މިނިވަން މުސްތަގިއްލު ފަލަސްތީނެއް އުފެދި އެ ޤައުމުގެ ރައްޔިތުންނަށް އަމާންކަމާއެކު ދިރިއުޅުމަށް މަގުފަހިކޮށްދޭނެ ސިޔާސަތަކީ ދިވެހިރާއްޖެއިން ޒަމާނުއްސުރެ ގެންގުޅޭނެ ސިޔާސަތެއްކަމަށާއި އެކަމަށް އަވަސް ހައްލެއް ގެނައުމަށް ދިވެހިރާއްޖެއިން އަޑުއުފުލާ އަބަދުވެސް ގޮވާލަމުންދާނެކަމަށް ވެސް ފޮރިން މިނިސްޓަރ ޑރ. އަބްދުﷲ ޚަލީލް ވިދާޅުވެއްޖެއެވެ.

މިނިސްޓަރ މިފަދައިން ވިދާޅުވީ ގަލޮޅު އުތުރު ދާއިރާގެ މެމްބަރު މުޙައްމަދު އިބްރާހީމް، ލިޔުމުން ޖަވާބު ހޯދެއްވުމަށް ކުރައްވާފައިވާ ސުވާލަކަށް ޖަވާބުދެއްވަމުންނެވެ. މިނިސްޓަރ ވިދާޅުވީ އިޒްރޭލްގެ ޕާސްޕޯޓުގައި ރާއްޖެއަށް އެތެރެކުރުން މަނާކުރުމަށް 2024 ޖޫން 2 ގައި ވަޒީރުންގެ މަޖިލީހުގެ ލަފަޔާއެކު ރައީސުލްޖުމްހޫރިއްޔާ ނިންމަވާފައިވާކަމަށެވެ.

މިކަން ތަންފީޒުކުރުމަށްޓަކައި ގާނޫނު ނަންބަރު 1/2007 އިމިގްރޭޝަންގެ ގާނޫނަށް އިސްލާހުގެންނަންޖެހޭ ކަމަށް މިނިސްޓަރ ވިދާޅުވެފައިވެއެވެ. އަދި އެ ގާނޫނަށް ހުށަހަޅާފައިވާ އިސްލާހު މިވަގުތު އޮތީ ރައްޔިތުންގެ މަޖިލީހުގެ ސަލާމަތާއި ބެހޭ ކޮމިޓީގައި ކަމާގުޅުންހުރި އެކިއެކި ފަރާތްތައް ހާޒިރުކޮށްގެން ދިރާސާކުރުމުގެ މަރުހަލާގައެވެ. މި އިސްލާހު ގާނޫނަކަށްވުމާއެކު ސަރުކާރުގެ ނިންމުން ތަންފީޒުކުރުމަށް މަގުފަހިވެގެންދާނެއެވެ.

މިނިސްޓަރ ޚަލީލް އިތުރަށް ވިދާޅުވީ ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގަމުންދާ ލާއިންސާނީ ޢަމަލުތައް ކުށްވެރިކޮށް އެފަދަ ޢަމަލުތައް ހުއްޓާލުމަށް ގޮވާލާ ބައިނަލްއަޤްވާމީ މަސްރަހުގެ ސަމާލުކަމަށް މިކަންކަން ގެނައުމަށް ދިވެހި ސަރުކާރުންދަނީ ބައިނަލްއަޤްވާމީ އެކި ފޯރަމްތަކުގައި އެކުވެރި އަރަބި އިސްލާމީ ޤައުމުތަކާއެކު ގިނަ މަސައްކަތްތަކެއް ކުރަމުންދާ ކަމަށެވެ. 

މިކަމުގެ މިސާލެއްގެ ގޮތުން މިނިސްޓަރ ފާހަގަކުރެއްވީ ބައިނަލްއަޤްވާމީ އެކި ފޯރަމްތަކުގައި މި މައްސަލައާ ގުޅިގެން އަޑުއުފުލާ ވާހަކަދެއްކުމުގެ އިތުރުން އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ)ގައި ކުރިއަށްދާ މި މައުޟޫއުއާ ގުޅޭ އެންމެހާ މައްސަލަތަކުގައި ދިވެހިރާއްޖެއިން ބައިވެރިވަމުންދާކަމެވެ. 

ދިވެހިރާއްޖެއިން ބައިވެރިވި ފަލަސްތީނާގުޅޭ ބައެއް މައްސަލަތައް:

ނިންމަވާލައްވަމުން މިނިސްޓަރ ވިދާޅުވީ ކުރިއަށް އޮތް ތަނުގައި ވެސް ދިވެހި ސަރުކާރުން ފަލަސްތީނުގެ ރައްޔިތުންނަށް އެހީތެރިކަން ފޯރުކޮށްދިނުމަށް ކެނޑިނޭޅި މަސައްކަތްކުރަމުން ގެންދާނެކަމުގައެވެ.