ތިލަދުންމަތީ އުތުރުބުރީ މުރައިދޫ ގައި ވެސް ބެންކު އޮފް މޯލްޑިވްސް އިން އޭޓީއެމްގެ ޚިދުމަތް ފަށައިފި އެވެ.

މީހުން ދިރިއުޅޭ ހުރިހާ ރަށެއްގައި އޭޓީއެމްގެ ޚިދުމަތް ފަށައި ބެންކުގެ ޚިދުމަތް ފުޅާކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. އެ ވަޢުދުފުޅާ އެއްގޮތަށް ރަށްރަށު ގައި އޭޓީއެމް ބެލެހެއްޓުމުގެ މަސައްކަތް ބާރު ސްޕީޑްގައި ދަނީ ކުރިއަށެވެ.

މިދިޔަ ޖަނަވަރީ މަހުގެ ފަހުކޮޅު ހއ އަތޮޅުގެ ރަށްރަށަށް ރައީސް މުޢިއްޒު ކުރެއްވި ދަތުރުފުޅު ގައި އެ އަތޮޅުގައި އޭޓީއެމް ނެތް ރަށްރަށުގައި އޭޓީއެމް ބެހެއްޓުމުގެ މަސައްކަތް ވަނީ ފައްޓަވާފަ އެވެ.

އެގޮތުން ދޮޅު މަހެއްހާ ދުވަހުގެ ތެރޭގައި ގިނަ ރަށްތަކެއްގައި އޭޓީއެމް ބަހައްޓާ މިއަދު ވަނީ ޚިދުމަތް ފަށާފަ އެވެ. އޭގެ ތެރޭގައި މުރައިދޫ ވެސް ހިމެނެ އެވެ. މުރައިދޫގައި އޭޓީއެމްގެ ޚިދުމަތް ރަސްމީކޮށް ފައްޓަވައި ދެއްވީ ޓޫރިޒަމާއި ތިމާވެއްޓާއި ބެހޭ މިނިސްޓަރު ޠާރިގް އިބްރާހީމެވެ.

އޭގެ ކުރީން ހއ ތަކަންދޫ އާއި ހއ. މާރަންދޫ ގައި ވެސް ވަނީ އޭޓީއެމްގެ ޚިދުމަތް އިފްތިތާޙު ކޮށްފަ އެވެ. 

ޤައުމީ ބެންކު -- ބެންކު އޮފް މޯލްޑިވްސް އިން ބުނި ގޮތުގައި މި އަހަރުގެ ނިޔަލަށް ސެލްފް ސާވިސަސް އޭޓީއެމްގެ އަދަދު 250 ވުރެ އިތުރުވާނެ އެވެ.