ސަރުކާރުގެ މަޝްރޫއުތަކުގައި ރައްޔިތުންގެ ބައިވެރިވުން އިތުރުކުރުމަށް ޚާއްސަ އުސޫލެއް އެކުލަވާލަމުންދާ ކަމަށް މިނިުސްޓަރ އޮފް ސިޓީޒް، ލޯކަލް ގަވާމެންޓް އެންޑް ޕަބްލިކް ވާކްސް އާދަމް ޝަރީފް އުމަރު ވިދާޅުވެއްޖެ އެވެ.

'އެމްއެމް ޓީވީ' އަށް ދެއްވި ޚާއްސަ އިންޓަވިއުއެއްގައި މިނިސްޓަރ ވަނީ ލާމަރުކަޒީ ނިޒާމު ހަރުދަނާކުރުމަށްޓަކައި، އެ ނިޒާމަށް ގެންނަންޖެހޭ ބަދަލުތަކާ ގުޅިގެން ކައުންސިލްތަކާއި އެކު މަޝްވަރާ ކުރަމުންދާކަން ފާހަގަކުރައްވާފަ އެވެ. އެގޮތުން، ޔޫއެންޑީޕީގެ އެހީއާއެކު އަންނަ މަހު ކައުންސިލްތަކާއި އެކު ބާއްވާ ބައްދަލުވުމުގައި، އެކަންކަމާ ގުޅިގެން މަޝްވަރާކުރެވޭނެ ކަމަށް މިނިސްޓާރ ވިދާޅުވި އެވެ.

އެ ބައްދަލުވުމުގައި، ސަރުކާރުން ނުވަތަ މިނިސްޓްރީން ހިންގާ މަސައްކަތްތަކުގައި ރައްޔިތުންގެ ބައިވެރިވުން އިތުރުކުރުމާ ގުޅިގެން މަޝްވަރާ ކުރެވޭނެ ކަމަށް މިނިސްޓަރ ވިދާޅުވި އެެވެ. އެގޮތުން، އެކަމާ ގުޅޭ ޚާއްސަ އުސޫލެެއް އެކުލަވާލައި ޚާއްސަ ކަރުދާހެއް ހުށަހެޅުމަށް ހަމަޖެހިފައިވާ ކަމަށް މިނިސްޓަރ ވިދާޅުވި އެވެ.

"އަޅުގަނޑުމެންގެ މިނިސްޓްރީން ހިންގާ ކޮންމެ މަޝްރޫއުއެއްގައި 55 ކައުންސިލް އަދި ކުޑަކުދިންގެ ޕާކުތައް ހެދުން މިހެން ކުރާ ކޮންމެ މަސައްކަތެއްގައި ސިވިލް ސޮސައިިޓީ ޕާޓިސިޕޭޝަން އިތުރުކުރުމާ ބެހޭ އުސޫލެއް ހަދައި އާއްމުކުރުމުގެ މަސައްކަތް ކުރިއަށް އެބަގެންދަން" މިނިސްޓަރ ވިދާޅުވި އެވެ.  

މިނިސްޓަރ ވިދާޅުވީ ވަރަށް އަވަހަށް އެ އުސޫލު އާއްމުކުރައްވާނެ ކަމަށެވެ.