ކުވައިތުގައި އުޅޭ، އެގައުމަށް ނިސްބަތްނުވާ މީހުންގެ ތެރެއިން ސަލާންޖަހާ މީހުން ޑީޕޯޓުކުރަން ނިންމައިފިއެވެ.

މީ ކުވައިތުގެ އެކްޓިންގް ޕްރައިމް މިނިސްޓަރް ޝައިޚް ފަހްދު ޔޫސުފް ސައުދް އަލް-ސަބާހްގެ އިރުޝާދުގެ ދަށުން ރަމަޟާންމަހުގައި އިތުރުވާ ސަލާންޖެހުން ހުއްޓުވަން ކުރިޔަށްގެންދިޔަ މަސައްކަތެކެވެ. 

ކުވައިތުގެ އިންޓީރިއާ މިނިސްޓްރީން މައުލޫމާތުދިންގޮތުގައި މަގުމަތީގައި ސަލާންޖެހުމުގައި ހަރަކާތްތެރިވާ 11 ފިރިހެން އަދި އަންހެން ބިދޭސިއަކު ހައްޔަރުކޮށްފައިވެއެވެ.

މީގެތެރޭގައި ހިމެނެނީ އަރަބި އަދި އޭޝިއާގެ ގައުމުތަކަށް ނިސްބަތްވާ އަށް އަންހެނުންނާއި ތިން ފިރިހެނުންނެވެ.

މިނިސްޓްރީއިން ނެރިފައިވާ ބަޔާނެއްގައި ބުނެފައިވާ ގޮތުގައި، މިސްކިތްތަކާއި މާރުކޭޓުތަކުގެ ކުރިމަތީގައި ސަލާންޖަހަމުން ދިޔަ މީހުންވެސް ފެނިފައިވެއެވެ.

މީގެން ގިނަބަޔަކު ކުވައިތަށް އައިސްފައިވަނީ ވިސިޓް ވިސާ ނުވަތަ އާއިލީ ރެޒިޑެންސީ ޕާމިޓްގައެވެ. ނަމަވެސް، މީގެން އަނެއް ބަޔަކީ ދާއިމީ ވަޒީފާއެއް ނެތް ގަވާއިދާ ހިލާފަށް މަސައްކަތްކުރާ މީހުންނެވެ.

ގާނޫނީ އިޖުރާއަތުތަކަށް އަލިއަޅުވާލައްވަމުން މިނިސްޓްރީން ބުނީ ގަވާއިދާ ހިލާފުވާ ހުރިހާ ފަރާތްތަކެއް ޑީޕޯޓުކުރުމުގެ މަސައްކަތް ޖެނެރަލް ޑިޕާޓްމަންޓް އޮފް ރެސިޑެންސް އެފެއާޒް އިންވެސްޓިގޭޝަންސް އިން ކުރިއަށް ގެންދާނެ ކަމަށެވެ.

މީގެއިތުރުން، މީހުންގެ ހަމްދަރުދީ ހޯދުމަށް ސަލާންޖެހުމުގައި ކުޑަކުދިން ގެންގުޅޭ މީހުންގެ މައްޗަށް "ކުޑަކުދިން ނަހަމަ ގޮތުގައި ބޭނުންކުރުމުގެ" މައްސަލައެއް ރަޖިސްޓްރީކޮށް ގާނޫނީގޮތުން ހަރުކަށި ފިޔަވަޅުތަކެއް އެޅޭނެކަމަށް މިނިސްޓްރީން ވަނީ އިންޒާރު ދީފަ އެވެ.

 ހަމައެފަދައިން، ސޯޝަލް މީޑިއާގައި ސަލާންޖަހާ މައްސަލަތަކުގައި ގާނޫނީ ފިޔަވަޅު އަޅާނެ ކަމުގެ އިންޒާރުވެސް މިނިސްޓްރީން ވަނީ ދީފައެވެ.

ސަލާންޖަހާ މީހުން އާންމުކޮށް ރަމަޟާން މަހުގައި ސަލާންޖަހަނީ، ރަމަޟާންމަހަކީ ހެޔޮއެދުންތަކުގެ މަހަކަށްވުމުން މިކަމުގެ ފައިދާ ނެގުމުގެ ގޮތުންނެވެ.