މިއަހަރު ނިމޭއިރު 250 އަށްވުރެ ގިނަ ބީއެމްއެލްގެ އޭޓީއެމް ރާއްޖޭގައި ޤާއިމްކުރެވޭނެ ކަމަށް ބީއެމްއެލްގެ ސީއީއޯ މުޙައްމަދު ޝަރީފް ވިދާޅުވެއްޖެއެވެ.

ޝަރީފް މިހެން ވިދާޅުވީ ހއ. އުތީމުގައި އޭޓީއެމް ހއ. އަތޮޅުގެ މީހުން ދިރިއުޅޭ ހުރިހާ ރަށެއްގައި އޭޓީއެމް ގާއިމްކުރުމަށް ކުރިއަށްގެންދިޔަ މަޝްރޫއުގެ ދަށުން ހއ. އުތީމުގައި އޭޓީއެމްގެ ޚިދުމަތް ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.

ރައީސުލްޖުމްހުރިއްޔާ ޑރ. މުހައްމަދު މުޢިއްޒު ވަނީ "މުޅި ރާއްޖެއަށް ބީއެމްއެލް އޭޓީއެމް" ގެ ނަމުގައި މުހިންމު މަޝްރޫޢުއެއް ތައާރަފކޮށްފައެވެ. މިއަދަކީ ތާރީޙީ ކާމިޔާބީއެއް ޙާޞިލުވި ދުވަހެއްކަމަށް ފާހަގަކުރައްވަމުން ޝަރީފް ވަނީ ރައީސްގެ ދުރުވިސްނުންފުޅާއި  ނަމޫނާ ލީޑަރޝިޕަށް ޝުކުރުއަދާކުރައްވާފައެވެ.

މީގެ އިތުރުން ރައީސްގެ އަމާޒަކީ އެއްވެސް ރަށެއް ބާކީ ނުކޮށް ހުރިހާ ދިވެހިންނަށް، ރަށުގައި ތިބެގެން ބެންކުގެ ޙިދުމަތް ލިބޭނެ އިންތިޒާމު ހަމަޖައިދިނުން ކަމަށްވުމުން، ބީއެމްއެލުން މަސައްކަތް ކުރަމުންދަނީ ވީހާވެސް އަވަސް ސްޕީޑެއްގައި އެ މަޝްރޫއުގެ މަސައްކަތް ނިންމުމަށް ކަމަށް ޝަރީފް ވިދާޅުވިއެވެ.

އަދި މި މަޝްރޫޢުގެ ސަބަބުން ރައްޔިތުންނަށް ދިމާވާ ގިނަ ދަތިތަކެއް ހައްލުވެގެންދާނެ ކަމަށްވެސް ޝަރީފް ވިދާޅުވިއެވެ.

މި އޭޓީއެމްތަކުން މެދުނުކެނޑި 24 ގަޑިއިރު ފައިސާ ޖަމާކުރުމާއި، ފައިސާ ނެގުމާއި، ޓްރާންސްފަރ ކުރުމާއި، ލޯނަށް ފައިސާ ދެއްކުމާއި، ކްރެޑިޓް ކާޑަށް ފައިސާ ދެއްކުމުގެ ޚިދުމަތް ލިބޭނެކަމަށްވެސް ޝަރީފް ފާހަގަކުރެއްވިއެވެ. ޝަރީފް ވިދާޅުވީ، އަދި މިކަމުގެ ސަބަބުން ވަކި ވަކި ފަރުދުންނަށާއި ވިޔަފާރިތަކަށް ބޮޑެތި ފަސޭހަތަކެއް ލިބި ކުރިއަރައިގެންދާނެ ކަމަށެވެ.

ޤަވައިދުން ބީއެމްއެލްގެ މުވައްޒަފުން ރައްޔިތުންނާ ހަމައަށް ގޮސް ރައްޔިތުންނަށް ޚިދުމަތްތައް ހޯދުމަށް އެހީތެރިވާނެކަން ފާހަގަކުރައްވައި ޝަރީފް ވިދާޅުވީ، ބޭންކުގެ ބްރާންޗުތަކަށް ނުގޮސް ގޭގައި ތިބެގެން ބޭންކުގެ ހުރިހާ ޚިދުމަތެއް ލިބޭނެ މަގު ރައްޔިތުންނަށް ތަނަވަސްކޮށްދޭން މަސައްކަތް ކުރަމުންދާކަމަށެވެ.

އޭޓީއެމްތަކަކަކީ އަމިއްލަ މުދަލެއްގެ ގޮތުގައި ބަލައިގަނެ ރައްކާތެރިކޮށް ބެލެހެއްޓުމަށް ސީއީއޯ ވަނީ އިލްތިމާޞްކޮށްފައެވެ.