ENGLISH

03 އޭޕްރީލު 2025

Advertisement

ނަރީޝް، މިނިސްޓަރެއްގެ ފެންވަރުގައި ޔޫތު މިނިސްޓްރީގެ އެޑްވައިޒަރަކަށް އައްޔަނުކުރައްވައިފި

16 މާރިޗު 2025

|

ޢަލީ ޝަހީމް

މިނިސްޓަރެއްގެ ފެންވަރުގައި ޔޫތު މިނިސްޓްރީގެ އެޑްވައިޒަރަކަށް އައްޔަނުކުރެއްވި އަޙްމަދު ނަރީޝް. ފޮޓޯ: މާލެ ސިޓީ ކައުންސިލް

މާލޭ ސިޓީގެ ޑެޕިއުޓީ މޭޔަރުކަމުން އިސްތިއުފާދެއްވި އަޙްމަދު ނަރީޝް، މިނިސްޓަރެއްގެ ފެންވަރުގައި، މިނިސްޓްރީ އޮތް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސްއަށް އައްޔަނުކުރައްވައިފިއެވެ. 

ނަރީޝް މިނިސްޓަރެއްގެ ފެންވަރުގައި އެ މިނިސްޓްރީގައި އަދާކުރައްވާނީ، މިހާރު މިނިސްޓަރު ކަމުގައި ހުންނެވި އިބްރާހީމް ވަހީދުގެ އެޑްވައިޒަރެއްގެ ދައުރެވެ. 

ނަރީޝް އެ މަޤާމަށް އައްޔަނުކުރެއްވިކަން ރައީސުލްޖުމްހޫރިއްޔާ އޮފީހުގެ ތަރުޖަމާނު ހީނާ ވަލީދު ވަނީ "އެމްއެމްޓީވީ" އަށް ކަށަވަރުކޮށްދެއްވައިފައެވެ. 

މާލޭ ސިޓީ ކައުންސިލްގައި ނަރީޝް ތަމްސީލުކުރެއްވީ މާފަންނު މެދު ދާއިރާއެވެ. ނަރީޝް މިދިޔަ ހަފްތާ އެ މަޤާމުން އިސްތިއުފާދެއްވީ، ގައުމާއި ރައްޔިތުންނަށް އެހެން ހައިސިއްޔަތަކުން ހިދުމަތްކުރައްވަން ފުރުސަތު ލިބުމާއި ގުޅިގެން ކަމަށް ވިދާޅުވެއެވެ. 

ސިޓީ ކައުންސިލްގެ މަޤާމް ދޫކޮށްލެވުމަށްފަހު ނަރީޝް އިތުރަށް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަކީ ބޭނުންވާ ނަތީޖާތައް ހަލުވިކަމާއެކު ނެރެދެއްވުމަށްޓަކައި، ސިޔާސީ ފިކުރު ތަފާތު މީހުންނާއެކު ވެސް ގުޅިގެން މަސައްކަތްކުރުމުގެ ފެންވަރުހުރިކަން ޢަމަލުފުޅުން ސާބިތުކޮށްދެއްވައި، ރީތި ނަމޫނާ ދައްކަވައި މާލެ ސިޓީއަށް އަވަސް، ހެޔޮ ބަދަލުތަކެއް ގެންނެވި ލީޑަރެއްކަމަށެވެ. 

ނަރީޝް މާލެ ސިޓީ ކައުންސިލުން އިސްތިއުފާ ދެއްވުމުން އޭނާގެ އިސްތިއުފާ ގަބޫލުކުރައްވާ އޭނާގެ ހިދުމަތަށް ސިޓީ ކައުންސިލުން ވަނީ ތައުރީފްކޮށްފައެވެ. އެގޮތުން، މާލެ ސިޓީ ކައުންސިލްގެ މޭޔަރު އާދަމް އާޒިމް ފޮނުއްވެވި ސިޓީގައި ވިދާޅުވީ، ޑެޕިއުޓީ މޭޔަރުގެ ހައިސިއްޔަތުން މާލެ ސިޓީއަށް ކުރެއްވި އިޚްލާސްތެރި، ބުރަ، މުހިންމު މަސައްކަތްޕުޅަށް ވަރަށް އިޚްލާސްތެރި ކަމާއެކު ޝުކުރު ދަންނަވާކަމަށެވެ. 

މާލޭގެ ޑެޕިއުޓީ މޭޔަރުކަމުން ނަރީޝް އިސްތިއުފާ ދެއްވުމުން މިއަދު ވަނީ އެ މަގާމަށް މާފަންނު ހުޅަނގު އުތުރު ދާއިރާގެ ޕީއެންސީގެ މެމްބަރު މުހައްމަދު އަރީޝް އިންތިހާބު ކޮށްފައެވެ.  

ކިޔުންތެރިންގެ ހިޔާލު