މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިން ބާއްވާ 8 ބޯލް އެސޯސިއޭޝަން ކަޕްގެ ޗެމްޕިއަންކަން ހުސައިން ފަޔާޒް ހޯދައިފިއެވެ.

މުބާރާތުގެ ޗެމްޕިއަންކަން ފަޔާޒް ހޯދީ ފައިނަލުގައި އަހްސަން ހާޝިމް ބަލިކޮށްގެންނެވެ.

ގައުމީ ބިލިއާޑް ސެންޓަރުގެ އެތެރޭ ކޯޓުގައި ރޭ ކުޅުނު ފައިނަލް މެޗުގައި ވާދަވެރި ކުޅުމެއް ފެނިގެންދިޔައިރު، ފަޔާޒް މޮޅުވީ 9-7 އިންނެވެ.

މުބާރާތުގެ ފައިނަލަށް ފަޔާޒް ދަތުރުކުރީ ސެމީ ފައިނަލުގައި އޭނާގެ ބޭބެ، އަލީ ފަޔާޒް ބަލިކޮށްގެންނެވެ. ސެމީގެ އަނެއް މެޗުގައި އަހްސަން ވަނީ މުޙައްމަދު ޝަރީފް ބަލިކޮށްފައެވެ.

މި ފަހަރުގެ "8 ބޯލް" އެސޯސިއޭޝަން ކަޕް ކާމިޔާބުކުރި ފަޔާޒް ވަނީ މިދިޔަ އަހަރު ބޭއްވި "10 ބޯލް" ޗެމްޕިއަންޝިޕްގެ ޗެމްޕިއަންކަން ހޯދައިފައެވެ. އެންމެ ފަހުން ބޭއްވީ "9 ބޯލް" ޗެމްޕިއަންޝިޕް ކާމިޔާބުކުރީ މުޙައްމަދު ޝަރީފް އެވެ.