ދިވެހިރާއްޖޭގެ ސުޕްރީމް ކޯޓުން ހުސްވެފައިވާ ފަނޑިޔާރުކަމުގެ މަގާމަށް ކުރިމަތިލުމުގެ ފުރުސަތު ޖުޑީޝަލް ސަވިސަސް ކޮމިޝަން (ޖޭއެސްސީ)އިން ހުޅުވާލައިފިއެވެ. 

ސުޕްރީމް ކޯޓުގެ ފަނޑިޔާރުގެ މަގާމު ހުސްވީ އެ ކޯޓުގެ ފަނޑިޔާރުކަމުގައި ހުންނެވި އަލްއުސްތާޛު ޙުސްނުއް ސުޢޫދު އެ މަގާމުން އިސްތިއުފާދެއްވުމުންނެވެ. އޭނާ މަގާމުން އިސްތިއުފާދެއްވީ އޭނާއާމެދު ތުހުމަތުވާ ކޮރަޕްޝަނުގެ މައްސަލައެއް އެންޓި ކޮރަޕްޝަން ކޮމިޝަން (އީސީސީ)އިން ތަހުގީގުކުރަމުންދާކަން ޖޭއެސްސީއަށް އެންގުމާ ގުޅިގެން އޭނާ ސަސްޕެންޑުކުރުމުންނެވެ. 

އޭނާ ސަސްޕެންޑުކުރި ފަހުން އިތުރު އެހެނިހެން ބައެއް މައްސަލަތައް ޖޭއެސްސީއަށް ހުށަހެޅި އެ މައްސަލަތައް އެ ކޮމިޝަނުން ބަލަން ފެށިއެވެ. 

ސުއޫދު އިސްތިއުފާދެއްވައި ފޮނުއްސި ސިޓީ ޖޭއެސްސީއަށް ލިބުމާ ގުޅިގެން އެ ކޮމިޝަނުންވަނީ އޭނާގެ އިސްތިއުފާ ގަބޫލުކޮށް ސުޕްރީމް ކޯޓުގެ ފަނޑިޔާރުކަމުން އޭނާ ވަކިކޮށްފައެވެ. 

މިއަދު ޖޭއެސްސީން ކުރި އިއުލާނުގައި ބުނި ގޮތުގައި ސުޕްރީމް ކޯޓުގެ ފަނޑިޔާރުކަމަށް ކުރިމަތިލުމަށް ހުޅުވައިލީ ގާނޫނުއަސާސީގައި ބުނެފައިވާ ގޮތުގެ މަތިން ރައީސުލްޖުމްހޫރިއްޔާއަށް ފަނޑިޔާރުކަމަށް ބޭފުޅަކު އައްޔަންކުރުމަށް މަޝްވަރާއާއި ލަފާ އެރުވުމަށެވެ. 

އެ މަގާމަށް ކުރިމަތިލާ މީހުންގެ ކިބައިގައި ފުރިހަމަވާންޖެހޭ ޝަރުތުތަކަކީ 

މި މަގާމަށް ކުރިމަތިލާން ބޭނުންވާ މީހުންނަށް މި މަހުގެ 12 ވަނަ ދުވަހުގެ 11:00 އާ ހަމައަށް ޖޭއެސްސީގެ ފަހިރެސް ޕޯޓަލު މެދުވެރިކޮށް އެކަމަށް އެދި ހުށަހެޅޭނެ ކަމުގައި ކޮމިޝަނުން ބުންޏެވެ. 

ފަނޑިޔާރު ސުއޫދު ސަސްޕެންޑުކުރުމުން އިސްތިއުފާދެއްވިއިރު އިތުރު ދެ ފަނޑިޔާރަކާ ގުޅޭ މައްސަލަތަކެއްވެސް ޖޭއެސްސީން އަންނަނީ ބަލަމުންނެވެ. އެއީ ފަނޑިޔާރު އަޒްމިރަލްދާ ޒާހިރާއި ފަނޑިޔާރު މަހާޒު އަލީ ޒާހިރެވެ.