ENGLISH
04 އޭޕްރީލު 2025
އަންނަމަހު ނ. ވެލިދޫގައި ޑަޔަލިސިސްގެ ހިދުމަތްދޭން ފަށަނީ: މިނިސްޓަރ ނާޒިމް
24 މާރިޗު 2025
|
މަސްނޫއީ ޑަޔަލިސިސް މެށިނު، އިންސާނެއްގެ ލޭ ސާފުކޮށްދެނީ--ފޮޓޯ: ގެޓީ އިމޭޖްސް
އެންމެ މަޤްބޫލު
ރައީސުލްޖުމްހޫރިއްޔާ ޑރ. މުޙައްމަދު މުޢިއްްޒުގެ އިސްނެންގެވުމުގެ ދަށުން، ރާއްޖޭގެ ރަށްރަށުގައި ޑަޔަލިސިސްގެ ހިދުމަތް ފުޅާކުރުމަށް ކުރައްވާ މަސައްކަތުގެ ތެރެއިން އަންނަމަހު، ނ. ވެލިދޫގައި މި ހިދުމަތް ދެވޭނެ އިންތިޒާމު ހަމަޖެހިގެންދާނެ ކަމަށް ހެލްތު މިނިސްޓަރ އަބްދުﷲ ނާޒިމް އިބްރާހިމް ވިދާޅުވެެއްޖެއެވެ. މިނިސްޓަރ މިހެން ވިދާޅުވީ އެމްއެމްޓީވީއަށް ދެއްވި އިންޓަވިއުއެއްގައެވެ.
ދިވެހިރާއްޖެ އަކީ އާބާދީގެ ނިސްބަތުން ގައިންގަޔަށް ނާރާބަލިތައް ޖެހިފަވާ މީހުންގެ އާބާދީ ބޮޑު ގައުމެކެވެ. ސިއްހީ ދާއިރާގެ ތަފާސްހިސާބުތަކަށް ބަލާއިރު ދިވެހިރާއްޖޭގެ ގިނަ ބަޔަކު ކިޑްނީގެ ބަލިތައް ތަހައްމަލު ކުރަމުންދެއެވެ. ކިޑްނީގެ ބަލިތައް ތަހައްމަލު ކުރަމުންދާ މީހުންގެ ނިސްބަތުން ބޮޑު އިންސައްތައެއް ޑަޔަލިސިސްގެ ހިދުމަތް ގަވާއިދުން ހޯދަންޖެހެއެވެ. ބައެއްމީހުން ކޮންމެ ދުވަހަކުވެސް، މި ހިދުމަތް ހޯދަން ޖެހެ އެވެ.
ރާއްޖޭގައި ޑަޔަލިސިސްގެ ހިދުމަތް ފޯރުކޮށްދެވޭ ގޮތައް ތަރައްގީ ކުރެވިފައިވާ ހޮސްޕިޓަލުތަކާއި ސިއްހީ މަރުކަޒުތައް މަދުވުމާއި އެކަށީގެންވާ ވަސީލަތްތައް ނެތުމުގެ ސަބަބުން ޑަޔަލިސިސް ހަދަންޖެހޭ ފަރާތްތަކަށް އިތުރު ތަކުލީފު ތަކަކާ ކުރިމަތިލާންޖެހެއެވެ. އަމިއްލަ ރަށުން ނުވަތަ އަތޮޅުން މި ހިދުމަތް ލިބޭނެ ގޮތެއް ނެތުމުން، ހިދުމަތް ހޯދުމަށް ބޮޑެތި ހަރަދުތައްކޮށް ދިގު ދަތުރުތަކެއް ކުރަން ޖެހެއެވެ. ބައެއް މީހުންގެ މުޅި ދިރިއުޅުން، ޑަޔަލިސިސްގެ ހިދުމަތް ލިބޭ ރަށަކަށް ބަދަލުކުރަން ޖެހިފައިވެސް ވެ އެވެ.
އެފަދަ މީހުންގެ ތަކުލީފުތަކަށް ލުޔެއް ހޯދައިދިނުމަށް މިސަރުކާރު އައި ފަހުން ރާއްޖޭގެ އެކި ހިސާބުތަކުގައި ޑަޔަލިސިސްގެ ހިދުމަތް އަލަށް ފަށާ އަދި މިހިދުމަތް އިތުރަށް ތަރައްގީކުރުމުގެ މުހިންމު މަސައްކަތްތަކެއް ދަނީ ކުރިއަށެވެ.
"ޑަޔަލިސިސްގެ ހިދުމަތް ހޯދަންޖެހޭ މީހުން ގިނަ ރަށްރަށަށް ބައްލަވައިގެން، މި ހިދުމަތް ފުޅާކުރުމުގެ މަސައްކަތް ކުރެވިގެންެބަދޭ، އެގޮތުން ހއ. އިހަވަންދޫގައި ވަރަށް ފަހުން މިހިދުމަތް ފަށައިފިން، ނ. އަތޮޅުގައި ޑަޔަލިސިސްގެ އެނދު އިތުރުކޮށްފިން، ގއ. ވިލިނގިލީގައިވެސް މިހާރު ޑަޔަލިސިސްގެ ހިދުމަތް ދެވެމުންދާނެ، އިރާދަކުރެއްވިއްޔާ ކުރިޔަށް އޮތް މަސްދުވަސް ތެރޭޭގައި ނ. ވެލިދޫގައިވެސް މިހިދުމަތް ފެށިގެންދާނެ،" މިނިސްޓަރ ނާޒިމް.
ހއ. އިހަވަންދޫގައި ޑަޔަލިސިސްގެ ހިދުމަތްފެށުމަށް ބޭއްވުނު ރަސްމިއްޔާތަށް ފަހު ފަސްޓްލޭޑީ އަދި ހެލްތު މިނިސްޓަރ ނާޒިމް، އެތަން ބައްލަވާލަނީ--ފޮޓޯ:ސިއްހީ ވުޒާރާ
މާލެއާ އެއް ފެންވަރުގެ ޑަޔަލިސިސްގެ ހިދުމަތް ރާއްޖޭގެ ކޮންމެ އަތޮޅަކުންވެސް ލިބޭނެ ގޮތް ހައްދަވާ ދެއްވުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވައުދެކެވެ. ރިޔާސީ އިންތިހާބުގެ ދެވަނަބުރުގެ ކެމްޕެއިނަށް ބ. ކަމަދުއަށް ވަޑައިގެން އެރަށު ރައްޔިތުންނާއެކު ބޭއްވެވި ބައްދަލުވުމުގައި ވެސް ރައީސް މިކަން އިއުލާނު ކުރައްވާފައިވެ އެވެ.
"ކޮންމެ އަތޮޅެއްގެ މައި އެއް ހޮސްޕިޓަލުގައި މާލޭގައި އަޕްގްރޭޑް ކުރެވޭ ފެންވަރަށް ޑަޔަލިސިސްގެ ހިދުމަތް ދެވޭނެ ގޮތަށް ހަމަޖައްސައިދޭނަން،" ރައީސް ޑރ. މުޢިއްޒު
ވެރިކަމަށް ވަޑަައިގެން މިހޭދަވި މުއްދަތުގެ ތެރޭގައި ކުރެވުނު މަސައްކަތްތަކުން މި އަމާޒަށް ވާސިލުވުމުގެ ހެޔޮ ފާލު މިހާރު ވަނީ ފެންނަން ފަށާފައެވެ. އަލަށް ޑަޔަލިސިސްގެ ހިދުމަތް ދޭން ފެށި ރަށްރަށާއި، ތަރައްގީ ކުރަންފެށި ޑަޔަލިސިސް ސެންޓަރުތަކަށް ބަލާލުމުން ވެސް މިކަން ހާމަވެއެވެ. ސިއްހީ ދާއިރާގެ ތަރައްގީއަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކަށައަޅުއްވާފައިވާ ސިޔާސަތުތައް ތަންފީޒުވުމުން ރާއްޖޭގެ ސިއްހީ ނިޒާމަށް އިންގިލާބީ ހެޔޮ ބަދަލުތަކެއް އަންނާނެކަމަށް ސިއްހީދާއިރާގެ މާހިރުން ވިދާޅުވެ އެވެ.