ޔުއެފާ ނޭޝަންސް ލީގުގެ ކުއާޓާ ފައިނަލުގައި ޖަރުމަނާ ދެކޮޅަށް ކުޅެން އޮތް މެޗުގައި އިޓަލީގެ ފޯވާޑް، މަޓެއޯ ރެޓޭގީ އަށް އަނިޔާވެ، ނުކުޅެވޭނެ ކަމަށް އެ ޓީމުގެ ކޯޗު، ލުސިއާނޯ ސްޕަލޭޓީ ބުނެފިއެވެ.

މި ވަގުތު އިޓާލިއަން ލީގުގެ ލަނޑު ލިސްޓުގެ އެންމެ ކުރީގައި އުޅޭ ރެޓޭގީގެ ފަލަމަސްގަނޑަށް ލިބިފައިވާ އަނިޔާގެ ސަބަބުން ސްކޮޑުން ވަކިވެފައިވާކަން ސްޕަލޭޓީ ވަނީ ކަށަވަރުކޮށްދީފައެވެ.

ސްޕަލޭޓީ ބުނީ، ދެ ޓީމުގެ މެދުގައި ކުޅުމަށް ހަމަޖެހިފައިވާ ފުރަތަމަ ލެގުގައި ޑިފެންޑަރު، އަންދްރެއާ ކަމްބިއާސޯ އާއި މިޑްފީލްޑަރު، މަޓިއާ ޒަކާނީ އަށް ވެސް ނުކުޅެވުމުގެ ބިރު އެބައޮތް ކަމަށެވެ.

"ރެޓޭގީ އަނބުރާ ފޮނުވާލީ ކުޅެވޭނެ ކަމުގެ ޔަގީންކަމެއް ނެތުމުން،" ސްޕަލޭޓީ ބުންޏެވެ.

ލީގުގައި އެޓަލާންޓާ އަށް ކުރިއަށް ހުރި މެޗުތަކުގައި ރެޓޭގީ ފިޓްވާނެ ކަމަށް އުއްމީދުކުރާ ކަމަށް ސްޕަލޭޓީ ވަނީ ބުނެފައެވެ.

ޒަކާނީ އާއި ކަމްބިއާސޯގެ ރިކަވަރީގެ ކަންތައްތައް ކުރިއަށްދާގޮތުން އިތުރު ފޯވާޑެއް ގެންނަން ޖެހިދާނެ ކަމަށް ވެސް ސްޕަލޭޓީ ވަނީ ފާހަގަކޮށްފައެވެ. އެގޮތުން، ރޮބާޓޯ ޕިކޯލީ އާއި ޓޮމާސޯ ބަލްޑަންޒީ ސްކޮޑަށް އިތުރުކުރަންޖެހިދާނެ ކަމަށް ވެސް ސްޕަލޭޓީ ބުންޏެވެ.

އެހެންނަމަވެސް، ސްޕަލޭޓީ ވަނީ އިޓަލީގެ އަނިޔާގެ މައްސަލަތަކާ ގުޅޭގޮތުން މާބޮޑު ކަންބޮޑުވުމެއް ނެތް ކަމަށާއި، ޖަރުމަން ޓީމުގައި އެއްވެސް ވަރަކަށް އަނިޔާގައި ތިބި ކުޅުންތެރިން ނެތް ފަދަ ގޮތަކަށް ވާހަކަދައްކައިފައެވެ. 

ޖަރުމަނުގެ ޓީމުގައި އެއް ކުޅުންތެރިއަކަށް ނުކުޅެވިއްޖެ ހާލަތެއްގައި، އެއް ފެންވަރެއްގެ މޮޅު ގިނަ ކުޅުންތެރިންތަކެއް ތިބުމުން އެ ޓީމަށް ހީނަރުކަމެއް ނާންނާނެ ކަމަށް ވެސް ސްޕަލޭޓީ ބުންޏެވެ.

އިޓަލީއާ ޖަރުމަން ބައްދަލުކުރާ ކުއާޓާގެ މެޗުގެ ފުރަތަމަ ލެގު ބުރާސްފަތި ދުވަހު ކުޅުމަށް ހަމަޖެހިފައިވާއިރު، ދެ ޓީމުގެ މެދުގައި ކުޅޭ ދެވަނަ ލެގު އޮތީ އާދީއްތަ ދުވަހު އެވެ.