މިއަހަރުގެ ދިވެހީންގެ އުފެއްދުންތެރިކަމުގެ މައުރަޒުގައި ޚާއްސަ އެހީއަށް ބޭނުންވާ ފަރާތްތަކަށް ވަކި ދާއިރާއެއް އޮންނާނެކަމަށް، ފައިނޭންޝިއަލް ކޮންޓްރޯލަރ ބީސީސީ، ޙަސަން ގައްސާން ވިދާޅުވެއްޖެއެވެ.

އެމްއެމްޓީވީގެ ބޮޑު ޚަބަރު ޕްރޮގްރާމްގައި ވާހަކަދައްކަވަމުން ގައްސާން ވިދާޅުވީ ޚާއްސަ އެހީއަށް ބޭނުންވާ ފަރާތްތަކަށް ވަކި ދާއިރާއެއް ކަނޑައަޅާފައިވީ ނަމަވެސް އަމިއްލަ ފަރުދުންގެ ދާއިރާއިން ބައިވެރިވުމުގެ އިޚްތިޔާރުވެސް އެބައޮތްކަމަށެވެ. އަދި އެޕްލައިކުރުމުގައި އެއްވެސް ތަފާތެއް ނޯންނާނެކަމަށް ވެސް ގައްސާންގެ ވާހަކައިގައި ފާހަގަކުރެއްވިއެވެ. 

އެމްއެމްޓީވީގެ ބޮޑު ޚަބަރު ޕްރޮގްރާމްގައި ފައިނޭންޝިއަލް ކޮންޓްރޯލަރ ބީސީސީ، ޙަސަން ގައްސާން އަދި އެސިސްޓެންޓް މެނޭޖަރ، ކުޅުދުއްފުށި ބިޒްނަސް ސެންޓަރ، ޝަޒީލާ ޙަސަން މަޢުލޫމާތުދެއްވަނީ / ފޮޓޯ: އެމްއެމްޓީވީ 

މައުރަޒުގައި ބައިވެރިވާ ޚާއްސަ އެހީއަށް ބޭނުންވާ ފަރާތްތަކުގެ ދާއިރާއިން ބައިވެރިވެވޭނީ ޤާނޫނު ނަންބަރު 8/2010 (ނުކުޅެދުންތެރިކަން ހުންނަ މީހުންގެ ޙައްޤުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ޤާނޫނު)ގެ ދަށުން ޚާއްސަ އެހީއަށް ބޭނުންވާ ފަރާތްތަކުގެ ދަފްތަރުގައި ރަޖިސްޓްރީކޮށްފައިވާ، އުމުރުން 18 އަހަރުން މަތީގެ ފަރާތްތަކަށެވެ. 

މީގެ އިތުރުން އެސިސްޓެންޓް މެނޭޖަރ، ކުޅުދުއްފުށި ބިޒްނަސް ސެންޓަރ، ޝަޒީލާ ޙަސަން ވާހަކަދައްކަވަމުން ވިދާޅުވީ މައުރަޒުގައި ބައިވެރިވުމުގެ ސުންގަޑިއަކީ 31 މާރިޗު ކަމަށެވެ. އަދި އެއް އެޕްލިކެންޓަކަށް ވެސް ގިނަ ތަކެތި ބައިވެރިކުރެވޭނެކަމަށް ފާހަގަކުރެއްވިއެވެ. ތަކެތި ހުށަހަޅާއިރު ތަކެތީގެ ނަމާއި، ތަކެތި ހުށަހަޅާ ދާއިރާއާއި، ވިކޭނެކަމަށް އަންދާޒާ ކުރެވޭ އަގާއި، ހުށަހަޅާ ޕްރޮޑަކްޓްގެ ސައިޒު ހިމެނުމަށް ފޯމުގައިވާނެއެވެ.

ހަމައެހެންމެ އެޕްލައިކުރުމުގެ އެންމެ ބޮޑު ސަމާލުކަމެއްދޭން ޖެހޭނީ ރަނގަޅު މަޢުލޫމާތު ހިމަނައިގެން ފޯމުފުރުންކަމަށް ފާހަގަކުރެއްވިއެވެ. އެގޮތުން އުފެއްދުމުގެ ދާއިރާ ރަނގަޅަށް ޖެހުމާއި، އެޕްލައިކުރާއިރު ޕްރޮޑަކްޓްގެ އިތުރު ތަފްސީލު ދިނުމުގައި ރަނގަޅު ތަފްސީލީ މަޢުލޫމާތު ހިއްސާކުރުމަކީ ވަނަ ލިބުމަށް އިތުރު ފުރުސަތަކަށް ވެގެންދާނެކަމެއް ކަމަށް ވެސް ޝަޒީލާ ފާހަގަކުރެއްވިއެވެ.