ކުއްލި ހާލަތްތަކުގައި އަވަސް ފަރުވާދިނުމަށް ރާއްޖޭގައި އެއާ އެމްބިއުލާންސްގެ ޚިދުމަތް ފެށިތާ އަހަރެއް ފުރިފައިވާއިރު، މިދިޔަ އެއް އަހަރުތެރޭ އެއާ އެމްބިއުލާންސްގެ 787 ފްލައިޓް ދަތުރުކޮށް 931 ބަލިމީހުން އުފުލާފައިވާކަމަށް އައިލެންޑް އޭވިއޭޝަނު ބުނެފިއެވެ. 

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅާ އެއްގޮތަށް ރާއްޖޭގައި އެއާ އެމްބިއުލާންސްގެ ޚިދުމަތް ރަސްމީކޮށް ފެށީ 2024 ވަނަ އަހަރުގެ މާރިޗު 1 ވަނަ ދުވަހުއެވެ. އެދުވަހު ފެށި ޚިދުމަތަށް އަހަރެއް ފުރުމާއެކު، އެއާ އެމްބިއުލާންސް އޮޕަރޭޓްކުރާ ސަރަޙައްދަށް، ދަތުރުފަތުރާއި މަދަނީ އުދުހުންތަކާ ބެހޭ ވުޒާރާގެ ވަޒީރު މުޙައްމަދު އަމީނާއި ޞިއްޙީ ވުޒާރާގެ ވަޒީރު ޢަބްދުﷲ ނާޒިމް މިއަދު ވަނީ ވަޑައިގެންފައެވެ. 

ޚިދުމަތް ދޭ މޯލްޑިވިއަންއިން މިއަދު ބުނީ، އެއާއެމްބިއުލާންސްގެ ޚިދުމަތް 24 ގަޑިއިރު ފޯރުކޮށްދޭއިރު، މިހާރު ދޭ ޚިދުމަތުގައި އެއްފަހަރާ ތިން ބަލިމީހުން އުފުލުމުގެ އިތުރުން ސްޓްރެޗާގެ ޚިދުމަތް މިހާރު ލިބޭނެ ކަމަށެވެ. އެއާ އެމްބިއުލާންސްގެ ޚިދުމަތަކީ މެޑިކަލް އިމަޖެންސީގައި ރާއްޖެއަށް ލިބުނު ވަރަށް ބޮޑު ކުރިއެރުމެއް ކަމަށް އައިލެންޑް އޭވިއޭޝަނުން ބުނެފައިވެއެވެ. 

އެ ސަރަޙައްދުގައި ހުންނަވައި، މީޑިއާތަކާ ވާހަކަދައްކަވަމުން ވަޒީރު މުޙައްމަދު އަމީން ވިދާޅުވީ މީގެކުރިން ރާއްޖޭގައި އެ ޚިދުމަތް ދެމުންގެންދިޔައީ، މޯލްޑިވިއަންގެ ޝެޑިއުލަށް ވަގުތު ލިބޭ އިރަކުން ނުވަތަ އާއްމުކޮށް ދަތުރުކުރާ ފްލައިޓް ޝެޑިއުލްގައި ކަމަށެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވައުދުފުޅާއެކު ފެށި ޚިދުމަތާއެކު، މެޑިކަލް އިމަޖެންސީގައި ބޭނުންވާ ހުރިހާ އާލާތްތަކާއެކު، މިހާރު އެއާ އެމްބިއުލާންސްގެ ޚިދުމަތް ލިބޭނެ އިންތިޒާމުތައް ހަމަޖައްސާފައިވާކަމަށް ވަޒީރު ވިދާޅުވިއެވެ. 

ވަޒީރު އަމީން އިތުރަށް ވިދާޅުވީ، ޚިދުމަތް ދެމުންގެންދަނީ އެކަމަށް ކަނޑައަޅާފައިވާ މެޑިކަލް ޓީމަކާއެކު، ކްރޫންނާއި، މަތިންދާބޯޓުތައް އަބަދުވެސް ތައްޔާރަށް އޮވެގެން ކަމަށެވެ. އަދި، ހާއްޞަ ހާލަތެއް ކުރިމަތިވެއްޖެނަމަ ސީޕްލޭން އޮޕަރޭޝަންސްގެ ބޯޓުތައް އޮޕަރޭޓް ކުރެވޭނެ ގޮތަށް ސަރުކާރުން ހަމަޖައްސާފައިވާކަމަށް ވަޒީރު މުޙައްމަދު އަމީން ވިދާޅުވިއެވެ. 

ޞިއްޙީ ވުޒާރާގެ ވަޒީރު ޢަބްދުﷲ ނާޒިމް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވައުދުވެވަޑައިގެންނެވި ގޮތަށް އެއާ އެމްބިއުލާންސްގެ ޚިދުމަތް ފޯރުކޮށްދިނުމަކީ ޞިއްޙީ ނިޒާމުގައި ރާއްޖެއަށް ލިބުނު ވަރަށް ބޮޑު ކުރިއެރުމެއް ކަމަށެވެ. 

އެއާ އެމްބިއުލާންސްގެ ޚިދުމަތަކީ ދިވެހި ރައްޔިތުންނަށް ލިބުނު ކާމިޔާބީއެއްކަމަށް ވިދާޅުވެ، ވަޒީރު ޢަބްދުﷲ ނާޒިމް ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ޝުކުރު އަދާކުރައްވައިފައެވެ. އަދި، އެއާ އެމްބިއުލާންސްގެ ޚިދުމަތް ފޯރުކޮށްދިނުމުގައި މަސައްކަތްކުރާ އައިލެންޑް އޭވިއޭޝަނުގެ މުވައްޒަފުންނަށާއި، އެ ޚިދުމަތް ފޯރުކޮށްދިނުމުގައި ހަރަކާތްތެރިވާ ޞިއްޙީ ދާއިރާގެ މުވައްޒަފުންނަށް ވަޒީރު ޢަބްދުﷲ ނާޒިމް ޝުކުރު އަދާކުރެއްވިއެވެ.