ދިވެހިރާއްޖެއާ ދެކޮޅަށް މިއަދު ކުޅުމަށް ހަމަޖެހިފައިވާ މެޗަކީ އެކުވެރިކަމުގެ މެޗަކަށްވީ ނަމަވެސް، ބޭނުންވަނީ މޮޅުވާން ކަމަށް އިންޑިއާގެ ކޯޗު، މަނޯލޯ މާކޭޒް ބުނެފިއެވެ.

މާކޭޒް މިހެން ބުނީ، މެޗުގެ ކުރީން ބޭއްވި ނޫސްވެރިންގެ ބައްދަލުވުމުގައެވެ.

"މިއީ އޭޝިއަން ކަޕް ކޮލިފައިންގ މެޗަށް ތައްޔާރުވުމަށް ކުޅޭ އެކުވެރިކަމުގެ މެޗެއް. އެހެންވިޔަސް އަހަރެމެން ބޭނުމީ މެޗު ކާމިޔާބުކުރަން،" މާކޭޒް ބުންޏެވެ.

މާކޭޒް ބުނީ، އެންމެ ބޮޑު އިސްކަމެއްދޭނީ ކުރިއަށް އޮތް ބަންގްލަދޭޝް މެޗަށް ނުކުންނައިރު ޓީމުގެ ހާލަތު ރަނގަޅު ކުރުމަށް ކަމަށެވެ.

މިދިޔަ އަހަރުގެ ޖުލައި މަހު އިންޑިއާގެ ކޯޗުކަމާ ހަވާލުވި މާކޭޒް ވަނީ، އޭނާގެ އިރުޝާދުގެ ދަށުން އިންޑިއާ އިން ކުޅޭ ވާދަވެރި ފުރަތަމަ މެޗާ ކުރިމަތިލުމުގެ ކުރިން ރާއްޖެއާ ބައްދަލުކުރާ މެޗުގެ މުހިއްމުކަން ފާހަގަކޮށްފައެވެ.

އޭނާ ބުނީ، ރާއްޖެ މެޗަކީ ކުރިއަށް އޮތް ކޮލިފައިންގ މެޗަށް ތައްޔާރުވުމަށް އިންޑިއާ އަށް ލިބޭ ރަނގަޅު ފުރުޞަތެއް ކަމަށެވެ.

މާކޭޒް ވަނީ، ރާއްޖެއާ ދެކޮޅަށް ކުޅޭ މެޗުގައި ކުރީގެ ކެޕްޓަން، ސުނިލް ޗެތުރީ ބައިވެރިވާނެކަން ކަށަވަރުކޮށްދީފައެވެ.

އިންޑިއާ ޓީމަށް ކުޅުންތެރިއަކު ނެގުމުގައި އުމުރަށް ނުބަލާނެ ކަމަށާއި، ކިތަންމެ ހަގަސް އަދި ދުވަސްވީ ކުޅުންތެރިއަކަށް ވިޔަސް ރަނގަޅު ފޯމެއްގައި ހުރި ކުޅުންތެރިއަކަށްވާ ނަމަ އެކަމުގައި އެއްވެސް ހުރަހެއް ނެތް ކަމަށް ވެސް މާކޭޒް ބުންޏެވެ.