ރާއްޖޭގެ އެންމެ ދުވަސްވީ އެއް ޕާޓީކަމަށްވާ އެމްޑީޕީއިން  އަދާކުރަމުންދަނީ ސިޔާސީ ޕާޓީއެއްގެ ރޯލެއް ނޫންކަމަށް ރައްޔިތުން މަޖިލީހުގެ މާފަންނު ހުޅަނގު ދާއިރާގެ މެމްބަރު މުޙައްމަދު މުޞްތަފާ ވިދާޅުވެއްޖެއެވެ.

އެމްއެމްޓީވީގެ ބޮޑު ޚަބަރު ޕްރޮގްރާމުގައި ވާހަކަ ދައްކަވަމުން މެމްބަރު މުޞްތަފާ ވިދާޅުވީ އެމްޑީޕީން އިޖްތިމާޢީ ފޭރާން ހަލާކު ކުރުމުގެ މަސައްކަތްތައް ފެށީ ރައީސް އަލްއުސްތާޛު  މައުމޫން ޢަބްދުލްޤައްޔޫމުގެ ވެރިކަމުގައިކަމަށެވެ. އަދި އެމްޑީޕީއަކީ އެޕާޓީ އުފެދުނީއްސުރެ ތަފާތު ގިނަ  ނޭއްގާނީ ޢަމަލުތަކެއް ހިންގަމުން އަންނަ ބައެއްގެ ގޮތުގައި މެމްބަރު މުޞްތަފާ ސިފަކުރެއްވިއެވެ.

އެމްޑީޕީން ހިންގާފައިވާ މިފަދަ ކަންތައްތަކުގެ ތެރެއިން ޤައުމުގެ އިޖްތިމާޢީ ފޭރާން ވަރަށް ބޮޑަށް ދަށްކޮށް ވީދައި ހަލާކުކޮށްލިކަމަށް ވެސް މުޞްތަފާ ފާހަގަކުރެއްވިއެވެ. އެމްޑީޕީ ފުރަތަމަ އުފެދިގެން އައިއިރު އެމީހުންގެ މަސައްކަތްތައް ފުރަތަމަ ކުރަމުންދިޔައީ ކޮލަމްބޯގައި ކަން ފާހަގަކުރައްވަމުން މެމްބަރު ވިދާޅުވީ އެމީހުން އޭރުވެސް ބޮޑެތި ނުރައްކާތެރި ކަންކަން ރާވަމުންދިޔަ ކަމަށެވެ.

އަދި މި މަޝްވަރާގައި ތިއްބެވި ބައެއް ބޭފުޅުން މި ވާހަކަ އަޑުއަހަން ޤަބޫލުނުވެގެން، އެބޭފުޅުންގެ ހިތަށް އެކަން ތަސައްވަރުކުރަން ދަތިވެގެން އެ ބައްދަލުވުން ދޫކޮށް ވަޑައިގެންނެވި ކަމަށް ވެސް މުޞްތަފާ ވިދާޅުވިއެވެ. އަދި އެމްޑީޕީގެ އެފަދަ އެހެން ބައްދަލުވުމެއްގައި ހައެއްކަ މީހުން މަރާލަންޖެހޭނެކަމަށް މަޝްވަރާކުރިކަމަށް ވެސް މެމްބަރު ވިދާޅުވިއެވެ. 

އެމްޑީޕީ އުފެދިގެން އައި ރޫޙަކީ މިއީ ކަން ފާހަގަކުރައްވާ މުޞްތަފާ ވިދާޅުވީ އެމްޑީޕީ ފިޔަވައި އެހެން ބަޔަކު ވެރިކަން ކުރާ ކޮންމެ ފަހަރަކުވެސް އެމީހުން މިކުރާ ކަމަކީ އެއިރެއްގެ ވެރިކަމުގައި ތިއްބަވާ ބޭފުޅުންގެ ޒާތީ ކަންކަމުގެ ތެރެއަށް ވަދެގަނެ، އެބޭފުޅުންގެ މުޅި އާއިލާ ހިމަނުއްވައިގެން އެ ބޭފުޅުންގެ އިސްތަށިފުޅުގައި އެކި ޒާތްޒާތުގެ އިލްޒާމުތަައް އެޅުވުން ކަމަށް މެންބަރު ވިދާޅުވިއެވެ.