އޭއެސް ރޯމާގެ އާޖެންޓީނާ ފޯވާޑް، ޕައުލޯ ޑިބާލާ އަށް އަނިޔާވެ، މި ސީޒަނުގެ ބާކީ އޮތް ބައިގައި ނުކުޅެވޭނެ ކަމަށް އެ ކުލަބުން ބުނެފިއެވެ.

އުމުރުން 31 އަހަރުގެ ޑިބާލާގެ ފަލަމަސްގަނޑަށް ލިބިފައިވާ އަނިޔާއިން ރަނގަޅުވުމަށް އޮޕަރޭޝަނެއް ކުރަން ޖެހިފައިވާ ކަމަށް ރޯމާ އިން ވަނީ ބުނެފައެވެ.

އަދި، މި ވަގުތަށް ބަލާއިރު ރިކަވަރީގެ ކަންތައްތައް ފުރިހަމައަށް ގެންދިއުމަށް އެންމެ ރަނގަޅު ގޮތަކީ އޮޕަރޭޝަން ކުރުން ކަމަށް ވެސް އެ ކުލަބުން ބުނެއެވެ.

މި ސީޒަނުގައި ރޯމާގައި ރަނގަޅު ކުޅުމެއް ދައްކަމުންއައި ޑިބާލާ ވަނީ ހުރިހާ މުބާރާތެއްގައި އެ ޓީމަށް 8 ލަނޑުޖަހައިދީ، އިތުރު ހަތަރު ގޯލްޖެހުމަށް އެހީތެރިވެދީފައެވެ.

ރޯމާ އަށް ޑިބާލާ އެންމެ ފަހުން ކުޅެފައިވަނީ މިދިޔަ ހަފްތާ ބަންދުގައި ކަލިއާރީ އަތުން މޮޅުވި މެޗުގައެވެ.

އަނިޔާއިން ރަނގަޅުވެ، ޑިބާލާ އަށް ކުޅުމަށް އެނބުރި އާދެވޭނެ ކަމަށް ވަކި މުއްދަތެއް ރޯމާ އިން ހާމަކޮށްފައިނުވިނަމަވެސް، މިފަދަ އަނިޔާއިން ރިކަވާވާން ތިން މަސްދުވަސް ނަގާނެ ކަމަށް ބެލެވެއެވެ.

މިދިޔަ ނޮވެންބަރު މަހު ކޯޗު، ކްލައުޑިއޯ ރަނިއޭރީ އެ ޓީމާ ހަވާލުވިފަހުން އަންނަނީ ރަނގަޅު ކުޅުމެއް ދައްކަމުންނެވެ. އެގޮތުން، ރޯމާ ވަނީ ލީގު ތާވަލްގެ 12 ވަނައިން ހަތްވަނަ އަށް ކުރިއަށް ޖެހިލައިފައެވެ.

ރޯމާ އަށް ދެން އޮތީ މި މަހުގެ 29 ވަނަ ދުވަހު ލެއްޗޭއާ ދެކޮޅަށް ކުޅެން ޖެހޭ މެޗެވެ.