ރާއްޖޭގެ ރަޢީސުލްޖުމްހޫރިއްޔާގެ މަޤާމުގައި ތިއްބަވާ ބޭފުޅުންގެ އާއިލާއަށް ނިސްބަތްކޮށް ދޮގު ވާހަކަތައް ދެއްކުމާއި، މީޑިއާއާއި ސޯޝަލްމީޑިއާގެ ޕްލެޓްފޯމްތަކުގައި އާއިލާގެ ކަރާމާތާއި އަބުރުނަގާލުމުގެ މާޒީ އޮތީ ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) ގައެވެ. އިދިކޮޅު ޕާޓީގެ ގޮތުގައި އޮވެ މީގެކުރިންވެސް އެމްޑީޕީން ވަނީ ރާއްޖޭގެ ރައީސްކަން ކުރެއްވި ބޭފުޅުންގެ ޒާތީ ދިރިއުޅުމާއި ބެހި، ރާއްޖޭގެ ޤާނޫނުތަކާއި ބައިނައަޤްވާމީ މުޢާހަދާތަކާ ޚިލާފު އެތައް ކަމެއް ކޮށްފައެވެ.

އެހެންކަމުން، އިދިކޮޅުގައި ތިބެ ރާއްޖޭގެ ރައީސްކަމުގައި ހުންނަވާ ބޭފުޅެއްގެ އާއިލާއަށް ފުރައްސާރަކޮށް، އަބުރު ނަގާލުމުގެ މަސައްކަތް އެ ޕާޓީން ކުރުމަކީ، އެޕާޓީއާ ބީރައްޓެހި ކަމެއް ނޫނެވެ. އެހެންނަމަވެސް، މިފަހަކަށް އައިސް އެޕާޓިން އެދަނީ ރާއްޖޭގެ ރައީސުލްޖުމްހޫރިއްޔާގެ މަޤާމުގައި ހުންނެވި ޑރ. މުޙައްމަދު މުޢިއްޒުގެ ޢާއިލާއާއި، އުމުރަށްވެސް ނުބަލައި އެމަނިކުފާނުގެ އާއިލާގެ ވަކިވަކި މެމްބަރުންނަށް ފުރައްސާރަކުރަމުންނެވެ. އެގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތުއްޕުޅު ބޭފުޅުންގެ އަބުރު ކަތިލުމުގެ ސިލްސިލާ ހަރަކާތްތަކެއް އެމްޑީޕީން މިހާރު އަންނަނީ ހިންގަމުންނެވެ. އެ ހަރަކާތްތަކުގައި ތުއްޕުޅު ބޭފުޅުންގެ ފޮޓޯ ހާމަކުރުމާއި، ނަން ހާމަކޮށް އެބޭފުޅުންގެ ރައްކާތެރިކަމަށް ބުރޫއަރާނެ އެތައް ޢަމަލެއް ހިންގަމުންދެއެވެ. 

އެމްޑީޕީން ވަނީ ރައީސުލްޖުމްހޫރިއްޔާގެ ތުއްޕުޅު ދަރިކަލަކު ވޭޕް ބޭނުންކުރައްވާކަމާއި، ދުންފަތުގެ އިސްތިޢުމާލުކުރާ ދަރިކަލެއް ކަމަށް ބުނެ، އެ ދަރިކަލުންގެ އައިޑެންޓިޓީ ހާމަކޮށް ހުއްޓުމެއްނެތި ފުރައްސާރަކޮށްފައެވެ. އެ ވާހަކަތައް ދޮގުކުރައްވައި ރައީސުލްޖުމްހޫރިއްޔާގެ އާއިލާގެ ފަރާތުން ޤާނޫނީ ވަކީލު ޢާއިޝަތު އާޒިމާ ޝަކޫރު އާއްމުކުރެއްވި ބަޔާނުގައި ވިދާޅުވީ، ވޭޕް ބޭނުންކުރުމާއި ދުންފަތުގެ އިސްތިޢުމާލު ކުރެއްވުމަކީ  ރައީސުލްޖުމްހޫރިއްޔާގެ ދަރިކަލުން އެއްވެސް ގޮތަކަށް ކުރައްވާ ކަންކަމެއް ނޫން ކަމަށެވެ. 

ކުޑަކުދިންނާއި ގުޅޭގޮތުން އެފަދަ ޙައްސާސް ވާހަކަތައް އާއްމުކޮށް، އެކުދިންގެ ކަރާމާތާއި އަބުރު ނަގާލުމަކީ އެފަދަ މަޤާމްތަކުގައި ނުވަތަ ހާލަތުގައި ތިބޭ ކުޑަކުދިންނަށް މުސްތަޤްބަލަށް އެޅޭނެ ހުރަހެއްކަން ރައީސުލްޖުމްހޫރިއްޔާގެ އާއިލާގެ ފަރާތުން އާއްމުކުރެއްވި ބަޔާނުގައި ފާހަގަކުރައްވާފައިވެއެވެ. 

ދިވެހިރާއްޖޭގެ ކޮންމެ ކުޑަކުއްޖަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީންނާއި ކުޑަކުދިންގެ ޙައްޤުތައް ރައްކާތެރިކުރުމާބެހޭ ޤާނޫނީ އޮނިގަނޑުތަކުގެ ދަށުން ރައްކާތެރިކަން ލިބިގެންވާ ކުއްޖެއްކަން ބަޔާނުގައި ފާހަގަކުރައްވާފައިވެއެވެ. އެގޮތުން ރައީސުލްޖުމްހޫރިއްޔާގެ އުމުރުން 16 އަހަރުގެ ފިރިހެން ދަރިކަލަކީ ކުޑަކުއްޖެއް ކަމާއި، އެއީ މުސްތަޤްބަލު ކުރިމަތީގައި އޮތް ތަޢުލީމީ ހަޔާތް ފުރިހަމަނުވާ ކުއްޖެއްކަން ބަޔާނުގައި ފާހަގަކުރައްވާފައިވެއެވެ. 

އިދިކޮޅު ފަރާތްތަކުން އަންނަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ މަޤާމާ ޙަވާލުވެވަޑައިގަތީއްސުރެ ފުރައްސާރަކޮށް ގަނާކުރަމުންކަން ބަޔާނުގައި ވިދާޅުވެފައިވެއެވެ. 

ސިޔާސީ މަންފާއެއް ޙާޞިލްކުރުމަށް މިއަދު އެމްޑީޕީން އެދަނީ ކުޑަކުދިންތަކެއްގެ ޙައްޤުތަކަށް އަރައިގަންނަމުންނެވެ. އެއީ، ސިޔާސީ ފައިދާއަކަށްވުރެ ޖީލަކަށް ލިބިގެންދާނެ ގެއްލުމެއްކަން ޔަގީނެވެ. އެމްޑީޕީގެ ދިގު ތާރީޚުގެ މާޒީގައި ފުރައްސާރައާއި އަބުރުކަތިލުން އޮތަސް، ކުޑަކުދިންތަކެއްގެ ކަރާމާޔަށް އަރައިގަތުމަކީ ރައްޔިތުން ބަލައިގަންނާނެ ކަމެއް ނޫނެވެ. އެއީ ނާތަހުޒީބު ފިނޑި ޢަމަލެކެވެ. އެއީ ޖީލެއްގެ އިޖުތިމާއީ ފޭރާން ކިލަނބުކޮށްލުމެވެ. ރައީސުލްޖުމްހޫރިއްޔާގެ އާއިލާއިން ފަރުދީ ޒިންމާ އަދާކުރެއްވުމަށް އެ ނުކުމެވަޑައިގަތީ ހުރިހާ ކުޑަކުދިންގެ ޙައްޤުގައެވެ. ޤައުމު މުސްތަޤްބަލު އޮތް ކުދިންތަކެއްގެ ޙައްޤުތައް ކަށަވަރުކުރުމުގެ އަމިއްލަ އިޚްތިޔާރަކީ އެމަނިކުފާނުގެ ޢާއިލާއަށްވެސް ލިބިގެންވާ ޙައްޤެކެވެ.