އަންނަ އަހަރު ބާއްވާ ފީފާ ވޯލްޑް ކަޕްގެ ހޯސްޓް ގައުމުތަކަށް ފަހު، އެ މުބާރާތުގައި ވާދަކުރުމުގެ ފުރުސަތު ހޯދި ފުރަތަމަ ޓީމުގެ ޝަރަފު ޖަޕާނުން ހޯދައިފިއެވެ.

މިއީ ޖަޕާނުން ވޯލްޑް ކަޕްގައި ޖެހިޖެހިގެން ވާދަކުރާނެ އަށްވަނަ ފަހަރެވެ.

އޭޝިއާގެ ފުޓްބޯޅައިގެ ގަދަބާރެއް ކަމަށްވާ، ޖަޕާނުން ވަނީ ގްރޫޕު ސީގައި މިއަދު ކުޅުނު މެޗުގައި ބަހުރެއިން 2-0 އިން ބަލިކޮށް، އެ ގްރޫޕުން އޮޓޮމެޓިކް ޖާގައެއް ކަށަވަރުކޮށްފައެވެ.

ޖަޕާނުގެ ސައިޓާމާ ސްޓޭޑިއަމްގައި ކުޅުނު މެޗުގައި އެ ޓީމުގެ ލަނޑުތައް ޖަހައިދިނީ ޑައިޗީ ކަމާޑާ އާއި ޓަކެފޫސާ ކޫބޯ އެވެ.

މި ގްރޫޕުގައި ހިމެނޭ އަނެއް ޓީމު ކަމަށްވާ، އޮސްޓްރޭލިއާ އިން ވަނީ ކުރީގެ މަޝްހޫރު ފޯވާޑް، ޕެޓްރިކް ކްލައިވަޓްގެ އިރުޝާދުގެ ދަށުން އިންޑޮނޭޝިއާއާ ދެކޮޅަށް ކުޅުނު ފުރަތަމަ މެޗުގައި 5-1 އިން އެ ޓީމު ބަލިކޮށް، ހަތްވަނަ ފަހަރަށް ވޯލްޑް ކަޕްގައި ކުޅުމާ ގާތަށް ޖެހިލައިފައެވެ.

އޭޝިއާގެ ވޯލްޑް ކަޕް ކޮލިފައިންގެ ތިން ގްރޫޕުގެ ތެރެއިން ކޮންމެ ގްރޫޕެއްގެ އެންމެ ކުރިހޯދާ ދެ ޓީމަކަށް އޮޓޮމެޓިކް ޖާގައެއް ލިބޭއިރު، ތިންވަނަ އާއި ހަތަރުވަނަ އަށް ދާ ޓީމުތަކަށް އިތުރު ކޮލިފައިންގ ބުރެއްގައި ވާދަކޮށް، އަނެއް ޖާގަ ހޯދުމުގެ ފުރުޞަތު ލިބޭނެ އެވެ.

އުތުރު އެމެރިކާ ބާއްރުގައި ބާއްވާ ވޯލްޑް ކަޕްގައި މުޅިއެކު 48 ޓީމުން ވާދަކުރާއިރު، ހޯސްޓުން ކަމަށްވާ، އެމެރިކާ، ކެނެޑާ އާއި މެކްސިކޯގެ އިތުރުން މިހާތަނަށް ކޮލިފައިވެފައިވަނީ ޖަޕާނެވެ.