އީދަށް މާލެއާއި ރަށްތައް ދިއްލުމުގެ މަސައްކަތުގެ ތެރެއިން ކުލަސްޓަރ 3 ގައި ހިމެނޭ މާލެއަތޮޅާއި، އަރިއަތޮޅު އުތުރުބުރިއާއި، އަރިއަތޮޅު ދެކުނުބުރިއާއި، ފެލިދެއަތޮޅާއި، މުލަކު އަތޮޅުގެ ބައެއް ރަށްތައް ދިއްލުމަށް ކުރަންޖެހޭ ޢަމަލީ މަސައްކަތް ފެށިގެން ކުރިއަށްދާ ކަމަށް އެ ކުލަސްޓަރއިން މަޢުލޫމާތު ދެއްވައިފިއެވެ. 

މިނިސްޓްރީ އޮފް ސިޓީސް ލޯކަލް ގަވަރމެންޓް އެންޑް ޕަބްލިކް ވޯކްސްގެ ޑެޕިޔުޓީ މިނިސްޓަރ އިސްމާޢީލް ނާފިޢު ވިދާޅުވީ އއ. ރަސްދޫގައި ލައިޓް ހަރުކުރުމުގެ މަސައްކަތް މީގެ ދެތިން ދުވަސް ކުރިން ފެށިގެން އަންނަނީ ކުރަމުންކަމަށެވެ. އަދި މި މަސައްކަތް ނިމުމަކާ ގާތަށް އައިސްފައިވާ ކަމަށެވެ.

މީގެއިތުރުން އދ. މަހިބަދޫގެ މަސައްކަތް މިއަދު ފެށޭނެ ކަމަށާއި، ވ. ފެލިދޫއާއި، މ. މުލީގެ މަސައްކަތް ލަސްވެގެން އަންގާރަދުވަހު ފެށޭނެ ކަމަށާއި، ކ. ތުލުސްދޫގެ މަސައްކަތް މިއަދު ފެށޭނެ ކަމަށް ނާފިޢު ވިދާޅުވިއެވެ.

ކުލަސްޓަރ ތިނަކުން މި އަހަރު އަލަށް ދިއްލުމަށް ހަމަޖެހިފައިވަނީ ކ. ކާށިދޫއާއި، ކ. މާފުށްޓާއި، އއ. ތޮއްޑޫއާއި، އއ. އުކުޅަހާއި، އދ. މާމިނގިއްޔާއި، އދ. އޮމަދޫއާއި، ވ. ފުލިދޫއާއި، ވ.ކެޔޮދޫއާއި، މ. މުލަކާއި އަދި މ. ކޮޅުފުށްޓެވެ.

އަލަށް ދިއްލާ ރަށްތައް ދިއްލުމަށް ބޭނުންވާ ލައިިޓާއި، ގިޑިގެއާއި އަދި ސައުންޑް ސްޕީކަރުތައް މިއަދު ރަށްރަށަށް ފޮނުވާ ގޮތަށް ވަނީ ހަމަޖެހިފައެވެ. ރަށްރަށް ޢީދަށް ދިއްލުމުގެ މަސައްކަތް ކުރިއަށް ދަނީ ކައުންސިލާއި، ފެނަކަ އަދި ސްޓެލްކޯގެ މުވައްޒަފުންގެ ވަރަށް ބޮޑު އެހީތެރިކަމާއެކުގައިކަމަށް ފާހަގަކޮށްފައިވެއެވެ. 

ޢީދަށް ދިއްލުމަކީ ކުޑަކުދިންނަށާއި، ޒުވާނުންނަށް އަދި ޢުމުރުން ދުވަސްވީ މީހުންނަށް ވެސް ވަރަށް ބޮޑު ހިތްހަމަޖެހުމެއް ލިބިގެންދާ ކަމެކެވެ. ޢީދު ދިއްލުން އަތޮޅުތެރޭގައި ފެށިފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޒަޢާމަތުގައި މިދިޔަ އަހަރުގައެވެ.