އިނގިރޭސި ޕްރިމިއާ ލީގުގެ މަތީ ފަންތީގެ ކުލަބެއްކަމަށްވާ ލިވާޕޫލާ ގުޅިގެން ރާއްޖެ އިޝްތިހާރުކުރުމަށް ކުރިއަށްގެންދާ  ކެމްޕޭނުގައި ގިނަ ހަރަކާތްތަކެއް ހިންގަން ޕްލޭންކުރެވިފައިވާކަމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ މެނޭޖިން ޑިރެކްޓަރު އިބްރާހިމް ޝިއުރީ ވިދާޅުވެއްޖެއެވެ.

ޝިއުރީ މިފަދައިން ވިދާޅުވީ އެމްއެމްޓީވީއަށް އޭނާ ދެއްވި ހާއްސަ ބަސްދީގަތުމެއްގައެވެ. 

ޝިއުރީ ވިދާޅުވީ މި ޕާޓްނާޝިޕްގެތެރެއިން ރާއްޖޭގެ ފަތުރުވެރިކަމުގެ ސިނާއަތަށް ބޮޑޮ ކުރިއެރުމެއް ލިބޭނެކަމަށެވެ. އޭނާ ވިދާޅުވި ގޮތުގައި ލިވަޕޫލާއެކު ރާއްޖެ އިޝްތިހާރުކުރުމަށް ހިންގާ ކެމްޕެއިނުގެ ސަބަބުން ލޯ ސީޒަނުގައި ރާއްޖެ ޕްރޮމޯޓުކުރުމުގެ މަސައްކަތް ކުރެވޭނެއެވެ. 

ޝިއުރީ މައުލޫމާތު ދެއްވި ގޮތުގައި، 22 މިލިއަން ސަޕޯޓަރުން ތިބި ލިވަޕޫލްގެ ފޭން ބޭސްގައި އެގްޒެކެޓިވްސް އާއި އިންޑަސްޓްރީގެ އިސްވެރިން ފަދަ ހައި ޕްރޮފައިލް ސަޕޯޓަރުން ގިނައެވެ. އެމްޑީ ފާހަގަކުރެއްވި ގޮތުގައި މީގެ ތެރެއިން ގާތްގަނޑަކަށް 4 އިންސައްތަ ސަޕޯޓަރުން ރާއްޖެ ޒިޔާރަތްކުރިޔަސް ހަތަރު ލައްކަ ޓޫރިސްޓުން ރާއްޖެއަށް ގެނެވޭނެއެވެ. 

މީގެއިތުރުން، އޮފް ޕީކް މަސްތަކަށް ހާއްސަކޮށްގެން ޕްރިމިއާ ޑެސްޓިނޭޝަނެއްގެ ގޮތުގައި ރާއްޖެ އިޝްތިހާރުކުރުމުގެ މަގުސަދުގައި އިތުރު ކެމްޕޭންތަކެއް ރާވަމުން އަންނަކަން ވެސް ޝިއުރީ ފާހަގަކުރެއްވި އެވެ.

މި ކެމްޕެއިންތަކުގެ ތެރޭގައި ލިވަޕޫލްއާއެކު ގާއިމުކޮށްފައިވާ ގުޅުމުގެ ތެރެއިން ލޯ ސީޒަނުގައި ރާއްޖެއަށް އަންނަ ފަތުރުވެރިން އިތުރުކުރުމަށް ހާއްސަ ކެމްޕެއިންތަކެއް ހިންގަވަމުންދާނެ ކަމުގައި އެމްޑީ ވިދާޅުވިއެވެ. 

 ލިވަޕޫލާއެކު ކުރިއަށް ގެންދާ މި ޕާޓްނާޝިޕްގެ ސަބަބުން ޓޫރިސްޓުން އަންނަ މިންވަރު އިތުރުވުމާއެކު، ބައިނަލްއަގްވާމީ މައިދާނުގައި ރާއްޖޭގެ ޕްރޮފައިލް މަތިވެ، އޮފް ޕީކް މަސްތަކުގައި ދަތުރުވެރިން ގެނައުމަށް މަގުފަހިވެގެންދާނެ ކަމަށްވެސް ބެލެވެއެވެ.