ސިޔާސީ ޕާޓީއެއްގެ ހުއްދަ ލިބުމަކީ ބޭނުންހާ ގޮތަކަށް ޤައުމު ތެރޭގައި އުޅުމަށް ދެވޭ ލައިސަންސެއް ނޫން ކަމަށް ރައްޔިތުން މަޖިލީހުގެ މާފަންނު ހުޅަނގު ދާއިރާގެ މެމްބަރު މުޙައްމަދު މުޞްތަފާ ވިދާޅުވެއްޖެއެވެ.

އެމްއެމްޓީވީގެ ބޮޑު ޚަބަރު ޕްރޮގްރާމުގައި ވާހަކަ ދައްކަވަމުން މެމްބަރު މުޞްތަފާ ވިދާޅުވީ ސިޔާސީ ކޯޅުމަކަށް ކުޑަ ކުއްޖަކު ވެއްދުމަކީ ބޮޑު ކުށެއް ކަމަށާއި އެކަން ހަރުކަށި އިބާރާތުން ކުށްވެރިކުރައްވާކަމަށެވެ. ހުދު އެމްޑީޕީއަކީ ވެސް ކުޑަކުދިންގެ ޙައްޤުތައް ރައްކާތެރިކުރުމަށް ވަކާލާތުކުރަމުން އަންނަ ބައެއް ކަމަށް ވެސް މުޞްތަފާ ފާހަގަކުރެއްވިއެވެ. އެހެން ނަމަވެސް އެބައިމީހުންގެ ސިޔާސީ ހަސަދައިގެ ހުޅުގަނޑު ރޯވެ ހައްދުން ނެއްޓީކަމަށް މެމްބަރު ވިދާޅުވިއެވެ.

އެމްޑީޕީގެ ސީނިއާ އެކްޓިވިސްޓުން ތިބީ ފެއިލްވެފައިވާކަމަށް ވިދާޅުވަމުން މެމްބަރު ފާހަގަކުރެއްވީ އެމީހުންނަކީ ވަރަށް އަހުލާޤީ ފެންވަރު ދަށް ބައެއް ކަމަށެވެ. އަދި އެކަމަށް އެމްޑީޕީއިން ހިތްވަރުދިނުމަކީ ހަމަ ޔަގީނުންވެސް އެޕާޓީ ސިޔާސީ ޕާޓީއެއްގެ ގޮތުގައި ފެއިލްވެފައިވާ ކަމުގެ ހެއްކެއް ކަމަށް މެމްބަރު ވިދާޅުވިއެވެ.

މި ޢަމަލާ މެދު ވީހާ ވެސް އަވަހަކަށް ފިޔަވަޅު އެޅުމަށް ގޮވާލައްވަމުން މުޞްތަފާ ވިދާޅުވީ މި ކުށަކީ ދިވެހިރާއްޖޭގެ އެންމެހާ ރައްޔިތުން ކުށްވެރިކުރާނެ ކުށެއް ކަމަށެވެ.