މެންޗެސްޓަރ ޔުނައިޓެޑަށް ކުރިމަތިވެފައިވާ މާލީ މައްސަލަތަކުން އަރައިގަތުމުގެ ގޮތުން ފެށޭ ސީޒަނުގައި އޯލްޑް ޓްރެފޯޑްގެ ސީޒަން ޓިކެޓުގެ އަގުބޮޑުކުރަން ނިންމާފައިވާ ކަމަށް އެ ކުލަބުން ބުނެފިއެވެ.

އެގޮތުން، ޔުނައިޓެޑުން ބުނީ، ގާތްގަނޑަކަށް ފަސް އިންސައްތައަށް ސީޒަން ޓިކެޓުގެ އަގުބޮޑުކުރާނެ ކަމަށެވެ.

މިއާއެކު، ފިރިހެން ޓީމުގެ މެޗުތަކުގެ ޓިކެޓުގެ އަގުތައް އެވްރެޖްކޮށް 2.50 ޕައުންޑް (3.25 އެމެރިކާ ޑޮލަރު) ބޮޑުކުރެވޭނެ ކަމަށް އެ ކުލަބުން ބުނެއެވެ. އެހެންނަމަވެސް، ޔުނައިޓެޑްގެ 16 އަހަރުން ދަށުގެ ޓީމުގެ މެޗުތަކުގެ ޓިކެޓުގެ އަގަށް ބަދަލެއް ނުގެންނާނެ އެވެ.

ވިދިވިދިގެން 11 ސީޒަނުގައި ޓިކެޓުގެ އަގުތަކަށް ބަދަލެއްނުގެނެސް ބެހެއްޓުމަށްފަހު، މިދިޔަ ސީޒަނެކޭ އެއްގޮތަށް އަންނަ ސީޒަނުގައި ވެސް މެޗު ޓިކެޓުތަކުގެ އަގު ފަސް އިންސައްތަ ބޮޑުކުރާން ނިންމާފައިވަނީ ހިންގުމުގެ ޚަރަދުތައް އިތުރުވަމުންދާތީވެ، އެކަން ފޫބެއްދުމުގެ ގޮތުން ކަމަށް ޔުނައިޓެޑްގެ ޗީފް އެގްޒެކެޓިވް އޮމަރް ބެރާޑާ ވިދާޅުވިއެވެ.

ބެރާޑާ ވިދާޅުވީ، ދަނޑުމަތީގައި ކުލަބުގެ ފަރާތުން ދަށް ކުޅުމެއް ފެންނަމުންދާ ދުވަސްވަރެއްގައި ޓިކެޓުގެ އަގުބޮޑު ކުރުމަކީ ބަލައިގަންނަން އުނދަގޫ ކަމެއްކަން އެނގޭ ކަމަށެވެ. އަދި، ސަޕޯޓަރުންގެ އެޑްވައިޒަރީ ބޯޑާއެކު މެޗު ޓިކެޓުތަކުގެ އަގު އެއްވަރެއްގައި ހިފެހެއްޓުމަށް ބޭއްވުނު މަޝްވަރާތައް ރަނގަޅަށް އަޑުއަހާފައިވާ ކަމަށް ވެސް ބެރާޑާ ވަނީ ވިދާޅުވެފައެވެ.

"ނަމަވެސް، ޚަރަދުތައް އިތުރުވެ، މާލީގޮތުން ކުރިމަތިވަމުންދާ ގޮންޖެހުންތަކުގެ ސަބަބުން ޓިކެޓުގެ އަގުބޮޑުކުރުން ނޫން ގޮތެއް ނެތް ކަމަށް ކުލަބުން ނިންމައިފިން،" ބެރާޑާ ވިދާޅުވިއެވެ.

ބެރާޑާ އިތުރަށް ވިދާޅުވީ، ވީހާވެސް ކުޑަ މިންވަރަކަށް ޓިކެޓުގެ އަގުބޮޑުކުރުމުގައި ސަމާލުކަންދީފައިވާނެ ކަމަށާއި، ޚާއްސަކޮށް އެންމެ ހަގު އުމުރުގެ ސީޒަން ޓިކެޓު ހޯލްޑަރުންގެ އަގުތަކަށް ބަދަލެއް ގެނެސްފައިނުވާނެ ކަމަށެވެ.

މިހާރު އަޅަމުންދާ ފިޔަވަޅުތަކުގެ ސަބަބުން ކުލަބުގެ މާލީ ހާލަތު ރަނގަޅުވެ، ޓީމު ވަރުގަދަ ކުރުމަށް އިންވެސްޓްކުރުމުގައި ނުހަނު ބޮޑު އެހީތެރިކަމެއް ލިބޭނެ ކަމަށް ވެސް ބެރާޑާ ވިދާޅުވިއެވެ.

ޔުނައިޓެޑްގެ ސަޕޯޓަރުންގެ ޓްރަސްޓްގެ ފަރާތުން ޓިކެޓުގެ އަގުބޮޑުކުރުމާ ގުޅޭގޮތުން ބުނީ، ހީކުރިވަރަށްވުރެ ސީޒަން ޓިކެޓުގެ އަގުބޮޑެއް ނޫން ކަމަށެވެ. އެކަމަކު، ޓިކެޓު އަގުބޮޑުނުކުރުމަށް އެދި ކުރެވުނު މަޝްވަރާތަކަށް ބީރު ކަންފަތެއް ދީފައިވުމުން ކުލަބާ މެދު ވަރަށް ބޮޑަށް މާޔޫސްވެފައިވާ ކަމަށް ބުންޏެވެ.