ތެލަސީމިއާ ކުދިންނަށް ދިމާވާ ދަތިތަކަށް ހައްލު ހޯއްދެއްވުމުގެ މަސައްކަތް ކުރިއަށްގެންދަވާނީ އެމަނިކުފާނުގެ ބެއްލެވުމުގެ ދަށުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ. 

ތެލަސީމިއާ ކުދިންގެ ބެލެނިވެރިންގެ ކަންބޮޑުވުންތަކާއި ގުޅިގެން، މިއަދު ރައީސް ވަނީ މާލޭގައި ހުންނަ ތެލަސީމިއާ ސެންޓަރުގެ އިތުރުން ތެލަސީމިއާ ސެންޓަރުގެ ހިދުމަތްތައް ބަދަލުކުރުމަށް ހަމަޖެހިފައިވާ ހުޅުމާލެ އޮރެންޖް ހިޔާއަށް ވަޑައިގެންފައެވެ.

ރައީސްގެ ޒިޔާރަތުގައި ވަނީ ތެލަސީމިއާ ސެންޓަރުގެ މުވައްޒަފުންނާއި ބައްދަލުކުރައްވައި އެތަނުގައި އެވަގުތު ހިދުމަތް ހޯދަމުން އައި އާއިލާތަކާ ބައްދަލުކުރައްވައި ކަންބޮޑުވުންތައް ސާފުކުރައްވައިފައެވެ. 

ހުޅުމާލޭގައި ހުންނަ އޮރެންޖް ހިޔާ އިމާރާތް ބައްލަވާލެއްވުމަށްފަހު ރައީސުލްޖުމްހުރިއްޔާ ޑރ. މުހައްމަދު މުއިއްޒު ދެއްވި ބަސްދީގަތުމެއްގައި ވަނީ، ތެލަސީމިއާ ކުދިންނަށް ދިމާވެފައިވާ ދަތިތައް ހައްލުކުރުމުގެ މަސައްކަތް ކުރިއަށްދާނީ އެމަނިކުފާނުގެ ބެއްލެވުމުގެ ދަށުން ކަމަށް ވިދާޅުވެފައެވެ. 

ރައީސް ވިދާޅުވީ ތެލަސީމިއާ ސެންޓަރަށް އިންޓާނަލީ ގެންނަންޖެހޭ ބަދަލުތައް ވަރަށް އަވަހަށް ގެންނަވާނެ ކަމަށެވެ. މާލޭގައި ތެލަސީމިއާ ސެންޓަރު ހިންގާ މުއްދަތުގައި އެތަނުގައި ދެމުންގެންދާ ހިދުމަތް ރަނގަޅު ކުރުމަށް މަސައްކަތްތަކެއް ކުރެއްވުމަށް ނިންމަވާފައިވާކަމަށް ރައީސް ވިދާޅުވިއެވެ. ރައީސް ވިދާޅުވީ ހުޅުމާލެއަށް ތެލަސީމިއާ ސެންޓަރުގެ މަސައްކަތްތައް ބަދަލުކުރައްވާނީ ރަނގަޅު ހިދުމަތްތަކާއެކު ކަމަށެވެ. 

ހުޅުމާލެ "އޮރެންޖް ހިޔާ" އިމާރާތް ބައްލަވާލައްވަން ކުރެއްވި ޒިޔާރަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، އާ އިމާރާތަށް ތެލަސީމިއާގެ ޚިދުމަތްތައް ބަދަލުކުރެއްވި ނަމަވެސް، ޚިދުމަތް ހޯދާ ފަރާތްތަކަށް އެއްވެސް ދައްޗެއްނެތި ޚިދުމަތް ދެވޭނެގޮތަށް، އާ އިމާރާތަށް ބަދަލުކުރެއްވުމުގެ މަސައްކަތް ކުރެއްވުމަށް އިރުޝާދުދެއްވާފައެވެ. އަދި، ޚިދުމަތް ހޯދާ ފަރާތްތަކަށް ކަންކަން ފަހިވާނެ ގޮތަށް، ބަލި މީހުންނާ އަދި ޚިދުމަތް ހޯދާފަރާތްތަކާ ގުޅިގެން އެފަރާތްތަކުގެ މަޝްވަރާއާއެކު، ގާތުން ކަންކަން ކުރިއަށް ގެންދިއުމަށްވެސް އެމަނިކުފާނު ވަނީ އިރުޝާދުދެއްވަވާފައެވެ.