ޗައިނާގެ ސަރޗް އިންޖީނު ބައިޑޫއިން އާ ދެ އާޓިފިޝަލް އިންޓެލިޖެންސް (އޭއައި) މޮޑެލްއެއް ތައާރަފްކޮށްފިއެވެ.

ބައިޑޫއިން ތައާރަފްކުރީ، މީގެ ދެ އަހަރު ކުރިން ފުރަތަމަ ނެރުނު ކުންފުނީގެ ފައުންޑޭޝަނަލް މޮޑެލްގެ އެންމެ ފަހުގެ ވާޝަން އާރްނީ 4.5 އާއި އާ ރިޒަނިން މޮޑެލް އާރްނީ އެކްސް1 އެވެ. 

އާ ރިޒަނިން މޮޑެލް އާރްނީ އެކްސް1 އަކީ ޗައިނާގެ ޑީޕްސީކްގެ މޮޑެލްއާ ވާދަކުރާ ކަމަށް ބުނާ އާ ރިޒަނިން ފޯކަސްޑް މޮޑެލްއެވެ.

ޗައިނާގެ އޭއައި ސްޓާޓްއަޕް ޑީޕްސީކް އިން އެމެރިކާގެ އިންޑަސްޓްރީގެ ލީޑިން މޮޑެލްތަކާ އެއްވަރަށް ނުވަތަ އެއަށްވުރެ ވެސް ރަނގަޅު ކަމަށް ބުނާ އޭއައި މޮޑެލްތައް ކުޑަ އަގެއްގައި ތައާރަފުކުރުމުން، މި ސިނާއަތަށް ބޮޑެތި ބަދަލުތަކެއް އައިސް ދުނިޔޭގެ އޭއައި ރޭސް އަލުން ވާދަވެރިވާން ވަނީ ފަށައިފައެވެ.

ބައިޑޫއިން ބުނިގޮތުގައި، އާރްނީ އެކްސް1 އިން ޑިޕްސީކް އާރް1 އާ އެއްވަރަށް ޕާފޯމަންސް ދެއެވެ.

ނަމަވެސް އާރްނީ އެކްސް1 ޑިޕްސީކް އާރް1އަށް ވުރެ މާ އަގުހެވެވެ. 

މީގެއިތުރުން، އެކްސް1 އަކީ ހަރުދަނާ އަންޑަސްޓޭންޑިންގ، ޕްލޭނިންގ، ރިފްލެކްޝަން، އަދި އިވޮލިއުޝަން ކެޕޭސިޓީސް އެކުލެވިގެންވާ މޮޑެލްއެއް ކަމަށާއި މިއީ އަމިއްލަ އަށް ވަސީލަތްތައް ބޭނުންކުރާ ފުރަތަމަ ޑީޕް ތިންކިން މޮޑެލް ކަމަށް ބައިޑޫއިން ފާހަގަކުރިއެވެ.

ބައިޑޫ އިން ބުނީ އެ ކުންފުނީގެ އެންމެ ފަހުގެ ފައުންޑޭޝަން މޮޑެލް އާރްނީ 4.5 ގައި މޮޅު މަލްޓިމޯޑަލް އަންޑަސްޓޭންޑިން ކެޕޭސިޓީއެއް ހުރި ކަމަށެވެ. އަދި، ބަހުގެ ގާބިލްކަން މާ ކުރިއަރާފައިވާ ކަމަށާއި، އަންޑަސްޓޭންޑިންގ، ޖެނެރޭޝަން، ލޮޖިކް، އަދި މެމޮރީ އެބިލިޓީސް އެހެން މޮޑެލްސްތަކަށްވުރެ މާ ބޮޑަށްވެސް ފުރިހަމަވާނެ ކަމަށެވެ.

މީގު އިތުރުން އާރްނީ 4.5ގެ ޒަރިއްޔާއިން ނެޓްވޯކް މީމްސް ނުވަތަ ޕޮޕިއުލަރ ކަލްޗާއަށް ނިސްބަތްވާ ކާޓޫންތައް ދެނެގަންނަން އެނގޭނެކަމަށް ބައިޑޫއިން މައުލޫމާތުދިނެވެ.

މަލްޓިމޯޑަލް އޭއައި ސިސްޓަމްތަކަކީ މެސެޖު، ވީޑިއޯ، ފޮޓޯ އަދި އޯޑިއޯ ފަދަ ތަފާތު ވައްތަރުގެ ޑޭޓާ ޕްރޮސެސްކޮށް އިންޓަގްރޭޓް ކުރުމުގެ ގާބިލުކަން ލިބިފައިވާ ސިސްޓަމްތަކަކަށް ވާއިރު، މި ފޯމެޓްތަކުގައި ކޮންޓެންޓް ބަދަލުކުރުމުގެ ގާބިލުކަން ވެސް ލިބިފައިވެއެވެ.