ENGLISH

03 އޭޕްރީލު 2025

Advertisement

އީރާނުގެ ރޮބޮޓިކް ޓެލެ ސަރޖަރީ ސިސްޓަމް؛ ސިއްހީ ދާއިރާއަށް އިންގިލާބީ ކުރިއެރުމެއް

16 މާރިޗު 2025

|

ފަޒީލް ޢަބްދުލް ލަތީފު

20 އަހަރު ދުވަހުގެ ދިރާސާތަކަށް ފަހު އީރާނުން ވަނީ ވަރަށް ފުރިހަމަ ރޮބޮޓިކް ޓެލެ ސާޖަރީ ސިސްޓަމެއް އީޖާދު ކޮށްފައި.

އިންސާނުންނަށް ލުއިފަސޭހަކޮށްދިނުމަށް އެކި ދާއިރާތަކުން ތަފާތު އާ ޓެކްނޮލޮޖީތައް އީޖާދުކުރުމުގެ މަސައްކަތް އަންނަނީ ވަރަށް ހަލުއިކޮށް ކުރެވެމުންނެވެ. ގޭތެރޭގެ އެންމެ އާދައިގެ މަސައްކަތްތަައް ކުރަން ބޭނުންވާ އީޖާދުތަކުން ފެށިގެން، ސިނާއީ ބޮޑެތި މަސައްކަތްތަށް މުޅިން އެހެން ހަރުފަތަކަށް ގެންގޮސްދޭ ވަރުގެ އިޖާދުތައް ކުރަމުންދެއެވެ. ވަކި ދާއިރާއަކަށް ނަޒަރު ހިންގާލާއިރު، ސިއްހީ ދާއިރާއިން ޒަމާނީ ސައިންސާއި ޓެކްނޮލޮޖީގެ އެހީގައި، ދުނިޔެމިދަނީ ހީނުކުރާފަދަ ކުރިއެރުންތައް ހޯދަމުންނެވެ.

މިގޮތުން އިރާނުގެ ކުންފުންޔަކުން މިވަނީ ސިއްހީ ބޮޑެތި ސާޖަރީތައްކުރުމަށް އިންގިލާބީ ބަދަލުތަކެއް ގެންނާނެ ރޮބޮޓިކް ޓެލެ ސާޖަރީ ސިސްޓަމެއެް އީޖާދުކޮށްފައެވެ. އީރާނުގެ ރޮބޮޓިކްސް ކުންފުންޏަކުން ފަރުމާކޮށް އުފައްދާފައިވާ "ސީނާ" ރޮބޮޓިކް ޓެލެ ސަރޖަރީ ސިސްޓަމަކީ އެންމެ ޒަމާނީ އޭއައި (އާޓިފިޝަލް އިންޓެލިޖެންސް) ޓެކްނޮލޮޖީ ބޭނުންކޮށްގެން ހަދާފައިވާ، ރޮބޮޓިކް އެހީތެރިކަމާއެކު ސަރޖަރީ ކުރުމަށް ބޭނުންކުރާ ޕްލެޓްފޯމެކެވެ.

މި ސިސްޓަމުގައި ހިމެނޭ މައިގަނޑު ދެބައި

މި ރޮބޮޓިކް ޓެލެ ސާޖަރީ ސިސްޓަމްގެ އެންމެ މުހިންމު 2 ބަޔަކީ، ސާޖަންގެ ފަރާތުގައި ހުންނަ މާސްޓަރ ރޮބޮޓިކް ކޮންސޯލްއާއި ބަލިމީހާގެ ފަރާތުގައި ހުންނަ ސްލޭވް ރޮބޮޓިކް ސިސްޓަމެވެ. މި ސިސްޓަމުގައި ހިމެނެނީ ޚާއްޞަ ސަރޖަރީ އެނދެއްގެ ދެފަރާތުގައި ހަރުކުރެވިފައިވާ ދޭއް ނުވަތަ ތިން ސަރޖިކަލް ރޮބޮޓެވެ. ރޮބޯލެންސް ކިޔާ ރޮބޮޓިކް ކެމެރާމަނެއް ވެސް މި ނިޒާމުގައި ހިމެނެއެވެ. މި ކެމެރާއިން ބަލިމީހާގެ ހަށިގަނޑުގެ އެތެރޭގެ މަންޒަރުތައް ނަގައި ސާޖަންގެ މާސްޓަރ ކޮންސޯލްއަށް ފޮނުވައެވެ. ދުރުގައި ހުންނަ ސަރޖަންގެ ކޮންސޯލްއިން މި ރޮބޮޓިކް ކެމެރާ ކޮންޓްރޯލް ކުރެވެއެވެ.

މިދެބައި ގުޅުވާލެވިފައިވަނީ ފައިބަރ އޮޕްޓިކް ކޭބަލްތަކެއް މެދުވެރިކޮށް ހައިސްޕީޑް އިންޓަރނެޓް ކަނެކްޝަނަކުންނެވެ. މި ކަނެކްޝަންގައި 50 މެގަބިޓްސް ޕަރ ސެކަންޑް އަށްވުރެ މަތީ ބޭންޑްވިތެއް ހުންނަންޖެހެއެވެ. އަދި ލޭޓަންސީ ވަގުތު 150 މިލިސެކަންޑް އަށްވުރެ ދަށުގައި ހުންނަންޖެހޭއިރު، ނެޓްވޯކް ޖިޓަރ 10 އެމްއެސް އަށްވުރެ އިތުރުވެގެން ނުވާނެއެވެ.

"ސީނާ" ރޮބޮޓިކް ޓެލެ ސާޖަރީ ސިސްޓަމް، ސާޖަރީއެއްގެ ތެރެއިން

މި ސިސްޓަމުން ރޮބޮޓިކް އާލާތްތަކުގެ ހަރަކާތްތައް ސަރޖަންގެ އަތުގެ ހަރަކާތްތަކާ އެއްގޮތައް ނަކަލުކުރާއިރު، އޭއައި އެލްގޮރިދަމްގެ އެހީގައި، އާންމު އަތުގެ ހަރަކާތްތައް ދެނެގަނެ ހެދޭ ގޯސްތައް ނައްތާލުމަށްފަހު ސަރޖަރީގެ ނަތީޖާ އިތުރަށް ފުރިހަމަ ކޮށްދެއެވެ. ސަރޖަންގެ އަތުން އެއް ސެންޓިމީޓަރު ހަރަކާތްކުރާ ކޮންމެ ފަހަރަކު، ރޮބޮޓުން ބަލިމީހާގެ ހަށިގަނޑުގައި އެއް މިލިމީޓަރު ހަރަކާތްކުރެއެވެ. މިގޮތުން، މިސާލަކަށް ސަރޖަންއަށް ސިސްޓަމްގެ ކޮންސޯލްގައި ބޮޑުކޮށް ފެންނަ މިންވަރަށް ފަހަމުންދާއިރު، ރޮބޮޓުން އޭގެ 10 ބައިކުޅަ 1 ބަޔަށް ކުޑަކޮށް ބަލިމީހާގެ ހަށިގަނޑުގައި ފަހަމުންދާނެއެވެ.

ޓެލެ ސަރޖަރީ ސިސްޓަމުން ސަރޖަރީ ކުރާ ކޮޓަރިއާއި ސަރޖަން މަސައްކަތްކުރާ ތަން ވަކިކޮށްދެއެވެ. މި ގޮތަށް ފަރުމާކުރެވިފައިވުމުން އޮޕަރޭޝަންކުރާ ޑޮކްޓަރުންނަށް ބަލި ޖެހިދާނެ އެކިއެކި ސަބަބުތަކުން ރައްކާތެރިކަން ލިބެއެވެ. މީގެ ތެރޭގައި އެޗްއައިވީ، ސީ-ހެޕަޓައިޓިސް، ކޮވިޑް-19، ކާބަން ޑައިއޮކްސައިޑް، އަދި އޮޕަރޭޝަން ކޮޓަރީގައި ހުންނަ އައޮނައިޒިންގ ރޭޑިއޭޝަން ހިމެނެއެވެ.

މި ސިސްޓަމްގެ އެހީގައި ސަރޖަންއަށް އަރާމުކޮށް އިށީނދެ ހުރެ ވެސް ސާޖަރީ ފުރިހަމަ ކުރެވޭ.

ސަރޖަންނަށް އަރާމުކޮށް އިށީނދެ، އަތާއި އަތްތިލަ ރިލެކްސްކޮށްލައިގެން ހުރެވެސް މި ރޮބޮޓިކް ސިސްޓަމުގެ އެހީގައި ސާޖަރީ ފުރިހަމަ ކުރެވެއެވެ. އަދި ބޭނުންވެއްޖެ ހިނދެއްގައި އިށީނދެ ނޫނީ ތެދުވެ ހުރެގެންވެސް ސާޖަރީ ފުރިހަމަ ކުރެވެއެވެ. މި ކަމުގެ ސަބަބުން ވަރުބަލިކަން ކުޑަވެ، ސަރޖަރީ ކުރުމުގައި ގޯހެއް ހެދުމުގެ ފުރުޞަތު ކުޑަވެއެވެ.

މި ސިސްޓަމް ފަރުމާކުރެވިފައިވަނީ އެންމެ ޒަމާނީ ޓެކްނޮލޮޖީގެ އެހީގައި ސަރޖަންއަށާއި ބަލިމީހާއަށް ސަރޖަރީގެ ތަޖުރިބާ އެންމެ ފުރިހަމަޔަށް ކޮށްދިނުމަށެވެ. މީގެ ސަބަބުން ސަރޖަރީ ކާމިޔާބު ވުމުގެ ފުރުސަތު ބޮޑުވެ، ސާޖަރީއަށްފަހު ބަލިމީހާ އަވަހަށް ރަނގަޅުވެއެވެ. މި އާ އީޖާދީ ސިސްޓަމުން ސަރޖަންއަށާއި، ބަލިމީހުންނަށާއި، ހޮސްޕިޓަލްތަކަށް ގިނަގުނަ ފައިދާތަކެއް ކުރާނެއެވެ. މިހާރުވެސް އިންޑްނޭޝިޔާގެ ހޮަސްޕިޓަލުތަކުގައި މި ސިސްޓަމް ބޭނުންކުރެއެވެ. މި ސިސްޓަމް ބޭނުންކޮށްގެން އިންޑޮނޭޝިޔާގައި ކުރެވުނު ފުރަތަމަ ސާޖަރީއަށްފަހު، ސިސްޓަމްގެ ފެންވަރާމެދު އެ ގަައުމުގެ ސަރޖަނުންތިބީ ހައިރާންވެފައެވެ. އަދި 3500 ކިލޯމީޓަރަށްވުރެ ދުރަށް ފެތުރިފައިވާ މުޅި އިންޑޮނޭޝިޔާގެ ހުރިހާ ހިސާބަކަށް ޒަމާނީ ސިއްހީ ވަސީލަތްތައް ފޯރުކޮށްދިނުމުގައި، ކުރިޔަށް އޮތްތާގައި މި ސިސްޓަމް މުހިންމު ދައުރެއް އަދާކުރާނެ ކަމަށް އެގައުމުގެ ހެލްތު މިނިސްޓްރީން މައުލޫމާތުދެއެވެ.

އިންޑޮނޭޝިޔާގައި ސީނާ ޓެލެސާޖަރީ ސިސްޓަމް އިފްތިތާހް ކުރުމުގެ ތެރެއިން

އިރާންގެ ސީނާ ރޮބޮޓިކްސް އެންޑް މެޑިކަލް އިނޮވޭޓާސްގެ ފަރާތުން މި ސިސްޓްމް އީޖާދު ކޮށްފައިވަނީ، 20 އަހަރު މެޑިކަލް ރޮބޮޓިކްސްގެ ދާއިރާއިން ދިރާސާ ކުރުމަށްފަހުގައެވެ. އެމެރިކާ ހިމެނޭހެން ދުނިޔޭގެ ވަރަށްގިނަ ގަައުމުތަކުން މި އީޖާދަށްވަނީ ތައުރީފު ކޮށްފައެވެ. އަދި ބައިނަލްއަޤްވާމީ ފެންވަރުގެ މުހިންމު ސައިންޓިފިކް ޖާނަލްތަކުގައި މި ސިސްޓަމާ ގުޅޭގޮތުން 70 އަށްވުރެ ގިނަ ދިރާސާ ޝާއިއު ކޮށްފައިވެއެވެ.

ސިއްހީ ދާއިރާގެ ތަޖުރިބާކާރުން ވިދާޅުވާ ގޮތުގަ މި އީޖާދަކީ ސިއްހީ ދާއިރާއަށް އިންގިލާބީ ކުރިއެރުންތަކެއް ގެނެސްދޭނެ އީޖާދެކެވެ.

ކިޔުންތެރިންގެ ހިޔާލު