ބައިނަލްއަގުވާމީ އެކުވެރިކަމުގެ މެޗެއްގައި ދިވެހިރާއްޖެ އަތުން 3-0 ގެ ނަތީޖާއަކުން އިންޑިއާ މޮޅުވެއްޖެއެވެ.

ޝިލޮންގުގައި ހުންނަ ޖަވާހަރްލާލް ނެހްރޫ ސްޓޭޑިއަމްގައި ކުޅުނު މެޗު ފެށިގެން ޑޮމިނޭޓްކުރަމުންދިޔަ އިންޑިއާ އިން ޖެހި ތިން ލަނޑުގެ ތެރެއިން އެއް ގޯލްޖެހީ ފުރަތަމަ ހާފުގައެވެ.

މި މެޗުގައި އިންޑިއާގެ ލަނޑުތައް ޖަހައިދިނީ ރާހުލް ބޭކޭ، ލިސްޓަން ކޮލާކޯ އާއި ސުނިލް ޗެތުރީ އެވެ. އިންޑިއާ އިން ޖެހި މި ތިން ގޯލުވެސް ކާމިޔާބުކުރީ ބޮލުންނެވެ.

މުޅި މެޗުގައި ވެސް ރާއްޖެ އަށް ލަނޑެއްޖަހައިދޭން ލިބުނު އެންމެ ރަނގަޅު ފުރުސަތުގައި ފަހު ހާފުގައި ބަދަލަކަށް ކުޅެން އެރި ހަސަން ނަޒީމް (ޗޯޓު) ފޮނުވާލި ބޯޅަ އިންޑިއާގެ ކީޕަރު، ވިޝާލް ކެއިތު ހުއްޓުވިއެވެ.

ރާއްޖެ އަށް ދެން އޮތީ މި މަހުގެ 25 ވަނަ ދުވަހު ފިލިޕީންސާ ދެކޮޅަށް ކުޅުމަށް ހަމަޖެހިފައިވާ އޭޝިއަން ކަޕް ކޮލިފައިންގ ބުރުގެ މެޗެވެ. ހަމަ އެ ދުވަހު އިންޑިއާގެ ދަނޑުގައި އެ ޓީމުން ނިކުންނާނީ ބަންގްލަދޭޝްއާ ދެކޮޅަށެވެ.