފިޔާ ބަލައިގެންފައިވާ ކަމަށެވެ. މިއީ ފާއިތުވެދިޔަ އަހަރުތަކާ އަޅާބަލާއިރު ރެކޯޑު އިތުރުވުމެކެވެ.

މިދިޔަ އަހަރު މި މުއްދަތުގައި ޒަކާތުގެ ގޮތުގައި ލިބިފައި ވަނީ 3,072,853.00 ރުފިޔާ އެވެ. އޭގެ ކުރީ 2023 ވަނަ އަހަރު 3,293,684.00 ރުފިޔާ އަދި 2022 ވަނަ އަހަރު 2,685,714.00 ރުފިޔާ ލިބިފައިވެ އެވެ.

ޒަކާތު ހައުސްއިން މައުލޫމާތުދޭ ގޮތުގައި ބަނޑޭރި ޕޭ އަދި ފަހިޕޭ މެދުވެރިކޮށް ރަމަޟާންމަހުގެ އެންމެ ފަހު ދުވަހާހަމައަށްވެސް ފިތުރު ޒަކާތް ދެއްކޭނެއެވެ. ނަމަވެސް މިރަމަޟާންމަހުގައި އޮންލައިންކޮށް ޒަކާތް ބަލައިގަންނަމުންދާ އެހެން އޮންލައިން ޕްލެޓްފޯމްތަައް ކަމުގައިވާ ދިރާގު އެޕް/ ދިރާގު ޕޭ (ވެބްސައިޓް)، އުރީދޫ، އެމް ފައިސާ (އެޕްލިކޭޝަން)، މޯލްޑިވްސް އިސްލާމިކް ބޭންކު (އެޕްލިކޭޝަން) އަދި ބޭންކް އޮފް މޯލްޑިވްސް މޯބައިލް އެޕްލިކޭޝަނުން ޒަކާތް ދެއްކޭނީ ރަމަޟާންމަހުގެ 27 ވަނަ ދުވަހުގެ ހެނދުނު 6 ޖެހުމުގެ ނިޔަލަށެވެ.

އުމުރުން ދުވަސްވީ މީހުންނާއި އޮންލައިންކޮށް ޒަކާތް ދެއްކުމަށް އަހުލުވެރިނޫން ފަރާތްތަކަށް ޚާއްސަކޮށް އިސްލާމީ މަރުކަޒުގެ ޖަލްސާކުރާ މާލަމުގައި ޒަކާތް ބަލައިގަތުމުގެ އިންތިޒާމް ވަނީ ހަމަޖައްސާފައެވެ. އަދި ރަށްރަށުގައި ނަޤުދު ފައިސާއިން ފިތުރު ޒަކާތް ބަލައިގަތުމުގެ އިންތިޒާމްތައް އެރަށެއްގެ ރަށު އަދި ސިޓީ ކައުންސިލުން ވަނީ ހަމަޖައްސާފައެވެ. އަދި ގޮވާމުގެ ބާވަތްތަކުން ޒަކާތް ބަލައިގަތުން، އަންނަ ހޮނިހިރު ދުވަހު ފަށާނެކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވެފައިވެއެވެ.

ދިވެހިރާއްޖޭގެ ޒަކާތު ހައުސް އަކީ، ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު 2023 ގައި ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 116 ވަނަ މާއްދާއިން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުން، ދިވެހިރާއްޖޭގެ ޒަކާތުގެ ނިޒާމު ހަރުދަނާކުރުމުގެ މަސައްކަތާއި، ޒަކާތުގެ ނަފާ އޭގެ ބެހެނިވެރިންނަށް ފުޅާ ދާއިރާއެއްގައި ލިބޭނެގޮތަށް ޒަކާތު ފަންޑު ތަރައްޤީކުރުމުގެ މާތް މަޤްސަދުގައި އިސްލާމީ ކަންތައްތަކާ ބެހޭ ވުޒާރާގެ ދަށުން އުފެއްދެވި އިދާރާއެކެވެ. 

ޒަކާތު ހައުސް އުފެދުނު ފަހުން، އެއިދާރާއިން ފާއިތުވެ ދިޔަ ކުރު މުއްދަތުގައި ކޮއްފައިވާ އަގުހުރި މަސައްކަތްތައް ތަފާސް ހިސާބުތަކުން ހާމަވެގެންދެއެވެ. ފިތުރު ޒަކާތުގެ އިތުރުން ރާއްޖޭގައި މުދަލު ޒަކާތް ދައްކާ މިންވަރުވެސްދަނީ އިތުރުވަމުންނެވެ. އެގޮތުން މީރާގެ ތަފާސް ހިސާބުތަކަށް ބަލާލާއިރު 2024 ވަނަ އަހަރު މުދަލު ޒަކާތުގެ ގޮތުގައި ލިބިފައިވާ 101.9 މިލިއަން ރުފިޔާއަކީ ރާއްޖޭގެ ތާރީހުގައި މުދަލު ޒަކާތުގެ ގޮތުގައި އެއް އަހަރު ތެރޭގައި ލިބުނު އެންމެ ގިނައަދަދެވެ.

ޒަކާތުގެ ނިޒާމު ހަރުދަނާކޮށް ފުޅާކުުރުމަށްޓަކައި ޒަކާތު ހައުސް އުފެއްދެވި ދުވަހުން ފެށިގެން، ޒަކާތު ހައުސްއިން ކުރި މަސައްކަތްތަކުން ރައްޔިތުންނާއި ޤައުމަށް ބޮޑެތި މަންފާތަކެއް ލިބިފައިވާކަމަށް ރައީސް ޑރ. މުޢިއްޒުގެ ރިޔާސީ ބަޔާނުގައިވެސް ފާހަގަކުރައްވާފައިވެއެވެ.